Mɛni Ji Yehowa Odasefohi A Blɔ Tsɔɔmi Ajla Toli ɔ?
Blɔ Tsɔɔmi Ajla Toli ɔmɛ ji Kristofohi bɔɔ ko nɛ a nane pi si ngɛ Mawu jami mi, nɛ a kɛ blɔ tsɔɔmi haa Yehowa Odasefohi tsuo ngɛ je kɛ wɛ. A ní tsumi ɔ hɛɛ fã enyɔ:
A hyɛɛ Baiblo mi tsɔsemi nɛ wa nine suɔ nɔ ngɛ womihi, kpehi, kɛ Yehowa Odasefohi a tsɔsemi sukuuhi nɛ a peeɔ ɔ nɔ.—Luka 12:42.
A hyɛɛ Yehowa Odasefohi a je kɛ wɛ fiɛɛmi ní tsumi ɔ nɔ, nɛ a tsɔɔ bɔ nɛ a kɛ sika kɛ ní kpahi nɛ nihi kɛ yeɔ bua a ma tsu ní ha.
Ngɛ kaseli ɔmɛ a be ɔ mi ɔ, Yesu bɔfo ɔmɛ kɛ nikɔtɔma amɛ ekomɛ peeɔ kake kɛ mwɔɔ yi mi kpɔhi nɛ́ a he hia kɛ haa Kristofohi asafo ɔ tsuo. Mwɔnɛ hu ɔ, Blɔ Tsɔɔmi Ajla Toli ɔmɛ nyɛɛɔ ‘bɔfo ɔmɛ kɛ nikɔtɔmahi nɛ a hi Yerusalem’ ɔ a nɔ hyɛmi nɔ́ ɔ se. (Ní Tsumi 15:2) Kaa bɔ nɛ e ji ngɛ bɔfo ɔmɛ kɛ nikɔtɔma nɛ ɔmɛ nɛ a hi si ngɛ kaseli ɔmɛ a be ɔ mi ɔ a blɔ fa mi ɔ, mwɔnɛ hu ɔ, Blɔ Tsɔɔmi Ajla Toli ɔmɛ bui a he kaa a ji Mawu we bi a hɛ mi nyɛɛli. A hyɛɛ Baiblo ɔ mi kɛ hlaa blɔ tsɔɔmi kɛ tsɔɔ kaa a kplɛɛ nɔ kaa Yesu Kristo ji nɔ nɛ Yehowa hla lɛ kaa asafo ɔ Yi.—1 Korinto Bi 11:3; Efeso Bi 5:23.
Mɛnɔmɛ lɛ a ngɛ sɔmɔe kaa Blɔ Tsɔɔmi Ajla Toli ɔmɛ ɔ?
Nihi nɛ a ngɛ sɔmɔe kaa Blɔ Tsɔɔmi Ajla Toli ɔmɛ ɔ ji, Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane kɛ Jeffrey Winder. A sɔmɔɔ ngɛ wa ní tsumi yi ɔ ngɛ Warwick, New York, ngɛ U.S.A.
Kɛ A To Blɔ Tsɔɔmi Ajla Toli Ɔmɛ A He Blɔ Nya Ha Kɛɛ?
Blɔ Tsɔɔmi Ajla Toli ɔmɛ to ajla toli a kuu kakaaka ekpa sisi konɛ a kɛ hyɛ ní tsumi slɔɔtohi nɛ wa tsuɔ ɔ nɔ, nɛ a ti nɔ fɛɛ nɔ tsuɔ ní ngɛ kuu kake loo nɔ́ nɛ hiɛ pe jã mi.
Ajla Toli Nɛ A Tsuɔ Sanehi A He Ní: A hyɛɛ níhi nɛ kɔɔ mlaa he ɔ nɔ. Nɛ ke oslaa ko ba Yehowa Odasefohi a nɔ aloo ke Yehowa Odasefohi kɛ yi mi wami ngɛ kpee ngɛ a hemi kɛ yemi ɔ he je loo a kɛ nyagba kpa ko ngɛ kpee ɔ, mɛ ji nihi nɛ a tsuɔ he ní.
Ajla Toli Nɛ A Hyɛɛ Betel Ní Tsuli A Nɔ: A hyɛɛ Betel weku ɔ mi bimɛ a nɔ, nɛ a toɔ níhi a he blɔ nya kɛ haa mɛ.
