A B C D E F G H I J K L M N O P R S T U W Z

A

• Ab.

  Dung kaluar sian Babel, on ma goar ni bulan na palimahon di kalender Jahudi, jala goar ni bulan na pasappulu sadahon di kalender umum. Molo saonari, sarupa ma on tu parsitongaan ni bulan Juli sahat tu parsitongaan Agustus. Dang dipaboa goar ni bulan on di Bibel. Alai di Bibel didok do on “bulan na palimahon.” (4Mus 33:38; Esr 7:9)​—Ida Lampiran B15.

• Abdon.

  Dang sada inganan on. Olo do ra na nidokna bakke ni jolma naung busuk jala naung marcampur dohot tano.

• Abib.

  Mulana, on goar ni bulan na parjolo di kalender Jahudi, jala goar ni bulan pitu di kalender umum. Molo saonari, dimulai ma i sian parsitongaan ni bulan Maret sahat tu parsitongaan April. Lapatan ni hata on i ma, “Parbue na ijo” (sian gandum manang barli). Dung mulak halak Jahudi sian Babel, gabe bulan Nisan ma goar ni bulan on. (5Mus 16:1)​—Ida Lampiran B15.

• Abit Goni.

  Kain na kasar na ditonun sian ibbulu ni hambing. On dipakke gabe inganan ni gandum manang barli. Jala dipakke do on lao patuduhon na marlungun ni roha sasahalak.​—1Mus 37:34; Luk 10:13.

• Abyssos.

  Hata sian bahasa Junani lapatanna, “inganan na massai bagas” manang “dang tardodo, jala dang adong batasna”. Di Akka Bukku Junani Kristen dipakke do on lao paboahon inganan manang situasi na mambahen tarhurung. Misalna kuburan manang inganan na asing na songon i.​—Luk 8:31; Rom 10:7; Pgk 20:3.

• Adar.

  Dung kaluar sian Babel, on ma goar ni bulan 12 di kalender Jahudi, jala goar ni bulan 6 di kalender umum. Molo saonari, dimulai ma i sian parsitongaan ni bulan Februari sahat tu parsitongaan Maret. (Esr 3:7)​—Ida Lampiran B15.

• Akaya.

  Molo di Akka Bukku Junani Kristen, Akaya i ma goar ni provinsi di Rom, ibukotana i ma Korint. (Ul 18:12)​—Ida Lampiran B13.

• Alaman.

  Inganan na so maratap na dipagari di sakaliling ni tabernakel manang di sakaliling ni bagas joro. Di alaman ni tabernakel dohot di alaman ni bagas joro do langgatan manutung pelean. (Ida Lampiran B5, B8, B11.) Adong do muse alaman ni jabu dohot istana na disurat di Bibel.​—2Mus 8:13; 27:9; 1Raj 7:12; Est 4:11; Mat 26:3.

• Alamot.

  Istilah musik na lapatanna, “Akka Anak Boru” manang “Borua na Poso”. Olo do ra na nidokna soara sopran ni anak boru. Jala olo do ra dipakke hata on gabe tanda asa timbo soara ni sasahalak tikki marende manang tikki marmusik.​—1Kron 15:20; Ps 46: Sup, surat na di toru.

• Alat pamatehon api.

  Alat on dipakke di tabernakel dohot di bagas joro. Alat on dibahen sian mas manang tombaga, mirip do on songon gusting na dipakke pamatehon sumbu ni api.​—2Raj 25:14.

• Alpa dohot Omega.

  Huruf na parjolo dohot na parpudi di bahasa Junani. Tolu hali ma hata “Alpa dohot Omega” dibahen di bukku Pangungkapon lao mandok tu Debata. Hata Alpa dohot Omega na disi sarupa do lapatanna tu hata “na parjolo dohot na parpudi” dohot tu hata “mulana dohot ujungna”.​—Pgk 1:8; 21:6; 22:13.

• Ambalang.

  Tali na sian kulit, urat ni binatang, dakka ni hau, manang sian ibbulu ni binatang. Dipakke do on lao manapatton batu manang na asing. Di tonga-tongana ma dibahen batu i. Sada ujung ni ambalang i, diikkatton tu tangan, jala sada nai ujungna ditiop asa boi diayunhon jala disappatton. Dipakke akka tentara do on najolo lao marporang.​—Pangh 20:16; 1Sam 17:50.

• Amen.

  Lapatanna, “masa ma songon i” manang “tutu”. Sian bahasa Heber do hata on, i ma aman, lapatanna “setia, boi dihaporseai”. Didok do “amen” molo sapandapot sasahalak tu sada parjanjian, tu tangiang, manang tu sada hata. Di bukku Pangungkapon, dipakke do hata on gabe gelar ni Jesus.​—5Mus 27:26; 1Kron 16:36; Pgk 3:14.

• Anak ni jolma.

  Di Injil adong hira-hira 80 hali hata on disurat jala gelar ni Jesus do on. Sian on taboto, jolma do Jesus tikki di tano on. Hata on pe patuduhon nungnga digohi Jesus be isi ni Daniel 7:​13, 14. Di Akka Bukku Heber, dipakke do hata on gabe gelar ni si Hesekiel dohot si Daniel. Sian on taboto, jolma do nasida jala boi mate.  Imbar do nasida tu Debata na mangalehon barita sipasahaton ni nasida.​—Hes 3:17; Dan 8:​17; Mat 19:28; 20:28.

• Anak ni si Aron.

  Akka pinoppar ni si Aron na martugas gabe malim di tabernakel dohot di bagas joro. Pahoppu ni si Lepi do si Aron. Jala dukkon dibahen Patik ni si Musa, si Aron ma na gabe sintua ni malim na parjolo.​—1Kron 23:28.

• Anak ni si Daud.

  Gelar na jotjot dipakke lao mandok Jesus. Gelar on patuduhon molo Jesus do ahli waris ni parjanjian Harajaon naung leleng dipaboa. Ai nungnga dipaboa hian, sian pinoppar ni si Daud do halak na lao gabe ahli waris ni parjanjian i.​—Mat 12:23; 21:9.

• Anak siakkangan.

  Anak na parjolo sian bapakna (dang sian omakna). Di Bibel, anak siakkangan ma na mandapot hasangapon di keluargana. Ibana ma na manguluhon keluarga, molo dung mate bapakna. Jala molo tu binatang didok do on anakna na parjolo tubu.​—2Mus 11:5; 13:12; 1Mus 25:33; Kol 1:15.

• Antikristus.

  Di bahasa Junani adong dua lapatanna. Na parjolo, boi do lapatanna anti manang mangalo tu Kristus. Boi do muse lapatanna Kristus palsu, i ma halak na mandok dirina Kristus. Antikristus, i ma sude halak manang organisasi na margabus mandok dirina suruan ni Kristus, na mandok dirina Messias manang na mangalo Kristus dohot siseanna.​—1Joh 2:22.

