ሚያዝያ 1, 2024
ሩሲያ

“እጅ መስጠት አማራጭ አይደለም”

አጫውት

በካባሮቭስክ ግዛት የሚገኘው የኒኮላዬቭስክ ኦን አሙር ከተማ ፍርድ ቤት፣ በወንድም ኢጎር ክሌትኪን፣ በወንድም ኒኮላይ ኮኖኔንኮ እና በእህት ናዴዥዳ ኮሮቦችኮ ክስ ላይ በቅርቡ ውሳኔ እንደሚያሳልፍ ይጠበቃል። አቃቤ ሕጉ እንዲተላለፍባቸው የሚፈልገውን ብይን ገና አላሳወቀም።

አጭር መግለጫ

ኢጎር ክሌትኪን

ትውልድ፦ 1961 (ኒኮላዬቭስክ ኦን አሙር)

ግለ ታሪክ፦ ሹፌር ነበር

እናቱ በአደጋ ምክንያት ሽባ ሆነች፤ በዚህም የተነሳ ክፉ ነገሮች የሚደርሱት ለምን እንደሆነ ጥያቄ ተፈጠረበት። ከመጽሐፍ ቅዱስ ግልጽ መልስ ሲያገኝ ተደሰተ። በ1999 ተጠምቆ የይሖዋ ምሥክር ሆነ

የሰጠው ሐሳብ

በዚህ አስቸጋሪ ጊዜ አዎንታዊ ሆነህ እንድትቀጥል የረዳህ ምንድን ነው?

ከስደቱ በፊት የነበረኝ ሕይወት ሌላ፣ ከስደቱ በኋላ ደግሞ ሌላ እንደሆነ አይሰማኝም። ከዚህ ይልቅ ይህ ሁኔታ በራሱ ለይሖዋ የማቀርበው አገልግሎት ክፍል እንደሆነ ነው የሚሰማኝ። ዮሐንስ 15:20 ላይ የሚገኘውን “እኔን ስደት አድርሰውብኝ ከሆነ እናንተንም ስደት ያደርሱባችኋል” የሚለውን ሐሳብ ሁሌም ለማስታወስ ጥረት አደርጋለሁ። ለእኔ እጅ መስጠት አማራጭ አይደለም። እንዲህ ባደርግ ይሖዋን፣ ኢየሱስን እንዲሁም ወንድሞቼንና እህቶቼን መካድ ይሆንብኛል። ለሌሎች ጥሩ ምሳሌ ለመሆን ቆርጫለሁ።

ናዴዥዳ ኮሮቦችኮ

ትውልድ፦ 1943 (ሻክቲ፣ ሮስቶቭ ክልል)

ግለ ታሪክ፦ የሒሳብ ባለሙያ ነበረች። ለአካለ መጠን የደረሱ አራት ልጆች አሏት

መጽሐፍ ቅዱስን ብታነብም ሐሳቡን በራሷ መረዳት ይከብዳት ነበር። ከይሖዋ ምሥክሮች ጋር ማጥናት ጀመረች። ስለ አምላክ እና ስለ ባሕርያቱ ስትማር ተደሰተች። በ1996 ተጠመቀች

የሰጠችው ሐሳብ

በዚህ ከባድ ሁኔታ ማለፍሽ ስለ ይሖዋ ምን አስተምሮሻል?

ይህ ተሞክሮ ያስተማረኝ ነገር ቢኖር ይሖዋ የደረሰብኝን ነገር ብቻ ሳይሆን ችግሩ የሚያሳድርብኝን ስሜትም እንደሚረዳ ነው። ከዚያም በወቅቱ የሚያስፈልገኝን እርዳታ ያደርግልኛል። ትኩረቴን መሰብሰብና አጥርቼ ማሰብ ስቸገር ይሖዋ ሰላም ይሰጠኛል። በወቅቱ የሚጠቅመኝን የመጽሐፍ ቅዱስ ጥቅስ እንዳስታውስ ይረዳኛል። ፈተናው በከበደ መጠን የይሖዋ መንፈስ እየደገፈኝ እንደሆነ ይበልጥ ይሰማኛል፤ ይህን ሳይ ደግሞ በይሖዋ ላይ ያለኝ ትምክህት ይጨምራል።

ይሖዋ የሚታመኑበትን እና “አንተ አምላኬ ነህ” የሚሉትን ሁሉ በፍቅር ስለሚንከባከብና ስለሚደግፋቸው እናመሰግነዋለን።—መዝሙር 31:14

የክሱ ሂደት

ጥቅምት 11, 2021

የኢጎር እና የናዴዥዳ ቤቶች ተፈተሹ። ኢጎር ጣቢያ እንዲያድር ተደረገ
ጥቅምት 12, 2021

ናዴዥዳ ምርመራ ተደረገባት
ጥቅምት 13, 2021

ኢጎር ከጣቢያ ተለቀቀ
ጥቅምት 14, 2021

ኢጎር እና ናዴዥዳ የጉዞ ገደቦች ተጣሉባቸው
መስከረም 27, 2022

ኒኮላይ የጉዞ ገደቦች ተጣሉበት
ጥር 16, 2023

ክሳቸው በፍርድ ቤት መታየት ጀመረ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች