Амазон ҹәнҝәлликләринин дүз ортасында Јеһованын Шаһидләринин јени, мөһтәшәм Конгрес залы дурур. Бразилијанын Манаус шәһәриндән шималда јерләшән 52 һектарлыг әразинин әксәр һиссәси мешәликдир. Рәнҝбәрәнҝ макаолар, туканлар вә башга гушлар купуасу, нәһәнҝ Бразилија фындығы вә анҝелим педра ағаҹларынын башында ҹәһ-ҹәһ вурур. Мараглыдыр, ҝөрәсән, Конгрес залыны нијә мәһз бурада тикибләр?

Тәхминән ики милјон әһалиси олан Манаус шәһәри Амазон чајынын мәнсәбиндән 1450 километр аралыда јерләшир. Јени зал Манаус вә әтраф шәһәрләрдә, еләҹә дә Амазон чајы вә чајын голлары боју гәсәбәләрдә јашајан тәхминән 7000 Јеһованын Шаһиди үчүн нәзәрдә тутулуб. Ән уҹгар шәһәр Сан-Габриел-да-Кашуејра Манаусдан тәхминән 800 километр гәрбдә јерләшир. Залда кечирилән конгресдә иштирак етмәк үчүн бәзи Јеһованын Шаһидләри гајыгла үч ҝүн јол ҝәлирләр!

Амазон бөлҝәсинин ортасында Конгрес залы тикмәк елә дә асан иш дејилди. Залы тикмәк үчүн 13 контејнер тикинти материалы Сантус лиманындан (Сан-Паулу) дашынараг Бразилија саһили бојунҹа дәнизлә, сонра исә Амазон чајы илә иншаат јеринә ҝәтирилмишди.

Бу, Бразилијада тикилмиш 27-ҹи Конгрес залыдыр. 2014-ҹү ил мајын 4-ү, базар ҝүнү залын ачылыш мәрасиминдә 1956 нәфәр иштирак етмишди. Мәрасимдә иштирак едәнләрин чоху биринҹи дәфә иди ки Конгрес залында кечирилән ҝөрүшдә иштирак едирди, одур ки, севинҹләринин һәдди-һүдуду јох иди.

Ҹамаат нәинки натиги ешидә, һәтта ҝөрә дә билирди. Әввәл конгресләр елә јерләрдә кечирилирди ки, ҹамаат нә сәһнәни, нә дә натиги ҝөрә билмирди. Јеһованын Шаһидләриндән бири дејир: «Узун илләрдир ки, конгресләрдә иштирак едирәм, амма һеч вахт тамашаја баха билмәмишәм, анҹаг сәсини ешитмишәм». Бәли, инди һәр кәс сәһнәни јахшы ҝөрә билир.