Клиник үлем кисергән кешеләрҙең күбеһе үҙ тәненән айырылғаны, сағыу яҡтылыҡ күргәне йәиһә иҫ китерлек гүзәл урында булғаны хаҡында һөйләй. «Үлгәндән һуң хәтерләүҙәр» тигән китапта әйтелгәнсә, ҡайһы берәүҙәргә «теге донъяның бер өлөшөн күреү» мөмкинлеге тейгән («Recollections of Death»). Изге Яҙмала ундай осраҡтар хаҡында әйтелмәй, шулай ҙа унда клиник үлем кисергән кешеләрҙең күргәндәре «теге донъя» күренештәре түгел икәнен раҫлаусы мөһим хәҡиҡәт бар.

 Үлгәндәр бер ни ҙә белмәй, бер ни ҙә тоймай.

Изге Яҙмала «үлеләр бер нәмә лә белмәй» тиелгән (Вәғәзсе 9:5). Үлгәс, кеше «теге донъяға» китмәй, ул йәшәүҙән туҡтай. Кеше үлһә лә, уның үлемһеҙ йәне йәшәүен дауам итә тигән тәғлимәт Изге Яҙмаға нигеҙләнмәгән (Йәзәкил 18:4). Шуға күрә клиник үлем хәлендәге кешеләр күргән күренештәр һис тә күктәге ожмах, тамуҡ йә «теге донъя» күренештәре түгел.

 Лазарь нимә һөйләгән?

Изге Яҙмала Лазарь тигән кешенең үлгәне, һәм дүрт көндән һуң Ғайса Мәсихтең уны терелткәне хаҡында әйтелә (Яхъя 11:38—44). Әгәр Лазарь «теге донъяға» күскән булһа, Ғайсаның уны яңынан ергә ҡайтарыуы мәрхәмәтһеҙлек булыр ине. Ләкин Изге Яҙмала, үлгәс күргәндәре хаҡында Лазарь ни ҙә булһа һөйләгән, тип әйтелмәй. Әгәр ул ниҙер күргән булһа, һис шикһеҙ, һөйләр ине. Әммә шуныһы иғтибарға лайыҡ: Ғайса Лазарҙың үлемен йоҡо менән сағыштырған. Тимәк, үлеп ятҡан сағында Лазарь бер ни ҙә белмәгән һәм бер ни ҙә һиҙмәгән (Яхъя 11:11—14).