1, 2. (a) Adwogi maber ango ma watwero nongone ka watamo ki dok waloko i kom ngat ma wamaro? (Nen cal ma i pot karatac man.) (b) Lapeny mene ma wabinyamo?

 KA WATAMO dok waloko i kom ngat mo ma wamaro, ci watwa ki en jing matek. Man bene gin ma timme i kinwa ki Lubanga Jehovah. I dyewor ducu ma en tye ka kwat, Daudi obedo ka neno dan polo ma opong ki lakalatwe dok olwodo lok i kom kit mabeco pa Lacwec. En ocoyo ni: “Ka aneno polo, ma in itiyo ki cingi, ki dwe ki lakalatwe ma iketogi i kabedogi liking; dano kono gin ango ma miyo itamo pire, dano adana ma mwa-ni gin ango ma miyo iparo pire?” (Jab. 8:3, 4) I kare ma lakwena Paulo ocoyo kit ma yub pa Jehovah tye ka cobbe kwede pi Luicrael me cwiny, en owacci “Lonyo pa Lubanga dwong ma okato kare! Ryekone kacel ki ngecce tut twatwal!”​—Rom. 11: 17-26, 33.

² Ka watye i ticwa me pwony, watamo ki dok waloko i kom Jehovah. Man kelo adwogi maber. Omege ki lumege mapol ma gitye ki kero me nywako i tic pi kare malac guniang ni mot acel ma bino pi medo cawagi i tic me Ker-ri aye ni odongo margi pi Lubanga. Kadi bed ni itye ka tic macalo painia nyo itye ka yubbe me cakone, penye ki lapeny magi: Tic macalo painia jingo watta ki Jehovah nining? Ka itye ka tic macalo painia, penye kekeni ni, ‘Ngo ma romo konya wek amedde i tic man ma kelo mot mapol-li?’ Ka peya itye ka tic macalo painia, penye ni ‘Alokaloka ango ma aromo timone i kwona wek ati macalo painia?’ Kong wanenu kit ma tic macalo painia twero jingo kwede watwa ki Lubanga.

3. Nyamo jami mabeco ma Ker pa Lubanga bitimone gudowa nining ka watye i ticwa me pwony?

³ Nyamo ki jo mukene jami mabeco ma Ker pa Lubanga bitimone nyikowa cok bot Jehovah. Wang Baibul mene ma imaro tic kwede ka itye ka tito kwena i ot ki ot? Tika imaro tic ki Jabuli 37:10, 11; Daniel 2:44; Jon 5:28, 29; nyo Niyabo 21:3, 4? I cawa mo keken ma wanywako pi cikke magi ki jo mukene, ci nongo watye ka poyo wiwa ni Lubangawa ma cinge yot-ti aye miyo “kit gin mo ducu maber, ki mot ducu mabeco.” Man nyikowa cok ki Jehovah.​—Yak. 1:17.

4. Neno cwercwiny kacel ki tute pa jo ma watito botgi kwena maber-ri, dongo pwocwa nining ni Lubanga kite ber?

⁴ Neno cwercwiny kacel ki tute pa jo ma watito botgi kwena maber dongo pwocwa pi lok me ada. Dano me loboni gipe ki ngec matir ma twero konyogi me nongo yomcwiny kikome. Polgi giparo pi anyim dok gipe ki gen mo keken. Gin gimito niang ka ce tyen lok me kwo tye. Kadiwa jo ma giwacci gin ludini bene gitye ki ngec manok adada i kom Ginacoya. Gitye calo jo Nineve me kare macon. (Kwan Yona 4:11.) Ka wamedo cawawa i ticwa me pwony, man miyo waneno apokapoka madit ma lubbe ki kit ma Jehovah pitowa kwede i yo me cwiny ka iporo ki jo ma watito botgi lok me kwena. (Ic. 65:13) Nywako i ticwa me pwony bene poyo wiwa ni Jehovah kite ber adada pien en pe miniwa cam me cwiny keken, ento bene lwongo jo ducu me nongo kwe cwiny kacel ki gen pi anyim.​—Yabo 22:17.

