Dɛbi. Yehowa Odasefohi ti si kɛ wui vasin gbumi. Wa naa vasin gbumi kaa nɔ́ ko nɛ Kristofo no fɛɛ Kristofo no maa mwɔ e yi mi kpɔ ngɛ he. Ke a ngɛ vasin ko gbue ɔ, Yehowa Odasefohi fuu kplɛɛɔ nɛ a gbuɔ kɛ haa mɛ.

 Wa hláa hiɔ tsami blɔ nɔ tomi nɛ hi pe kulaa, nɛ wa bua jɔ mɔde nɛ tsopa peeli ngɛ bɔe konɛ a kɛ gbɔ hiɔhi nɛ a ngɛ gbeye ɔ nɔ ɔ he. Wa bua jɔ mɔde nɛ hiɔ tsali ngɛ bɔe, kɛ a he nɛ a kɛ sãa afɔle titli ɔ, ke hiɔ nɛ ngɛ gbeye ko sɛ nimli a kpɛti ɔ hu he wawɛɛ.

 Yehowa Odasefohi bɔɔ mɔde kaa a maa nyɛɛ blɔ tsɔɔmi nɛ hiɔ tsali kɛ haa a se. Kaa nɔ hyɛmi nɔ́ ɔ, kɛ je benɛ COVID-19 hiɔ ɔ ba a, Yehowa Odasefohi kɛ kaimihi babauu fɔ wa wɛbsaiti nɛ ɔ nɔ ngɛ gbihi lafahi abɔ mi kɛ wo nihi he wami konɛ a kɛ blɔ tsɔɔmi nɛ a kɛ haa kɛ kɔɔ he piɛ pomi he ngɛ he nɛ a ngɛ ɔ nɛ tsu ní. Blɔ tsɔɔmi nɛ ɔmɛ nɛ a he hia a ekomɛ ji: nihi a he nɛ wa be sue tsɔ, blɔ tsɔɔmihi nɛ a kɛ ha ngɛ he nya buamihi a he, wa he nɛ wa ma tsɔ banee ke hiɔ ɔ eko sã wɔ, wa dɛ nɛ wa ma fɔ kpamkpam, face mask nɛ wa maa bu, kɛ blɔ tsɔɔmi kpahi nɛ ma nikɔtɔma amɛ kɛ ha a nɛ waa kɛ ma tsu ní.​—Roma Bi 13:1, 2.

 Jehahi babauu ji nɛ ɔ nɛ Yehowa Odasefohi ma sisi tomi mlaahi nɛ nyɛɛ se ɔmɛ a nɔ mi ngɛ a womihi a mi:

•   Nɔ fɛɛ nɔ maa mwɔ lɛ nitsɛ e yi mi kpɔ ngɛ hiɔ tsami sanehi a he.​—Galatia Bi 6:5.

   “[Womi tɛtlɛɛ nɛ ɔ] je we hiɔ tsami blɔ nɔ tomi ko yi kaa lɔ ɔ lɛ hi pe ekpahi, nɛ pi hiɔ tsami he ga womi he womi ji nɛ ɔ hulɔ. Mohu ɔ, yi mi tomi ɔ ji e maa tsɔɔ bɔ nɛ níhi ngɛ ha tutuutu konɛ kaneli nɛ́ a susu níhi a he nɛ́ a mwɔ mɛ nitsɛmɛ a yi mi kpɔ.”​—Awake!, February 8, 1987.

   “Eko ɔ, o ma bi ke: Anɛ e sa nɛ i kɛ ye bimɛ ɔmɛ waa gbu vasin ɔ eko lo? Nɔ fɛɛ nɔ ko maa mwɔ e yi mi kpɔ ngɛ sane nɛ ɔ he.”​—Awake!, August 22, 1965.

•   Wa hláa hiɔ tsami ejakaa wami he jua wa ha wɔ wawɛɛ.​—Ní Tsumi 17:28.

   “Odasefohi bɔɔ mɔde kaa a maa ya nihi nɛ a he be ngɛ hiɔ tsami mi ɔ a ngɔ kɛ ha tsami. A suɔ wami, nɛ a suɔ kaa a maa pee nɔ́ fɛɛ nɔ́ nɛ e he hia, nɛ́ Ngmami ɔ kplɛɛɔ nɔ ɔ konɛ a kɛ baa a wami yi.”​—Hwɔɔmi Mɔ, July 1, 1975.

   “Yehowa Odasefohi a bua jɔ tsopa kɛ hiɔ tsami he. A suɔ kaa a maa hyɛ a he nɔ saminya nɛ a ná nɔmlɔ tso mi he wami kpakpa, konɛ a se nɛ kɛ ngɛ je mi. Kaa bɔ nɛ e ji ngɛ Luka nɛ e ji tsopa peelɔ nɛ e hi si ngɛ Yesu be ɔ mi ɔ blɔ fa mi ɔ, Yehowa Odasefohi hu a kpɛti ni komɛ ji dɔkitahi aloo nɛɛsihi. . . . Yehowa Odasefohi a hɛ saa mɔde nɛ dɔkitahi kɛ nɛɛsihi bɔɔ kɛ tsuɔ ní, kɛ a he nɛ a kɛ sãa afɔle ɔ he wawɛɛ. A bua jɔɔ ke ji kaa dɔkitahi kɛ nɛɛsihi bɔ mɔde kɛ ye bua mɛ nɛ a ná tsami.”​—Hwɔɔmi Mɔ, February 1, 2011.