• Apostel.

  Lapatan ni hata on, “halak na disuru”. Dipakke do hata on tu Jesus dohot tu halak na disuru lao mangurupi na asing. Alai unjotjot do hata on dipakke tu sisean ni Jesus na 12 i.​—Mrk 3:14; Ul 14:14.

• Aram, Halak Aram.

  Pinoppar ni si Sem anak ni si Aram na tinggal di luat mulai sian inganan na mardolok-dolok di Lebanon sahat tu Mesopotamia, dohot mulai sian inganan na mardolok-dolok di Taurus na di sabola utara sahat tu Damaskus na di selatan. On ma luat na di bahasa Heber digoari Aram, alai di pudian ni ari dibahen ma goarna gabe Siria, jala pendudukna digoari do halak Siria.​—1Mus 25:20; 5Mus 26:5; Hos 12:12.

• Areopagus.

  Sada dolok na timbo di Atena, di timur ni Akropolis. Jala i do muse goar ni pengadilan di luat i. Diboan akka na mangihutton ajaran Stoa dohot Epikurus do si Paulus tu inganan i lao patorakkon taringot ajaran na dihaporseai ibana.​—Ul 17:19.

• Ari Pangaradeon.

  Goar ni ari andorang so ari Sabat. Di ari i, halak Jahudi paradehon akka na porlu tu Sabat. Marujung ma Ari Pangaradeon i di ari Jumat botari, dung i ari Sabat ma. Alana di halak Jahudi, di tikki botari do ujung ni ari jala mula ni ari.​—Mrk 15:42; Luk 23:54.

• Ari Panguhuman.

  Ari ni Debata manguhumi sada bangso manang sude jolma. Di ari i, dipamate Debata do halak na didok rohana ikkon dipamate. Alai dilehon do hangoluan na salelengna tu halak na pilnillitna. Dipaboa Jesus tu siseanna, na lao masa do “Ari Panguhuman” tu akka halak na mangolu dohot na mate. On masa di ari na naeng ro.​—Mat 12:36.

• Ari Pardamean.

  On ma ari na massai rikkot jala na badia di halak Israel. Didok do on muse Yom Kippur (sian bahasa Heber yohm hakkippurim, na lapatanna “ari lao manutup”). Ari pardamean on dibahen di tanggal 10 bulan Etanim. Holan di ari on ma sintua ni malim boi masuk tu Inganan na Massai Badia na di tabernakel dohot di pudi ni bagas joro. Di tikki i, dilehon ibana ma mudar na gabe pelean asa disesa dosana, dosa ni halak Lepi, dohot dosa ni bangso i. Di ari i, ikkon marpungu nasida manomba Debata jala marpuasa. Didok do muse ari on ari Sabat. Di ari i dang boi nasida karejo.​—3Mus 23:27, 28.

• Ari parpudi.

  Di Bibel, hata “ujung ni akka ari” manang akka hata na dos tusi, patuduhon na lao masa nama akka hata naung dipaboa hian di Bibel. (Hes 38:16; Dan 10:14; Ul 2:17) Mangihutton na disurirangkon, boi do on masa saleleng piga-piga taon manang lobi. Na unjotjot didok di Bibel, i ma “ari parpudi” ni jaman on, na masa saleleng haroro ni Jesus na so boi taida.—2Tim 3:1; Jak 5:3; 2Ptr 3:3.

• Armagedon.

  Sian bahasa Heber Har Meghiddohn, lapatanna “Dolok Megiddo”. Dipakke do hata i lao patuduhon “porang di ari na balga, i ma ari ni Debata na Sun Hinagogo i” tikki dipapungu “akka raja” na di tano on lao marporang mangalo Jahowa. (Pgk 16:14, 16; 19:11-21)​—Ida HASUSAAN BOLON.

• Asasel.

  Goar sian bahasa Heber. Olo do ra lapatanna, “Hambing na Mago”. Tikki Ari Pardamean, dipalua do hambing naung  ditottuhon lao tu Asasel. Dipalua do hambing i tu gurun lao manggombarhon na diboan hambing i do dosa na diulahon bangso i di taon naung salpu.​—3Mus 16:8, 10.

• Aselgeia.​—

  Ida ULAON NI HALAK NA SO UMBOTO ILA.

• Asi ni roha na massai balga.

  Lapatan ni hata on di bahasa Junani, i ma na pasonakkon roha manang na palongang roha. Jotjot do hata i dipakke lao patuduhon hadiah na dilehon sian ias ni roha. Molo asi ni roha ni Debata do na ditaringoti, hata i manggombarhon silehon-lehon na sian Debata. On patuduhon silehon-lehon na massai balga, na dilehon sian nasa roha jala dang diharappon asa dibalos. Alai dipatudu Debata do asi ni rohana on alani holongna dohot burjuna tu jolma. Hata “asi ni roha na massai balga”, boi do diterjemahon gabe “sumbangan”. Dang ala na burju halak na manjalo sumbangan i umbahen na dilehon i tu ibana. Alai na mangalehon sumbangan i do na burju.​—2Kor 6:1; Eps 1:7.

• Asia.

  Di Akka Bukku Junani Kristen, on ma goar ni sada provinsi di Rom na saonari gabe bagian barat ni Turki, dohot ma i akka pulo songon Pulo Samos dohot Pulo Patmos jala Epesus ma ibukotana. (Ul 20:16; Pgk 1:4)​—Ida Lampiran B13.

• Asta.

  Ukkuran na ganjangna hira-hira mulai sian sikku sahat tu jari tengah. Asta na somal dipakke halak Israel i ma 44,5 sentimeter (17,5 inci). Alai somal do nasida mamakke asta na ganjang hira-hira 51,8 sentimeter (20,4 inci). Hira-hira ungganjang ma on sada talapak ni tangan sian asta na somal. (1Mus 6:15; Luk 12:25; surat na di toru)​—Ida Lampiran B14.

• Astarot.

  Debata porang dohot kesuburan na disomba halak Kanaan, i ma istri ni debata Baal.​—1Sam 7:3.

• Auga.

  Hau na dibahen di pundak ni sasahalak lao mamboan boban na targattung di ujung ni hau i. Manang hau na dibahen di rukkung ni binatang lao manarik bajak di hauma. Ala hatoban do na jotjot mamakke auga lao mamboan barang na borat, gabe dipakke ma hata auga manggombarhon halak na gabe hatoban, na marsitaonon, dohot na susa. Molo didok, dibolokkon manang diponggol auga, lapatanna dipalua. Dang be gabe hatoban sasahalak jala dang susa be ibana.​—3Mus 26:13; Mat 11:29, 30.

