Lucaden pa Jehovah gubedo ka tic ki kwai Baibul mapatpat i kwangi me Baibul. Ento wamaro tic tutwalle ki Baibul me New World Translation of the Holy Scriptures ka tye i lebwa pien kitiyo ki nying Lubanga, lok ma iye tye kakare, dok niang iye bene yot.

•   Tiyo ki nying Lubanga. Jo mogo ma gugonyo Baibul pe guketo deyo i kom Lubanga ma oweko kicoyo Baibul-li. Me labolle, i Baibul mo acel kicoyo iye nying dano makato 70 kulu ma gunywako i gonyo Baibul meno. Ento pe kitiyo ki nying Lubanga Jehovah kadi kicel keken i Baibul meno!

   Kitungcel, kidwoko nying Lubanga ka ma con onongo tye iye i kabedo makato alip mapol i Baibul me New World Translation, ento pe kiketo nying jo ma gunywako i gonyo Baibul man.

•   Lokke tye kakare. Pe tye ni lok ma i Baibul mukene-ni ducu kikobo kit ma onongo tye kwede i Baibul macon. Me labolle, kigonyo Matayo 7:13 i Baibul mo acel ni: “Wudony ki i doggola mading, pien doggola ma tero dano i kapiny lac, dok wot i yone yot.” Kadi bed kumeno, ginacoya macon tiyo ki nyig lok ni “to” ento pe “kapiny.” Twero bedo ni jo ma gugonyo Baibul meno gutiyo ki nyig lok ni “kapiny” pien onongo gitamo ni kibiwango lutim maraco pi naka i mac me kapiny. Ento meno pe gin ma Baibul pwonyo. Pi meno, Baibul me New World Translation kwanne ni: “Wudony ki i doggola mading, pien doggola ma tero dano i to lac.”

•   Niang iye yot. Baibul ma kigonyo maber pe myero obed ki lok matir keken ento niang iye bene myero obed yot. Me lapore, i Jo Roma 12:11, lakwena Paulo otiyo ki nyig lok ma ka kigonyo atir atir, ci bedo ni “cwiny tye ka yenyo.” Ento ki lok ada, lok meno pe niange maber tutwal ka kigonyo kit meno. Pi meno, Baibul me New World Translation ogonyo lok meno i yo ma niang iye yot ni, Lakricitayo myero obed ki “mit kom.”

 Medo i kom tic ki nying Lubanga, miyo ngec matir, ki dong tic ki nyig lok ma niang iye yot, tye gin mukene ma weko Baibul me New World Translation dok pat ki Baibul mukene-ni. Baibul man pe kicato acata. Pi tyen lok meno, dano milion mapol gitwero kwano Baibul i lebgi kadi wa jo ma onongo pe gitwero wilone.