CIK MA IYE LAC: “Wudi cwinywu kekenwu, . . . Kun wutimo kica ki luwotwu i kinwu kekenwu pi balwu. Ka ngat mo i kinwu tye ki lok mo i kom lawote, timo kica pi bal myero obed tye macalo Rwot [Jehovah] bene ceng otimowu kica.”​—Jo Kolocia 3:13.

Man te lokke ngo? I Baibul, bal kiporo ki banya ki dok timo kica kiporo ki weko banya. (Luka 11:4) Buk mo acel waco ni i Ginacoya, nyig lok me leb Grik ma kigonyo ni “timo kica” te lokke ni “weko banya kun pe dong ipenyo matwal.” Pi meno, ka wamito timo kica pi bal ma ngat moni otimo i komwa, pe dok waweko ngat meno culo wange. Bedo atera me timo kica pe te lokke ni wacwako bal meno nyo wacayo adwogi marac ma okelo i komwa. Ma ka meno, pe wamako ngat meno i cwinywa kadi bed ni watye ki tyen lok matir me ‘kok i kome.’

Tika tiyo i kareni? Dano ducu gibalo pien gitye ki roc. (Jo Roma 3:23) Pi meno, pore me bedo ki cwiny me timo kica bot jo mukene, pien i nge kare mo wan bene wamito ni gin gutimmiwa kica. Medo i kom meno, ka watimo kica, wan bene wanongo adwogi maber. Wanongo nining?

Ka wakudo akemo nyo wamako jo mukene i cwinywa kun pe watimo kica, ci wanongo adwogi marac. Kodi cwiny man marac-ci gengowa bedo ki yomcwiny, pe wabedo agonya i kwowa, dok weko cwiny tur cawa weng. Keto bene yotkomwa ka mading. Ripot mo ma kicoyo i Journal of the American College of Cardiology, ma Dr. Yoichi Chida ki Lapwony me Psychology Andrew Steptoe gukati kwede waco ni: “Kwed ma kitimo i kareni nyuto ni akemo ki gero medo ki CHD [coronary heart disease] gikelo adwogi marac.”

Ento ki tungcel bene nen kong adwogi maber ma timo kica kelo. Ka watimo kica bot jo mukene, wanote dok kuc bedo i kinwa ma weko wabedo ki wat maber. Ma pire dong tek loyo aye ni wanyuto ni walubo lanen pa Lubanga, ma timo kica bot lubalo ma gungut dok mito ni wan bene watim kica.​—11:25; Jo Epeco 4:32; 5:1.