Dɛbi. A ngɔ blema Baiblohi nɛ a kɛ nine ngma a ekomɛ kɛ to a sibi he, nɛ a na kaa ngɛ anɔkuale mi ɔ, Baiblo ɔ tsakee we, e ngɛ mi kaa a ngma e mi munyu ɔmɛ kɛ wo níhi nɛ a puɛɔ ɔ a nɔ si abɔ ngɛ jehahi babauu a mi mohu lɛɛ.

 Blema Baiblohi nɛ a kɛ nine ngma babauu ngɛ. Nɛ munyuhi nɛ ngɛ a mi ɔ ekomɛ je kpa bɔɔ ngɛ a sibi he, enɛ ɔ tsɔɔ kaa a pee tɔ̃tɔ̃mi komɛ benɛ a ngɛ ekpahi a nɔ hyɛe kɛ ngɛ ngmae ɔ. Se slɔɔtohi nɛ ngɛ mi ɔ klee we tsɔ, nɛ e tsakee we sisi numi nɛ ngɛ munyu ɔ mi ɔ hulɔ. Se kɛ̃ ɔ, a yɔse tɔ̃tɔ̃mi komɛ nɛ sa kadimi, nɛ e ngɛ kaa nɔ́ nɛ a je blɔ pee konɛ a kɛ tsake sɛ gbi nɛ ngɛ Baiblo ɔ mi ɔ. Ha nɛ waa hyɛ enyɔ komɛ:

1.   Baiblo sisi tsɔɔmi komɛ nɛ a se kɛ ɔ ngɔ Munyu nɛ ji: “ngɛ hiɔwe, Tsɛ ɔ, Munyu ɔ, kɛ Mumi Klɔuklɔu ɔ: nɛ nihi etɛ nɛ ɔmɛ bla kɛ pee kake” ɔ kɛ tsu ní ngɛ 1 Yohanɛ 5:7. Se ngɛ anɔkuale mi ɔ, blema womi kpohi nɛ a da saminya a ma nɔ́ mi kaa munyu nɛ ɔmɛ be sisije Baiblo ɔ mi. Pee se loko a ngɔ kɛ piɛɛ he. * Enɛ ɔ he ɔ, Baiblo sisi tsɔɔmihi nɛ a da nɛ a ngɛ mwɔnɛ ɔ fuu je kɛ je a sisi tsɔɔmi ɔmɛ a mi.

2.   Mawu biɛ ɔ nitsɛ je kpo si akpehi abɔ ngɛ blema Baiblo nɛ a kɛ nine ngma a mi. Se Baiblo sisi tsɔɔmihi fuu nɛ a ngɛ mwɔnɛ ɔ ngɔ sablaihi nɛ ji “Nyɔmtsɛ” loo “Mawu” kɛ da nane mi.

 Amlɔ nɛ ɔ, a na womi kpohi babauu pe be ko nɛ be ɔ, enɛ ɔ ha e he wɛ kulaa kaa a ma yɔse tɔ̃tɔ̃mihi. * Womi kpo nɛ ɔmɛ nɛ a kɛ to a sibi he ɔ maa nɔ mi niinɛ kaa Baiblo ɔ da.

•   Ní lelɔ ko nɛ a tsɛɛ lɛ ke William H. Green de ngɛ Hebri Ngmami ɔ (nɔ́ nɛ a pɔɔ lɛ tsɛmi ke “Somi Momo ɔ”) he ke: “Wa ma nyɛ ma de kɛ nɔ mi mami kaa blema womi nɛ ɔ nɛ a tsɔɔ sisi ɔ da saminya.”

•   Baiblo he ní lelɔ ko nɛ a tsɛɛ lɛ F. F. Bruce de ngɛ Hela Ngmami ɔ, loo “Somi He ɔ,” he ke: “Odasehi nɛ ngɛ nɛ tsɔɔ kaa Somi He ɔ da a hiɛ kulaa pe odasehi nɛ ngɛ blema womi kpahi nɛ nihi ngma amɛ a he. Se kɛ̃ ɔ, nɔ ko ji he atsinyɛ nɛ e ma bi kaa womi nɛ ɔmɛ da lo.”

•   Nyumu ko nɛ a tsɛɛ lɛ ke Frederic Kenyon, nɛ e ji Baiblo he ní lelɔ ɔ tsɔɔ kaa nɔ ko “ma nyɛ maa hɛɛ Baiblo mluku ɔ tsuo ngɛ e dɛ nɛ e ma nyɛ de kɛ nɔ mi mami kaa nɔ́ nɛ e hɛɛ ɔ ji Mawu we anɔkuale Munyu ɔ, nɛ nɔ́ ko kulaa laa we ngɛ mi kɛ je blema kɛ ba si mwɔnɛ ɔ.”

•   Yuda bi kɛ Kristofohi nɛ a ngma Baiblo ɔ mi munyu ɔmɛ kɛ fɔ si ɔ laa we tɔmihi nɛ ngɛ hɛ dɔ nɛ Mawu we bi pee nɛ a tu he munyu ngɛ Baiblo ɔ mi ɔmɛ a nɔ. * (4 Mose 20:12; 2 Samuel 11:​2-4; Galatia Bi 2:​11-​14) Jehanɛ se hu ɔ, a tsakee we níhi nɛ a ngma kɛ kɔ Yuda bi ɔmɛ a tue gbomi, a tsɔɔmihi kɛ a kusumi ɔmɛ hulɔ. (Hosea 4:2; Malaki 2:​8, 9; Mateo 23:​8, 9; 1 Yohane 5:​21) Akɛnɛ nimli nɛ ɔmɛ ngma munyu nɛ ɔmɛ pɛpɛɛpɛ nɛ a tsakee we hɛ mi he je ɔ, enɛ ɔ tsɔɔ kaa a he Mawu Munyu ɔ ye, nɛ a ngɛ bu nɛ mi kuɔ kɛ ha lɛ.

•   Anɛ sisi numi be he kaa Mawu nɛ ha nɛ a ngma Baiblo ɔ maa baa níhi nɛ a ngma ngɛ mi ɔ yi lo? * (Yesaya 40:8; 1 Petro 1:​24, 25) Ejakaa e suɔ nɛ wɔ nɛ wa ngɛ mwɔnɛ ɔ hu wa ná he se, kaa bɔ nɛ nihi nɛ a hi si blema a hu ná he se ɔ. (1 Korinto Bi 10:11) Ngɛ anɔkuale mi ɔ, “Níhi tsuo nɛ a ngma ngɔ to ɔ, a ngma kɛ ha wɔ ní tsɔɔmi, konɛ kɛ gu wa si fimi kɛ jehanɛ se hu, kɛ gu bua womi nɛ jeɔ Ngmami ɔ mi ɔ nɔ ɔ, wa ná hɛ kɛ nɔ fɔmi.”​—Roma Bi 15:4.

•   Yesu kɛ e kaseli ɔmɛ tsɛ Ngmamihi a se kɛ je Hela Ngmami ɔ nɛ nihi ngma a mi, se a de we ke munyu ɔmɛ dɛ.​​—Luka 4:​16-​21; Ní Tsumi 17:​1-3.