B

• Baal.

  Debata ni halak Kanaan na didok nappuna langit, na parohon udan jala na mangalehon pinoppar. Hata “Baal” dipakke do muse tu akka debata na asing. Di bahasa Heber lapatanna, “Nappuna” manang “Tuan”.​—1Raj 18:21; Rom 11:4.

• Badia.

  Jotjot do hata badia ditujuhon tu Jahowa. Badia lapatanna, marparange na ias. (2Mus 28:36; 1Sam 2:2; Joh 17:11) Sipata dipakke do hata badia tu jolma (Mrk 6:20; Ul 3:21), tu barang (Rom 7:12; 11:16; 2Tim 3:15), tu inganan (Mat 4:5; Ul 7:33; Heb 9:1), dohot tu ulaon (2Mus 36:4). Molo di bahasa Heber, lapatanna na dipapulik manang na diparade lao dipelehon tu Debata na badia, manang na dipapulik lao marhobas tu Jahowa. Molo di Akka Bukku Junani Kristen diterjemahon do on gabe badia, manang dipapulik lao tu Debata. Hata on pe patuduhon parniulaon manang pangalaho na denggan.​—Mrk 6:20; 2Kor 7:1; 1Ptr 1:15, 16.

• Bagas joro.

  Sada bangunan na di Jerusalem. Disi do halak Israel marpungu lao manomba Debata. Bagas joro ma gatti ni tabernakel na diboan halak Israel marpinda-pinda. Bagas joro na parjolo dipajongjong si Salomo, alai diruppakkon halak Babel ma i. Bagas joro na paduahon dipajongjong si Serubabel dung mulak halak Israel sian Babel. Di pudian ni ari, dipadenggan si Herodes Agung ma i muse. (Esr 1:3; 6:14, 15; 1Kron 29:1; 2Kron 2:4; Mat 24:1)​—Ida Lampiran B8 dohot B11.

• Bahasa Aram.

  Bahasa on mirip songon bahasa Heber jala mamakke huruf na sarupa. Mulana halak Aram do na mamakke bahasa on, alai di pudian ni ari dipakke do on di pamarettaon ni Asiria dohot Babel tikki martiga-tiga nang makkatai. Dipakke do muse bahasa on di pamarentaon ni Persia. (Esr 4:7) Di bahasa Aram do disurat bukku Esra, Jeremia, dohot Daniel.​—Esr 4:8–6:18; 7:12-26; Jer 10:11; Dan 2:4b–7:28.

• Barani makkatai.

  Sian bahasa Junani parresia, lapatanna dang mabiar jala takkas paboahon taringot tu haporseaon ni halak Kristen. Hata on pe patuduhon na adong pos ni roha, habaranion jala dang mabiar marale-ale tu Debata. Jala hata on pe patuduhon pakkilalaan ni sasahalak taringot tu parale-aleonna tu Debata.

•  Barita na uli;

  Marbarita na uli. Di Akka Bukku Junani Kristen, hata “barita na uli” dipakke lao patuduhon barita na uli taringot tu Harajaon ni Debata dohot taringot tu haluaon na didapot akka halak molo porsea tu Jesus Kristus.​—Luk 4:18, 43; Ul 5:42; Pgk 14:6.

• Bat.

  Alat lao mangukkur cairan. Mangihutton penemuan sian akka barang na didok bat, dos do on tu 22 liter. Godangan akka ukkuran na dipaboa di Bibel, i ma ukkuran ni cairan manang ukkuran ni gandum manang barli. Dibahen do i mangihutton perkiraan sada bat dos tu 22 liter. (1Raj 7:38; Hes 45:14)​—Ida Lampiran B14.

• Batu gilingan.

  Batu na bulat na dibahen di ginjang ni batu na asing na dipakke lao mambahen topung. Di tonga-tonga ni batu na asing i adong sada hau na dibahen gabe hira sumbu tu batu gilingan i. Adong do muse batu gilingan na balga na diputar binatang. Di Bibel, jotjot do batu gilingan on dipakke akka borua mambahen roti. Alani i, di Patik ni si Musa diorai do mambuat batu gilingan lao gabe jaminan.​—5Mus 24:6; Mrk 9:42.

• Batu oniks.

  Batu na arga, batu akik na karas, manang batu kalsedon na marbolang-bolang. Adong do lapisan na marbolang-bolang di batu oniks on jala marwarna-warni. Adong na birong, na coklat, na merah, na abu-abu, manang na ijo. Dipakke do batu on di baju na dipakke sintua ni malim.​—2Mus 28:9, 12; 1Kron 29:2; Job 28:16.

• Batu parsuhi-suhi.

  Batu na dibahen di suhi-suhi ni bangunan lao pasadahon dua dinding. Somalna, batu na massai pir do na dipakke lao mambahen tembok ni kota. Lao manoppa tano on, hira na dipakke Debata ma batu parsuhi-suhi na rumikkot. Jala digoari do Jesus “batu parsuhi-suhi na gabe fondasi” tu huria Kristen, na dipatudos songon jabu na dipajongjong marhite-hite tondi parbadia.—Eps 2:20; Job 38:6.

• Belsebul.

  Goar na dibahen tu Sibolis manang pamimpin ni suru-suruan na jahat. Olo do ra goar on ditiru sian goar ni Baal-zebub, i ma debata Baal na disomba halak Palistim di Ekron.​—2Raj 1:3; Mat 12:24.

• Bintang manogot.

  Bintang na parpudi tarida di sabola timur andorang so bissar dope mataniari. On ma na gabe tanda na lao margatti nama ari.​—Pgk 22:16; 2Ptr 1:19.

• Borngin Parningotan ni Tuan.

  Sada ulaon lao marningot hamamate ni Kristus. Di ulaon i, diparade do roti na so marragi dohot anggur na manggombarhon daging dohot mudar ni Kristus. Di Bibel, disuru do halak Kristen asa mangulahon ulaon on. Alani i ma ulaon on didok “Parningotan”.​—1Kor 11:20, 23-26.

• Boru-boru na so hasea.

  Halak na mangulahon seks tu na so dongan saripena asa mandapot hepeng. (Bahasa Junani ni boru-boru na so hasea, i ma porne, lapatanna “manjual”.) Di Patik ni si Musa, diorai do halak mangulahon seks tu na so dongan saripena. Hepeng na dapotna sian ulaon sisongon i dang boi dipelehon tu Jahowa. Alai massai imbar do on tu akka halak na manomba debata na so sittong. Dibahen nasida do akka boru-boru na so hasea gabe dalan ni nasida mandapot hepeng. (5Mus 23:17, 18; 1Raj 14:24) Di Bibel, hata “boru-boru na so hasea” dipakke lao manggombarhon halak manang organisasi na manomba akka patung, hape mangakku manomba Debata. Uppamana, di bukku Pangungkapon dipatudos do organisasi agama na digoari “Babel na Balga” songon boru-boru na so hasea. Ai marale-ale do nasida tu akka pamaretta lao mangalului hamoraon dohot huaso.​—Pgk 17:1-5; 18:3; 1Kron 5:25.