5. Konyo jo mukene i yo me cwiny weko waneno pekki ma watye ka kato ki iye nining?

⁵ Konyo jo mukene me dongo i yo me cwiny weko pe wabedo ki par tutwal i kom pekowa. Trisha, ma tiyo calo painia marii onongo ni man tye lok ada i kare ma keny pa lunyodone oket. En owacci “Man aye gin ma pud dong ocwero cwinya loyo i kwona.” I nino mo acel ma cwinye tye ka cwer, en otamo ni myero pe ecit i ticwa me pwony, ento ingeye oloko tamme ci ocito ka kwan ki lutino adek ma bene onongo gitye ki peko i pacogi. Baba pa lutino-ni owekogi woko dok bene omingi madit onongo unogi adada. Trisha owacci: “Peko mo keken ma onongo atye kwede pe pore ki meggi. Ka watye ka kwan, wanggi onongo nyuto yomcwiny dok ginyero ma pe giparo gin mo keken. Lutino magi gubedo mic mua ki bot Jehovah pira, tutwalle i nino meno.”

6, 7. (a) Pwonyo dano ki lok ada me Baibul jingo niyewa nining? (b) Neno kit ma lutino kwan me Baibul giketo cik ma igi lac i tic kun giloko kwogi dongo pwocwa i kom ryeko pa Lubanga nining?

⁶ Pwonyo lok ada me Baibul jingo niyewa. Lakwena Paulo ocoyo lok i kom Lujudaya mogo ma gukwero lubo gin ma onongo gipwonyo kun en wacci: “Dong in lapwony ma ipwonyo jo mukene, pe ipwonnye kekeni bo?” (Rom. 2:21) Painia me kom kareni pe gitye calo Lujudaya mogo me kare-ca. Ginongo kare mapol me pwonyo lok me ada ki dong kwano Baibul ki dano. Wek man onyak nyige, mitte ni gin myero guyubbe pi latin kwan acel acel me Baibul dok bene myero gukwed lok wek gubed ki kare me gamo lapeny. Painia mo ma nyige Janeen otito ni: “I cawa ducu ma kare owec me pwonyo jo mukene ki lok me ada, awinyo kit ma lok ada magi gidonyo kwede i cwinya ki dong i tamma. Macalo adwogine, niyena pe ocung mot calo pii ma ogure, ento tye ka dong medde ameda.”

⁷ Neno ka lutino kwan me Baibul giketo cik ma igi lac i tic kun giloko kwogi dongo pwocwa i kom ryeko pa Lubanga. (Ic. 48: 17, 18) Man konyowa me medde ameda ki keto cik magi ma igi lac-ci i tic. Painia mukene ma nyinge Adrianna owacci: “Dano gibalo kwogi ka ce gijenge i kom ryekogi. Ento ka gucako jenge i kom ryeko pa Jehovah, ci ginongo adwogi maber cutcut.” Phil bene omoko lok meno ni: “Ineno kit ma Jehovah loko kwede kwo pa jo ma gutemo loko kwogi kekengi ento ongayogi woko.”

8. Tic kacel ki luye luwotwa ma kitgi beco i ticwa me pwony gudowa nining?

⁸ Tic kacel ki luye luwotwa ma kitgi beco i ticwa me pwony cuko cwinywa i yo me cwiny. (Car. 13:20) Painia mapol gicwalo cawa malac i ticwa me pwony kacel ki lutit kwena mukene. Man miyo kare me “cuko cwinywa kekenwa.” (Rom. 1:12; kwan Carolok 27:17.) Painia ma nyinge Lisa owacci: “I gang tic, lutic luwota pol kare gitye ki cwiny me pyem ki nyeko. Nino ducu iwinyo ka kikwoto nying ngat moni nyo kitiyo ki leb macilo. Gitimo gin mo keken pi laro dito. I kine mukene, kingala nyo kicaya pienni abedo Lakricitayo. Ento tic kacel ki Lukricitayo luwota i ticwa me pwony-nyi cuko cwinya. I otyeno adwogo paco ma nongo awinyo agonya kadi bed nongo aol ma ape ki kero.”

9. Tic macalo Painia konyo jo munyomme nining?

⁹ Tic macalo Painia konyo jo munyomme me jingo wat ma tye i kingi. (Latit. 4:12) Madeline, ma tiyo macalo painia gin ki cware-ni owacci: “Ka wadwogo paco, an kacel ki cwara wacwalo kare me lok i kinwa i kom kit ma ticwa me pwony owoto kwede nyo waloko i kom gin mo ma wakwano ki i Baibul ma waromo tic kwede i ticwa me pwony. Tic macalo painia mwaka ki mwaka konyowa me jingo wat ma tye i kinwa.” Trisha bene owacci:  “Wamoko tamwa pe me bedo ki banya, man oweko pe watele i kinwa ka odok i lok me cente. Wagoyo yub acel me wot i ticwa me pwony, ma oweko pol kare watiyo kacel ka watye ka pwonyo lutino kwanwa me Baibul nyo watye ka dok cen ka limo jo munyuto miti, dok man oweko wanyike cok i kinwa kekenwa ki bene Jehovah.”

