15 јанвар 2014-ҹү ил Серж Жерард дәһшәтли һадисә илә гаршылашанда автобусла Јеһованын Шаһидләринин Парис (Франса) јахынлығында кечирилән конгресинә ҝедирди. О ҝөрдүкләрини бөлүшүр: «Машын көрпүнүн кәнарында олан бетон бәндә зәрбә илә дәјди, һавада фырланараг башыүстә јерә чырпылды вә алышыб-јанмаға башлады».

Серж 40 илдән чох јанғынсөндүрән ишләјиб. Јанғынсөндүрән бригадасынын командири кими о, һадисәјә дәрһал мүдахилә едир. Серж хатырлајыр: «Јолун әкс тәрәфи илә ҝетмәјимизә бахмајараг, тез сүрүҹүјә автобусу сахлатдырыб, јанан машына тәрәф гачдым. Серж кимләринсә «Көмәк един, көмәк един!» — дејә гышгырдығыны ешитди. О дејир: «Мән галстук тахмыш вә костјум ҝејинмишдим. Үстүмдә тәһлүкәсизлик үчүн олан әшјалардан һеч бири јох иди. Лакин ешитдијим гышгырыг сәсләри мәнә дејирди ки, онларын һәлә дә хилас олмаг шанслары вар!»

Серж машынын әтрафына бојлананда горху бүрүмүш сәрнишини ҝөрдү вә ону тәһлүкәсиз јерә чыхартды. Серж дејир: «О, мәнә деди ки, машында даһа ики нәфәр вар. Бу вахт јолла ҝедән башга машынлар да дајанды. Алов даһа да ҝүҹләнмәјә башладығындан инсанлар ора јахынлаша билмирдиләр».

Бир нечә јүк машынынын сүрүҹүләри јанғынсөндүрән балонларла ҝәлдиләр. Онлар Сержин ҝөстәриши илә јанғыны сөндүрмәјә башладылар вә јанғын бир аз сәнҝиди. Сүрүҹү машынын алтында галмышды. Серж вә диҝәрләри машыны галдырыб сүрүҹүнү дартыб чыхардылар.

Серж давам едир: «Бу мәгамда јанғын јенидән аловланды. Анҹаг ичәридә адам галмышды. Үстәлик, тәһлүкәсизлик кәмәри дә бағлы иди. Сонра башга бир нөвбәдәнкәнар јанғынсөндүрән ҝәлиб чатды. О, мотосиклетчиләр кими ҝејинмишди. Серж дејир: «Мән изаһ етдим ки, машын партламаг үзрәдир. Беләликлә, гәрара алдыг ки, кишини голларындан сүрүјүб чыхардаг. Белә дә етдик». Бир дәгигә кечмәди ки, машын партлады.

Јанғынсөндүрмә бригадасы вә һәкимләр ҝәләндә онлар алову сөндүрмүш вә зәрәрчәкәнләрә исә лазыми јардым ҝөстәрмишдиләр. Сержин кәсилән вә јанан әлинә илк јардым ҝөстәрилди. О, конгресә ҝетмәк үчүн автобуса минәндә бир нечә киши гача-гача ҝәлиб она тәшәккүр етди.

Серж орада олуб көмәк едә билдији үчүн чох севинир. «Мән онларын һәјатлары үчүн Јеһова гаршысында мәсулијјәт һисс етдим. Онлара сағ галмагда көмәк едә билдијим үчүн чох хошбәхтәм».