• Bul.

  Goar ni bulan na paualuhon di kalender Jahudi, jala bulan na paduahon di kalender umum. Hata on lapatanna, “hasil”. Molo dipatudos tu saonari, dimulai ma i sian parsitongaan ni bulan Oktober sahat tu parsitongaan ni bulan November. (1Raj 6:38)​—Ida Lampiran B15.

• Bulan baru.

  Ari na parjolo di ganup bulan ni halak Jahudi. Marpungu ma nasida di ari i, rap mangan jala mamelehon pelean. Di pudian ni ari, gabe sada perayaan ma i dibahen di sude luat i jala dang karejo sude halak di ari i.​—4Mus 10:10; 2Kron 8:13; Kol 2:16.

• Bura.

  Mamburai lapatanna mandok asa masa na so denggan tu sasahalak. Dang sarupa hata bura tu hata na kasar. Molo sian Debata hata bura i, i lapatanna akka na so denggan na lao masa jala pasti masa do i.​—1Mus 12:3; 4Mus 22:12; Gal 3:10.

C

• Cincin cap.

  Jenis ni materai na dibahen gabe cincin manang gabe kalung. Didok do tong on cincin tanda. Jala dipakke do on gabe tanda ni sasahalak na gabe parhuaso  ni sada luat. (1Mus 41:42)​—Ida MATERAI; SEGEL.

D

• Dagon.

  Debata ni halak Palistim. Dang taboto sian dia do goar on dibahen. Alai piga-piga pakar mandok adong do hubungan ni hata on tu hata di bahasa Heber i ma dagh (dekke).​—Pangh 16:23; 1Sam 5:4.

• Dalan ni Tuan.

  Hata on dipakke lao mandok halak na mangihutton Jesus. Alana, toktong do ditiru nasida Jesus, jala ikkon sesuai do sude na diulahon nasida tu haporseaon ni nasida tu Jesus.​—Ul 19:9.

• Darik.

  Hepeng logam na sian mas, na dipakke halak Persia. Boratna 8,4 gram. (1Kron 29:7)​—Ida Lampiran B14.

• Datu.

  Halak na mamareso parhusor ni mataniari, bulan, dohot akka bintang lao mamboto na masa tu ari na naeng ro.​—Dan 2:27; Mat 2:1.

• Debata na sittong.

  On ma terjemahan ni hata “Debata” sian bahasa Heber. Jotjot do dipakke istilah “Debata na sittong” lao patuduhon holan sasada Jahowa do Debata na sittong jala imbar Ibana sian akka debata asing na so sittong. “Debata na sittong” ma hata na pas lao manerjemahon bahasa Heberna.​—1Mus 5:22, 24; 46:3; 5Mus 4:39.

• Dekapolis.

  Punguan ni akka kota Junani. Mulana sappulu kota do na didok dekapolis. Alana on sian bahasa Junani. Hata deka, lapatanna “sappulu”, jala polis, lapatanna “kota”. Dibahen do muse goar ni akka luat na di sabola timur ni Laut Galilea dohot Sunge Jordan dekapolis, ai disi do inganan ni akka kota i. On ma pusat ni kebudayaan Junani dohot inganan lao martiga-tiga. Lewat do nian Jesus sian luat on alai dang adong dipaboa di Bibel na lao Jesus tu akka kota dekapolis i. (Mat 4:25; Mrk 5:20)​—Ida Lampiran A7 dohot B10.

• Delima.

  Buah na bentukna songon appel. Di ujungna adong na songon mahkota. Karas do kulitna, alai di bagasan adong butiran-butiran na adong aekna jala tabo allangon. Warnana merah jambu manang na merah. Di rompi ni sintua ni malim na warna biru, dibahen do hiasan na songon delima. Diukir do muse hiasan na songon buah delima di ulu ni tiang ni terras ni bagas joro na margoar Jakin dohot tiang Boas.​—2Mus 28:34; 4Mus 13:23; 1Raj 7:18.

• Dimiahi.

  Di bahasa Heber lapatanna “mandaisson miak”. Dibahen do miak tu sasahalak manang tu barang lao patuduhon na dipillit sasahalak manang barang i tu ulaon na badia. Di Akka Bukku Junani Kristen, dipakke do muse hata on lao patuduhon naung dipillit sasahalak lao mangolu salelengna di surgo.​—2Mus 28:41; 1Sam 16:13; 2Kor 1:21, surat na di toru.

• Dinar.

  Hepeng logam ni halak Rom na dibahen sian perak, boratna hira-hira 3,85 gram. Dibahen do disi gombar ni Kesar. Sadinar ma upa ni parkarejo sadari jala dipangido halak Rom do sadinar pajak ni halak Jahudi. (Mat 22:17; Luk 20:24)​—Ida Lampiran B14.

• Ditawan; Tawanan.

  Diusir sian luatna sandiri manang sian jabuna. Somalna on alani musu na manaluhon sada bangso. Sian bahasa Heber lapatanna “borhat”. Dua hali ma halak Israel ditawan. Halak Israel na sappulu marga na di sabola utara ditawan halak Asiria. Dung i di pudian ni ari na dua marga nai ditawan halak Babel. Mulak ma halak na ditawan i tu luat ni nasida tikki pamarettaon ni si Sirus, raja ni Persia.​—2Raj 17:6; 24:16; Esr 6:21.

• Drakhma.

  Di Akka Bukku Junani Kristen, drakhma na nidokna dison i ma hepeng logam ni halak Junani na dibahen sian perak, boratna hira-hira 3,4 gram. Alai molo di Akka Bukku Heber na nidokna drakhma, i ma hepeng na dibahen sian mas na dipakke di pamarettaon ni Persia. On sarupa tu hepeng darik. (Neh 7:70; Mat 17:24)​—Ida Lampiran B14.

• Dupa.

  Dibahen sian gota ni hau na ditutung rap dohot balsam. Angur do uap ni dupa. Jala adong do dupa na holan dipakke di tabernakel dohot di bagas joro. Adong opat macam na dicampur lao mambahen dupa i. Ganup manogot dohot borngin, ditutung do dupa on di langgatan di Inganan na Badia. Di Ari Pardamean, ditutung ma dupa on di Inganan na Massai Badia. Dupa manggombarhon tangiang ni halak na porsea tu Debata na dipasahat sian ias ni roha. Saonari, dang disuru be halak Kristen manutung dupa.​—2Mus 30:34, 35; 3Mus 16:13; Pgk 5:8.