10. Ka waketo pi Ker-ri bedo mukwongo kun waneno kit ma Lubanga konyowa kwede, man gudo genwa i kom Jehovah nining?

¹⁰ Genwa i kom Jehovah dongo ka waketo cwinywa i kom Ker-re, waneno kit ma en konyowa kwede, ki dong gamo legawa. Ki lok ada, Lukricitayo ducu gigeno Jehovah. Ento jo ma gitiyo calo painia ginongo ni geno Jehovah konyogi me medde ki ticgi. (Kwan Matayo 6:30-34.) Curt, ma tiyo macalo painia dok lakony kor laneno me adwol-li, oye me limo kacokke mo ma cito iye tero cawa aryo ki nucu nia ki gange. Gin ki dakone, ma bene tye painia-ni, onongo gipe ki moo i mutokagi ma romo terogi ki dok dwokogi kun onongo odong cabit acel wek kicule mucarane. Curt owacci, “onongo pe wangeyo ka myero waciti.” I nge lega, guye me cito, kun gigeno ni Lubanga bikonyogi. Ma dong gicok aa, laminwa mo acel ogoyo cim botgi ci owacci etye ki mic mo ma emito minigi. Mic man obedo cente ma onongo gimito kikome wek okonyogi me wot. Curt owacci, “Ka jami macalo man otimme makato tyen acel, ci ada wangi yabbe me neno ni Jehovah tye ka konyi.”

11. Tic macalo painia kelo mot ango?

¹¹ Ada, painia pol kare ginongo ni ka gitiyo bot Jehovah ki mit kom kun gijingo watgi kwede, ci mot ma Lubanga miyo ‘moko i komgi.’ (Nwo. 28:2) Kadi bed kumeno, tic macalo painia pol kare pe yot. Pe tye latic mo keken pa Lubanga ma wacci etye obar got ma lubbe ki pekki ma jemo pa Adam-mi okelo. Kadi bed ni painia mukene giweko tic macalo painia pi pekki mogo, ento pekki magi pud gitwero lweny kwedgi nyo cobogi. Ngo ma twero konyo painia pe me ilo cinggi kun gimedde ki nongo yomcwiny i ticgi?

12, 13. (a) Lapainia myero otim ngo ka nongo ni tek me cobo cawa ma mitte? (b) Pingo keto yub me kwano Baibul nino ducu, kwan piri keni, ki dong lwodo lok pire tek tutwal?

¹² Painia gitye ki jami mapol me atima. Pe yot me timo jami ducu, pi meno yubbe maber pire tek (1 Kor. 14:33, 40) Ka lapainia nongo tek me cobo cawa ma mitte, en myero kong onen kit ma etiyo kwede ki cawane. (Ep. 5:15, 16) En twero penye ni: ‘An mono acwalo cawa ma rom mene i mato yamo ki dong galowang? Tika abalo cawana i timo jami ma konygi pe? Tika aromo timo alokaloka i yubba me dog tic?’ Lakricitayo mo keken twero ye ni yot tutwal me medo jami mogo i kom yub ma watye kwede, ento painia myero gungine kekengi kare ki kare dok gutim alokaloka ma mitte.

¹³ Lapainia myero oket i yubbe jami calo kwano Baibul nino ducu, kwan pire kene, ki dong lwodo lok. En myero pe owek jami ma konygi pe odwor tamme ki i timo “jami ma pigi tego.” (Pil. 1:10, NW) Me lapore, go kong painia mo ma odwogo paco otyeno i nge bedo i ticwa me pwony dyeceng lung. En mito tic ki otyeno meno me yubbe pi cokke. Ento gin me acel ma en okwongo timone aye kwano waragane. I ngeye, en oyabo kompiutane ci ocako kwano e-mail kun dwoko wange. Ma en pud tye i Intanet, en oyabo kabedo mo acel me neno ka ce wel gin ma emito wilone-ni odwogo piny. Labongo ngeyone, en onongo dong obalo cokcok cawa aryo kulu dok bene pud peya ocako yubbe pi cokke. Pingo man  obedo peko madit adada? Lungwec matego myero gucam cam mabeco ka gimito medde ki ngwec pi kare malac. I yo acel-li, painia bene myero gumedde ki kwan pigi kengi ka gimito ni girii i tic macalo painia pi kare malac.​—1 Tem. 4:16.