Ajla Toli Nɛ A Hyɛɛ Womi Fiami Nɔ: A hyɛɛ Baiblo kasemi níhi a peemi nɔ, nɛ a toɔ blɔ nya konɛ nyɛmimɛ a nine nɛ su nɔ ngɛ je kɛ wɛ. Jehanɛ se hu ɔ, a hyɛɛ tsuhi nɛ́ a maa nɛ wa jaa Mawu ngɛ mi, kɛ asafo ɔ ní tsumi kɔnihi kɛ gbi sisi tsɔɔmi ɔfisihi a mami nɔ.
Ajla Toli Nɛ A Hyɛɛ Sɔmɔmi Ní Tsumi ɔ Nɔ: A hyɛɛ ‘Matsɛ Yemi ɔ he sane kpakpa’ fiɛɛmi ní tsumi ɔ nɔ.—Mateo 24:14.
Ajla Toli Nɛ A Hyɛɛ Ní Tsɔɔmi Nɔ: A toɔ ní tsɔɔmi nɛ yaa nɔ ngɛ kpehi a sisi, kɛ sukuuhi a he blɔ nya, nɛ a hyɛɛ videohi kɛ munyuhi nɛ a fiaa nɛ a buɔ tue ɔ a peemi nɔ.
Ajla Toli Nɛ A Hyɛɛ Womihi A Ngmami Nɔ: A hyɛɛ Baiblo kasemi womihi a ngmami kɛ níhi nɛ a kɛ fɔɔ wa wɛbsaiti ɔ nɔ ɔ nɔ. Jehanɛ hu ɔ, a hyɛɛ gbi sisi tsɔɔmi ní tsumi ɔ nɔ.
Ngɛ níhi nɛ Blɔ Tsɔɔmi Ajla Toli ɔmɛ tsuɔ ɔ se ɔ, a kpeɔ daa otsi nɛ a susuɔ asafo ɔ hiami níhi a he. A susuɔ níhi nɛ Ngmami ɔ de ɔ he ngɛ a kpe nɛ ɔmɛ a sisi, nɛ a haa nɛ Mawu mumi ɔ yeɔ bua mɛ nɛ a peeɔ kake kɛ mwɔɔ yi mi kpɔ.—Ní Tsumi 15:25.
Mɛnɔmɛ lɛ a yeɔ bua Blɔ Tsɔɔmi Ajla Toli ɔmɛ?
A ji nyumuhi anɔkualetsɛmɛ nɛ a yeɔ kɛ buaa Blɔ Tsɔɔmi Ajla Toli ɔmɛ. (1 Korinto Bi 4:2) A ngɔ mɛ kɛ wo ajla toli a kuu slɔɔto ɔmɛ a mi, nɛ a ngɛ ní tsumi nɛ kuu nɛ a ngɛ mi ɔ tsuɔ ɔ he níhi a si kpami wawɛɛ, nɛ a yaa kpe nɛ jamɛ a kuu ɔ peeɔ daa otsi ɔ eko. E ngɛ mi kaa pi mɛ nɛ a mwɔɔ yi mi kpɔhi mohu lɛɛ, se a kɛ ga womihi nɛ he hia haa, nɛ a tsɔɔ a juɛmi ngɛ sanehi a he, nɛ a hyɛɛ konɛ a kɛ yi mi kpɔhi nɛ ajla toli a kuu ɔ mwɔɔ nɛ tsu ní, nɛ jehanɛ hu a hyɛɛ bɔ nɛ yi mi kpɔ nɛ a mwɔ ɔ ngɛ yiblii woe ha. Jehanɛ se hu ɔ, Blɔ Tsɔɔmi Ajla Toli ɔmɛ ma nyɛ ma ha nɛ a ya slaa wa nyɛmimɛ ngɛ je ɔ mi he komɛ, aloo a tu munyu ngɛ asafo ɔ daa jeha kpehi nɛ a peeɔ kɛ Gilead sukuu nya gbemi ɔ sisi.
Ajla Toli A Kuu |
Biɛhi |
---|---|
Nihi Nɛ A Tsuɔ Sanehi A He Ní |
|
Nihi Nɛ A Hyɛɛ Betel Ní Tsuli A Nɔ |
|
Nihi Nɛ A Hyɛɛ Womi Fiami Nɔ |
|
Nihi Nɛ A Hyɛɛ Sɔmɔmi Ní Tsumi Nɔ |
|
Nihi Nɛ A Hyɛɛ Ní Tsɔɔmi Nɔ |
|
Nihi Nɛ A Hyɛɛ Womihi A Ngmami Nɔ |
|