E

• Edom.

  Goar ni si Esau anak ni si Isak. Pinoppar ni si Esau (Edom) do na mangarajai luat Seir, i ma inganan na mardolok-dolok di holang-kolang ni Laut Mati dohot Pantai Aqaba. Didok do luat i Edom. (1Mus 25:30; 36:8)​—Ida Lampiran B3 dohot B4.

•  Elul.

  Dung kaluar sian Babel, on ma goar ni bulan onom di kalender Jahudi, jala goar ni bulan dua bolas di kalender umum. Molo dipatudos tu saonari, dimulai ma i sian parsitongaan ni bulan Agustus sahat tu parsitongaan ni bulan September. (Neh 6:15)​—Ida Lampiran B15.

• Ende ni Halak na Nakkok tu Kota.

  On ma superskripsi ni Psalmen 120-134. Marasing-asing do pandapot ni halak taringot lapatan ni hata on. Alai godang do na porsea molo Psalmen na 15 on, i ma akka lagu na diendehon halak Israel. Marlas ni roha do nasida tikki mangendehon i. Diendehon nasida do i tikki mardalan nasida manakkohi dalan na tu Jerusalem. Ai di ginjang ni dolok do kota Jerusalem, i ma dolok na adong di huta ni marga Juda. Somal do lao nasida tusi tolu hali sataon lao mangarayahon akka perayaan.

• Epa.

  Ukkuran na dipakke lao manakkar manang manuhat. Dipakke do on lao manuhat gandum manang barli. Dos do on tu ukkuran bat na dipakke lao mangukkur cairan, jadi dos do on tu 22 liter. (2Mus 16:36; Hes 45:10)​—Ida Lampiran B14.

• Epikurus.

  Si Epikurus i ma sahalak filsuf na sian Junani na mangolu taon 341-270 SM. Ibana mangajarhon holan marsonang-sonang do tujuan ni ngolu ni jolma na sasittongna.​—Ul 17:18.

• Epod.

  Baju ni malim na songon celemek. Adong do baju epod na holan dipakke sintua ni malim. Di bagian jolo ni epod i dibahen do 12 batu na arga di panutup ni andorana. (2Mus 28:4, 6)​—Ida Lampiran B5.

• Epraim.

  Goar ni anak ni si Josep na paduahon. Alai dipakke do muse goar on lao mandok sada marga ni Israel. Dung tarbagi Israel, gabe marga Epraim ma marga na umbalga. Alani i dipakke ma Epraim lao mandok goar ni harajaon na sappulu marga i.​—1Mus 41:52; Jer 7:15.

• Etanim.

  Goar ni bulan pitu di kalender agama Jahudi jala goar ni bulan sada di kalender umum Jahudi. Dos do on tu pertengahan ni bulan September sahat tu pertengahan Oktober. Dung kaluar halak Jahudi sian Babel, goar ni bulan on gabe bulan Tisri. (1Raj 8:2)​—Ida Lampiran B15.

• Etiopia.

  Sada bangso kuno na di sabola selatan ni Mesir. Luatna mulai sian ujung di sabola selatan ni Mesir saonari dohot satonga sian sabola utara ni Sudan saonari. Sipata di bahasa Heber didok do on “Kus”.​—Est 1:1.

• Euprat.

  Sunge na ungganjang jala na urrikkot di selatan ni Asia. On ma sada sian dua sunge na balga di Mesopotamia. Parjolo sahali Sunge Euprat on dipaboa di 1Musa 2:14. On ma sada sian opat sunge na adong di taman Eden. (1Mus 31:21) Jala sunge on ma na gabe perbatasan ni Israel na di sabola utara. (1Mus 15:18; Pgk 16:12)​—Ida Lampiran B2.

F

• Firaun.

  Gelar ni raja Mesir. Di Bibel dipaboa do lima goar ni Firaun i ma (si Sisak, si So, si Tirhaka, si Neko, dohot si Hopra). Alai goar ni Firaun na asing i dang adong dipaboa di Bibel, dohot ma i goar ni Firaun na pajuppang dohot si Abraham, si Musa, dohot si Josep.​—2Mus 15:4; Rom 9:17.

G

• Gana-ganaan.

  Patung, gombar, manang barang manang aha pe na dipakke gabe sisombaon. Manomba gana-ganaan lapatanna makkaholongi jala pasangappon gana-ganaan.​—Ps 115:4; Ul 17:16; 1Kor 10:14.

• Gehena.

  Di bahasa Junani, on goar ni rura Hinom na adong di selatan ni Jerusalem najolo. (Jer 7:31) Di akka bukku panurirang, didok do inganan on gok bakke ni jolma. (Jer 7:32; 19:6) Alai dang adong bukti na patuduhon na disappatton akka jolma manang binatang na mangolu tusi asa ditutung. Alani i, inganan i dang manggombarhon inganan ni jolma na ditutung saleleng ni lelengna. Alai didok Jesus dohot akka siseanna do Gehena lao manggombarhon hamatean na saleleng ni lelengna, i ma “hamatean na paduahon”.​—Pgk 20:14; Mat 5:22; 10:28.

• Gera.

  Ukkuran na dipakke lao mamboto borat ni sada barang. Dos do sada gera tu 0,57 gram. Dos do on muse tu 1/20 sekel. (3Mus 27:25)​—Ida Lampiran B14.

• Gilead.

  Luat na subur na di sabola timur ni Sunge Jordan, i ma mulai sian sabola utara dohot tu selatan ni Rura Jabok. Alai sipata sude luat ni halak Israel na di sabola timur ni Jordan, i ma inganan ni marga Ruben, marga Gad, dohot satonga marga Manasse didok do Gilead. (4Mus 32:1; Jos 12:2; 2Raj 10:33)​—Ida Lampiran B4.

• Gitit.

  Istilah musik, alai dang taboto dope lapatanna. Olo do ra on sian hata na di  bahasa Heber, i ma gath. Piga-piga halak mandok molo gitit on nada ni ende tikki lao mambahen anggur. Alana lapatan ni hata gath, i ma inganan pamoroan anggur.​—Ps 81:Sup.

• Gota ni hau na angur.

  Gota ni ramba na marsuga sian hau Commiphora. Dipamasuk do mir tu miak na diusehon tu sasahalak na dipillit. Ala angur, sipata dibahen do on tu pakkean manang tu podoman. Dibahen do muse on tu miak na dipakke lao mandappol. Jala dipakke do muse on tikki paradehon bakke na lao ditanom.​—2Mus 30:23; Poda 7:17, surat na di toru; Mrk 15:23, surat na di toru; Joh 19:39, surat na di toru.

• Gulungan.