14, 15. (a) Pingo painia myero pe gubed ki wang ma wor? (b) Gin ango ma lapainia myero otim ka en tye ka wok ki i peko?

¹⁴ Lupainia ma gicobo ticgi maber gitute me bedo ki kwo ma rwomme lapiny. Yecu ocuko cwiny lupwonnyene me bedo ki wang ma bal mo pe iye nyo wang ma pe wor. (Mat. 6:22) En okwo kwo ma rwomme lapiny wek eti ticce me pwony labongo gin mo ma dwoyo tamme. En bene owacci: “Too tye ki boro, winyo me polo bene tye ki odigi, ento Wod pa dano pe tye ki ka ma myero epyel iye wiye.” (Mat. 8:20) Wek painia moni olub lanen pa Yecu, en myero onge ni ka etye ki jami mapol me kom, ci ebibedo ka yubogi nyo lokogi kare ki kare.

¹⁵ Painia gingeyo ni mot me tic ma gitye kwede-ni pe nyuto ni pigi tek loyo jo mukene. Ma ka meno, mic nyo mot me tic mo keken ma watye kwede wanongo pi kica pa Lubanga. Pi meno, me medde ki tic macalo painia, ngat acel acel myero ojenge i kom Jehovah. (Pil. 4:13) Pekki kacel ki atematema wang ma obedo tye. (Jab. 34:19) Ka tye kumeno, painia myero guyeny tira pa Jehovah dok guwek en okonygi ma ka weko ticgi macalo painia. (Kwan Jabuli 37:5.) Ka gineno kit ma Lubanga konyogi kwede, man binyikogi cok bot Wongi me polo ma lamar-ri.​—Ic. 41:10.

16. Ngo ma myero itim ka imito tic macalo painia?

¹⁶ Ka imito nongo mot mapol calo ma painia ginongo, wek Jehovah onge mitini. (1 Jon 5:14, 15) Lok ki jo ma gitye ka tic macalo painia. Ket yub ma twero konyi me cako tic macalo painia. Meno aye gin ma Keith ki Erika gutimo. Macalo luot mukene ma gubedo yalwakgi, gin onongo gitye ki dog tic ma cwalo cawa malac, onongo guwilo ot ki mutoka manyen i nge nyomgi. Guwacci: “Watamo ni jami magi gibikeliwa yomcwiny, ento pe gukelo matwal.” I kare ma Keith orwenyo dog ticce, en ocako tic macalo painia pi tutuno. En owacci: “Tic macalo painia opoyo wiya i kom yomcwiny ma bino pi tiyo ticwa me pwony.” Gumako lirem ki luot mo ma gubedo painia ma gukonyogi me neno yomcwiny ma bino ka gudwoko rwom me kwogi piny ki bene me tic macalo painia. Ngo ma Keith gin ki Erika gutimo? “Wacoyo piny yubwa me cwiny mapol ma watye kwede, ci wamwono i kor firij, dok bene ka wacobo yub moni ci wagweto.” Lacen, gucako tic macalo painia.

17. Pingo twero bedo me ryeko ni myero itam me timo alokaloka i yubbi nyo i kwoni wek iti macalo painia?

¹⁷ Tika itwero cako tic macalo painia? Ka i kareni ineno ni pe itwero, ci tim jami ducu ma romo konyi me nyikke cok bot Jehovah kun itute ki kero-ni ducu itiyo ticwa me pwony-nyi. I nge lega matek bot Jehovah kun ingine kekeni, itwero nongo ni alokaloka mo olo to mitte i kwoni nyo i yubbi wek ibed ki kare me tic macalo painia. Ka icako tic macalo painia, yomcwiny ma ibibedo kwede bikato jami ducu ma ijalogi. Yomcwinyi bimedde ameda pien iketo pi Ker-ri mukwongo i kwoni. (Mat. 6:33) Ibibedo ki yomcwiny ma bino pi konyo jo mukene. Medo i kom meno, ibibedo ki kare me tamo ki dok lok i kom Jehovah, dok man bidongo mari pire kun bene iweko cwinye bedo yom.