የሮም መንግሥት በመጀመሪያው መቶ ዘመን በይሁዳ ለነበሩ የአይሁድ ባለሥልጣናት ምን ያህል ሥልጣን ሰጥቶ ነበር?

በወቅቱ ይሁዳ በሮማውያን አገዛዝ ሥር ነበረች፤ ሮማውያን ይሁዳን የሚያስተዳድሩት፣ የራሱ የጦር ሠራዊት ባለው አገረ ገዢ በኩል ነበር። የአገረ ገዢው ዋነኛ ሥራ ለሮም ቀረጥ መሰብሰብ እንዲሁም ሰላምና ፀጥታ ማስፈን ነው። ሮማውያኑ ትኩረት የሚያደርጉት ሕገ ወጥ ድርጊቶች እንዳይፈጸሙ በመከላከልና ረብሻ የሚፈጥሩ ሰዎችን በመቅጣት ላይ ነው። ከዚያ ውጪ ግን ሌሎቹን ዕለታዊ የአስተዳደር ጉዳዮች ለአይሁዳውያን መሪዎች ትተው ነበር።

ሳንሄድሪን የአይሁዳውያን ከፍተኛ ፍርድ ቤት ሲሆን የአይሁድን ሕግ ከሚመለከቱ ጉዳዮች ጋር በተያያዘ አመራር ይሰጥ ነበር። በመላው ይሁዳ ሌሎች የበታች ፍርድ ቤቶች ነበሩ። አብዛኞቹ የፍትሐ ብሔር እና የወንጀል ጉዳዮች የሚታዩት፣ ያለ ሮማውያን መሪዎች ጣልቃ ገብነት በእነዚህ የበታች ፍርድ ቤቶች ሳይሆን አይቀርም። ሮማውያን ለአይሁድ ፍርድ ቤቶች ያልሰጡት አንዱ ኃላፊነት ወንጀለኞችን በሞት መቅጣት ነው፤ በአብዛኛው ይህን የማድረግ ሥልጣን የነበራቸው ሮማውያኑ ናቸው። ከዚህ የተለየ አሠራር የታየው፣ የሳንሄድሪን ሸንጎ አባላት በእስጢፋኖስ ላይ ለመፍረድ በተሰየሙበትና በድንጋይ ተወግሮ እንዲገደል ባደረጉበት ጊዜ ነው።—ሥራ 6:8-15፤ 7:54-60

ስለሆነም የአይሁዳውያኑ የሳንሄድሪን ሸንጎ ብዙ ነገሮችን የማስፈጸም ሥልጣን ነበረው። ኤሚል ሹረር የተባሉ አንድ ምሁር እንደተናገሩት “[በሸንጎው] ሥልጣን ላይ የተጣለው ትልቁ ገደብ ሮማውያን ባለሥልጣናት በማንኛውም ጊዜ ተነስተው አንድን የፍርድ ሂደት ራሳቸው ለመመልከት ሊወስኑ መቻላቸው ነው፤ ለምሳሌ ወንጀሉ ፖለቲካዊ ይዘት እንዳለው ከጠረጠሩ እንዲህ ያደርጉ ነበር።” ሮማዊው ሻለቃ ቀላውዴዎስ ሉስዮስ፣ የሮም ዜግነት የነበረውን ሐዋርያው ጳውሎስን በቁጥጥር ሥር ባዋለው ጊዜ እንዲህ ያለ ነገር አጋጥሟል።—ሥራ 23:26-30