  Harotas na ganjang na dibahen sian kulit ni binatang manang sian papirus. Holan sabbariba do harotas i disurat jala adong do tukkot na dipakke lao manggulung harotas i. Najolo di akka gulungan do disurat hata ni Debata. Jala saleleng disurat Bibel, gulungan on ma na gabe bukku di nasida.​—Jer 36:4, 18, 23; Luk 4:17-20; 2Tim 4:13.

• Gulungan na sian kulit.

  Harotas na ganjang na dibahen sian kulit ni biru-biru, hambing, manang anak ni lombu. Undenggan do on sian gulungan na dibahen sian papirus. Dipakke do on lao manuratton hata ni Debata. Ra, akka bukku Heber do gulungan na didok si Paulus lao boanon ni si Timoteus i. Piga-piga Gulungan Laut Mati disurat di gulungan na sian kulit.​—2Tim 4:13.

• Gundik.

  Istri na paduahon. Somalna hatobanna hian do na dibahen gabe istri na paduahon.​—2Mus 21:8; 2Sam 5:13; 1Raj 11:3.

H

• Hades.

  Bahasa Junani do hata on. Alai molo di bahasa Heber didok do on “Syeol”. Hata on diterjemahon gabe “Kuburan” (huruf na balga) lao patuduhon kuburan umum ni jolma. Holan gombaran do inganan i.​—Ida KUBURAN.

• Haheheon.

  Na nidokna dison, i ma hehe sian hamatean. Bahasa Junanina, anastasis lapatanna “hehe; jongjong”. Adong sia halak na hea dipahehe jala disurat di Bibel, dohot ma i Jesus. Jahowa do na pahehehon Jesus. Nang pe adong piga-piga halak na mate na dipahehe marhite si Elia, si Elisa, Jesus, si Petrus, dohot si Paulus, alai sian Debata do dijalo nasida huaso lao pahehehon. Ikkon dipahehe do “halak na burju dohot halak na jahat” di tano on, asa saut sakkap ni Debata. (Ul 24:15) Asing ni i, adong do muse disurat di Bibel taringot tu “haheheon na parjolo”. Na mandapot haheheon songon i, i ma akka haha anggi ni Jesus na dipillit lao mangolu di surgo.​—Plp 3:11; Pgk 20:5, 6; Joh 5:28, 29; 11:25.

• Halak Jahudi.

  On dipakke lao mandok halak Juda dung ditaluhon halak Israel na sappulu marga. (2Raj 16:6) Dung diboan nasida tu Babel dipakke do muse istilah on lao mandok tu sude halak Israel na mulak tu hutana. (Esr 4:12) Di pudian ni ari dipakke muse istilah on di liat portibi on lao paimbarhon halak Israel dohot halak na sian bangso na asing. (Est 3:6) Dipakke si Paulus do muse istilah on lao patorakkon taringot sian bangso na dia pe sasahalak dang pola dipaimbar-imbar di huria Kristen.​—Rom 2:28, 29; Gal 3:28.

• Halak Kristen.

  Goar na dibahen Debata tu akka halak na mangihutton Kristus.​—Ul 11:26; 26:28.

• Halak na mandapot parnidaan.

  Halak na mandapot huaso sian Debata lao mangattusi lomo ni rohana. Gabe boi ma diida ibana akka na sasittongna dang boi idaon ni jolma. Molo di bahasa Heber, lapatan ni hata on, i ma, “mangida” manang “mangattusi”. Jala tikki adong parsoalan na maol, boi do dipangido tudu-tudu manang poda sian ibana.​—1Sam 9:9.

• Halak na merdeka; Halak na dimerdekahon.

  Di tikki pamarettaon ni Rom, halak na merdeka mulai sian tubu didok do “halak na merdeka” na dos songon warga negara Rom. Alai, “halak na dimerdekahon” i ma halak na dipalua sian parhatobanon. Halak na dimerdekahon boi gabe warga negara Rom, alai dang boi gabe pejabat. Alai molo sipsip do halak i dimerdekahon, malua do ibana sian parhatobanon alai dang boi gabe warga negara Rom.​—1Kor 7:22.

• Halak Nasaret.

  Didok do Jesus halak Nasaret, ala sian Nasaret ibana. Di bahasa Heber, hombar do on tu hata “tunas” na disurat di Jesaya 11:1. Di pudian ni ari, didok do akka siihutton Jesus halak Nasaret.​—Mat 2:23; Ul 24:5.

• Halak Nasir.

  Hata on dibuat sian bahasa Heber lapatanna “Halak na Dipapulik”. Adong dua kelompok halak Nasir. Na parjolo i ma halak na sian na nionjar ni rohana gabe halak Nasir. Na paduahon i ma halak na dipillit Debata gabe halak Nasir. Boi do sahalak  bawa manang borua marsumpa tu Jahowa naeng gabe halak Nasir saleleng piga-piga tikki. Halak na marsumpa tu Jahowa lao gabe halak Nasir ikkon mangulahon tolu aturan on. Na parjolo, dang boi manginum alkohol manang sipanganon manang aha pe na sian hau anggur. Na paduahon, dang boi digusting obukna. Na patoluhon, dang boi dijama ibana bakke. Halak na dipillit Debata gabe halak Nasir ikkon toktong gabe halak Nasir saleleng ngoluna. Jala dipaboa Jahowa do akka aha na ikkon ulahononna.​—4Mus 6:2-7; Pangh 13:5.

• Halak Netinim.

  Na marhobas di bagas joro alai dang sian bangso Israel. Sian bahasa Heber lapatanna “Halak na Dilehon”. On lao mandok halak na dilehon lao marhobas di bagas joro. Ra godangan halak Netinim on sian pinoppar ni halak Gibeon, na disuru si Josua asa “papunguhon soban dohot manimba aek tu halak Israel dohot tu langgatan ni Jahowa”.​—Jos 9:23, 27; 1Kron 9:2; Esr 8:17.

• Halak Samaria.

  Mulana, halak Israel na sappulu marga na di utara do na didok halak Samaria. Alai dung ditaluhon halak Asiria nasida taon 740 SM, diboan halak Asiria ma halak sian bangso na asing tu luat i. Gabe dohot ma nasida didok halak Samaria. Di tikki ni Jesus, dang patuduhon sada bangso molo didok halak Samaria. Alai patuduhon sada agama na dihaporseai akka halak na tinggal jonok tu Sikem dohot Samaria. Asing do na dihaporseai nasida tu halak na maragama Jahudi.​—Joh 8:48.

• Haminjon.

  Gota ni hau manang ramba-ramba na marsuga (jenis Boswellia). Angur do on molo ditutung. Dipakke do haminjon lao mambahen dupa na ditutung di tabernakel dohot di bagas joro. Dipakke do muse haminjon tikki mamelehon pelean sipanganon jala dibahen do i muse di roti pelean di Inganan na Badia.​—2Mus 30:34-36; 3Mus 2:1; 24:7; Mat 2:11.

• Harajaon ni Debata.

  Pamarettaon ni Debata Natumimbul na dipatudu marhite pamarettaon ni Anakna, i ma Jesus Kristus.​—Mat 12:28; Luk 4:43; 1Kor 15:50.

• Haroro.

  Di Akka Bukku Junani Kristen, hata on dipakke lao patuduhon haroro ni Jesus Kristus dung gabe raja ibana. Dimulai ma on sian mulai dipillit ibana di banua ginjang gabe raja ni Harajaon ni Debata sahat tu panutup ni jaman on. Alani i, dang holan satokkin haroro ni Kristus on, jala dang boi diida jolma harorona i.​—Mat 24:3.

• Hasalaan.

  Mangalanggar patik; dang mangihutton patik. Molo di Bibel sarupa on tu “dosa”.​—Ps 51:3; Rom 5:14.

• Hasusaan bolon.

  Hata Junani tu hata “hasusaan” patuduhon hasusaan ala adong na masa. Dipaboa Jesus do taringot tu “hasusaan bolon” na so hea masa, na lao masa tu halak di Jerusalem. Jala na lao masa ma hasusaan bolon tu saluhut halak di ari na naeng ro, ‘tikki ro Anak ni jolma i mardongan huaso dohot hasangapon’. (Mat 24:21, 29-31) Dipaboa si Paulus do alani hatigoran ni Debata do umbahen na diparo hasusaan tu “akka halak na so mananda Debata dohot na so mangoloi barita na uli taringot tu Tuanta Jesus”. Dipaboa di Pangungkapon 19, Jesus lao manguluhon akka tentara sian surgo lao mangalo “binatang buas i, akka raja na di tano on, dohot akka tentara ni nasida”. (2Tes 1:6-8; Pgk 19:11-21) Jala lao malua ma “sada punguan bolon” sian hasusaan bolon i. (Pgk 7:9, 14)​—Ida ARMAGEDON.

• Hatigoran.

  Di bahasa Heber dohot Junani, lapatan ni hata on dang holan tigor manang adil tikki mambahen keputusan. Alai tong do dipakke lao patuduhon ulaon na sittong di jolo ni Debata. Molo didok hata i tu Debata, hata i patuduhon dang hea muba patik ni Debata taringot tu na sittong, jala toktong do diulahon Ibana i. Misalna, toktong do dipatudu Debata hatigoran tikki mangadili manang tikki marasi ni roha. (2Kron 12:6, surat na di toru; Ps 145:17, surat na di toru) Molo dipakke hata i tu jolma, on patuduhon molo ibana mangulahon na sittong jala na dihalomohon roha ni Debata. (Mat 6:33, surat na di toru; Luk 1:6, surat na di toru) Alani i, di terjemahan ni Bibel on, dipakke do marragam hata lao manggombarhon halak sisongon on sesuai tu konteks ni ayat i. Misalna, didok do halak sisongon i “halak na tigor marroha” manang “halak na mangulahon na sittong”. Jala di godang ayat, dibahen do terjemahan aslina di surat na di toru.​—1Mus 15:6; 5Mus 6:25; Poda 4:18; 1Ptr 3:12.

• Hatorangan ni saksi.

  Istilah on dipakke lao mandok Sappulu Paretta na disurat di dua batu panuratan na dilehon tu si Musa.​—2Mus 31:18, surat na di toru.

•  Hau.

  Sada hau na tigor na dipakke manghukum parjahat asa gabe sipasingot tu halak jala asa dipaila keluargana. Tarbarita do halak Asiria halak na kejam. Ai dipakke nasida do hau na pissur ujungna lao manusuk butuha ni sasahalak sahat tu aru-aruna. Dung i dipasombu ma halak na mate i di hau i. Alai imbar do on tu hukum ni halak Jahudi. Molo adong halak na mangulahon hajahaton, misalna mangaleai Debata manang manomba gana-ganaan, jolo didangguri do nasida sahat tu na mate, dung i digattung ma bakkena di hau asa gabe sipasingot tu na asing. (5Mus 21:22, 23; 2Sam 21:6, 9) Molo di halak Rom, sipata holan ditali do parjahat i di hau. Dung piga-piga ari, mate ma parjahat i ala marsahit, mauas, male, manang alani mohop ni ari. Alai olo do dipakkuhon nasida tangan dohot pat ni parjahat i tu hau songon na dibahen nasida tu Jesus. (Luk 24:20; Joh 19:14-16; 20:25; Ul 2:23, 36)—Ida HAU PARTINAONAN.

• Hau hangoluan.

  Hau na adong di Taman Eden. Dang adong dipaboa di Bibel, boi dapot ni jolma hangoluan molo diallang parbue ni hau i. Alai hau i manggombarhon jaminan sian Debata asa boi mangolu saleleng ni lelengna. Holan akka halak na diloas Debata do na boi mangallang parbue ni hau i.​—1Mus 2:9; 3:22.

• Hau lawang.

  Dibuat sian kulit ni hau lawang (Cinnamomum cassia). Hampir sarupa do on tu hau kulit manis. Dipakke do hau lawang on lao mambahen miak na angur dohot miak na badia na dipakke lao mangalantik.​—2Mus 30:24; Ps 45:8; Hes 27:19.

• Hau parbinotoan taringot na denggan dohot na roa.

  Hau na adong di Taman Eden. Hau on manggombarhon hak ni Debata lao manottuhon “na denggan” dohot “na roa”.​—1Mus 2:9, 17.

• Hau partinaonan.

  Bahasa Junanina stauros, lapatanna hau na tigor. Misalna hau na dipakke lao manggattung Jesus. Dang adong bukti na patuduhon di bahasa Junani, lapatan ni hata i silang, i ma alat na dipakke halak na so manomba Jahowa marratus taon andorang so ro dope Kristus. “Hau partinaonan” do lapatan ni hata stauros. Ai dipakke do hata stauros tikki paboahon taringot tu sitaonon, hasusaan, dohot issak-issak na lao dihilala akka halak na mangihutton Jesus. (Mat 16:24; Heb 12:2)—Ida HAU.

• Heber.

  Si Abram (Abraham) do na parjolo sahali didok halak Heber. On mambahen ibana imbar sian halak Amori na di sakalilingna. Di pudian ni ari, holan pinoppar ni si Abraham sian si Jakkob pahoppuna i do didok halak Heber. Bahasa na dipakke nasida didok bahasa Heber. Di tikki ni Jesus, godang do hata Aram naung dipakke gabe bahasa Heber. Bahasa on do na dipakke Jesus dohot siseanna.​—1Mus 14:13; 2Mus 5:3; Ul 26:14.

• Hermes.

  Anak ni dewa Zeus, debata ni halak Junani. Tikki ro si Paulus tu Listra, dirippu akka halak do ibana dewa Hermes. Di halak Listra, suruan ni akka dewa do dewa Hermes jala malo makkatai.​—Ul 14:12.

• Herodes.

  Marga ni akka raja na dipillit Kaisar Rom lao mamaretta halak Jahudi. Tarbarita do Herodes Agung ala paturehon bagas joro di Jerusalem. Jala tarbarita do ibana ala naeng mambunu Jesus marhite mambahen paretta asa dibunu akka dakdanak. (Mat 2:16; Luk 1:5) Dipillit do si Herodes Arkilaus dohot si Herodes Antipas, i ma akka anak ni si Herodes Agung, lao mamaretta di akka luat na diparetta bapakna. (Mat 2:22) Jotjot do Gubernur Antipas dijou “raja”. Nungnga mamaretta ibana tikki marhobas Jesus saleleng tolu satonga taon di tano on sahat tu tikki na dipaboa di Ulaon ni Apostel bindu 12. (Mrk 6:14-17; Luk 3:1, 19, 20; 13:31, 32; 23:6-15; Ul 4:27; 13:1) Alai dipamate suru-suruan ni Debata do pahoppu ni si Herodes Agung, i ma si Herodes Agrippa I. Hape satokkin dope ibana mamaretta. (Ul 12:1-6, 18-23) Dung i mamaretta ma anakna, i ma si Herodes Agrippa II. Mamaretta ma ibana sahat tu na mangalo halak Jahudi tu Rom.​—Ul 23:35; 25:13, 22-27; 26:1, 2, 19-32.

• Higayon.

  Istilah musik na dipakke tikki manguluhon akka parmusik. Songon na didok di Psalmen 9:16, ra hata on dipakke lao paboahon asa musik harpa na dibahen, i ma musik na tenang jala on tikki na pas lao mangarimangi.

• Hin.

  Ukkuran na dipakke lao mangukkur cairan jala inganan lao mangukkur i. Dos do sada hin tu 3,67 liter. (2Mus 29:40)​—Ida Lampiran B14.

• Hisop.

  Suan-suanan na ratting dohot bulungna massai denggan. Dipakke do on lao mamispisson aek manang mudar tikki ulaon pabadiahon. Olo do ra on suan-suanan na  margoar marjoram (Origanum maru; Origanum syriacum). Hisop na disurat di Johannes 19:29 (surat na di toru), olo do ra hisop na timbo (Sorghum vulgare). Alani i, gabe boi ma i dipakke lao mambahen bunga karang tu pamangan ni Jesus tikki di hau partinaonan.​—2Mus 12:22; Ps 51:7, surat na di toru.

• Holong na manoktong.

  Hata on diterjemahon sian hata Heber i ma khesedh. Lapatanna i ma holong na tubu alani janji, manang setia tu sasahalak, manang naeng marale-ale tu sasahalak. Dipakke do hata on lao patuduhon holong ni Debata tu jolma manang holong ni jolma tu donganna jolma.​—2Mus 34:6; Rut 3:10, surat na di toru.

• Homer.

  Ukkuran na dipakke lao manakkar barli manang gandum. Dos do on tu ukkuran kor. Mangihutton perkiraan ukkuran ni bat, dos do sahomer tu 220 liter. (3Mus 27:16)​—Ida Lampiran B14.

• Horeb; Dolok Horeb.

  On ma dolok-dolok na di sakaliling ni Dolok Sinai. Digoari do muse dolok on Dolok Sinai. (2Mus 3:1; 5Mus 5:2)​—Ida Lampiran B3.

• Huria.

  Punguan ni akka halak na rap mangulahon sada ulaon. Molo di Akka Bukku Heber, bangso Israel do na nidokna. Alai molo di Akka Bukku Junani Kristen, boi do on mandok sahalak Kristen, alai unjotjot do on dipakke mandok punguan ni halak Kristen.​—1Raj 8:22, surat na di toru; Ul 9:31; Rom 16:5.

I

• Ias.

  Di Bibel hata on dipakke dang holan lao mandok ias di pardagingon. Alai na nidokna i ma dang kotor, dang mardosa, dang ramun, jala dao sian akka na mambahen kotor di partondion manang di pangalaho. Songon na didok di patik ni si Musa, dipakke do hata on lao mandok sasahalak manang barang naung dipaias mangihutton na didok di patik.​—3Mus 10:10; Ps 51:7; Mat 8:2, surat na di toru; 1Kor 6:11.

• Ilirikum.

  Sada provinsi di Rom, di sabola utara ni Junani. Sahat do si Paulus tu provinsi on. Alai dang dipaboa na marbarita do si Paulus disi manang holan mardalani. (Rom 15:19)​—Ida Lampiran B13.

• Inganan na Badia.

  Inganan na parjolo jala na umbalga di tabernakel manang di bagas joro. Inganan on do na parjolo dapot, dung i pe asa dapot Inganan na Massai Badia. Di bagasan Inganan na Badia di tabernakel adong do inganan ni lampu na sian mas, langgatan inganan manutung dupa, meja inganan ni roti pelean, dohot akka barang na sian mas. Alai molo di Inganan na Badia di bagas joro adong do langgatan na sian mas, sappulu inganan ni lampu na sian mas, dohot sappulu meja inganan ni roti pelean. (2Mus 26:33; Heb 9:2)​—Ida Lampiran B5 dohot B8.

• Inganan na badia.

  Somalna na nidokna inganan na badia, i ma inganan manomba Debata. Jotjot do on didok lao mandok tabernakel manang bagas joro. Dipakke do muse istilah on lao mandok inganan ni Debata na di surgo.​—2Mus 25:8, 9; 2Raj 10:25; 1Kron 28:10; Pgk 11:19, surat na di toru.

• Inganan na mardolok-dolok na di Libanon.

  On ma sada sian dua inganan na mardolok-dolok di luat Libanon. Na di sabola barat i ma inganan na mardolok-dolok di Libanon, alai na di sabola timur didok do i Dolok Amana. Di holang-kolong ni dua dolok on adong do sada rura na subur jala na ganjang. Inganan na mardolok-dolok di Libanon on adong di sapping ni Pantai Laut na Balga. Jala rata-rata 1.800 sahat tu 2.100 meter ma timbo ni pussu ni akka dolok on. Najolo godang do hau ares di Libanon on jala massai arga do i di akka bangso na di sakaliling ni luat i. (5Mus 1:7; Ps 29:6; 92:12; ida ma muse surat na di toru)​—Ida Lampiran B7.

• Inganan na Massai Badia.

  Inganan na adong di tabernakel dohot di bagas joro. Disi ma disippan poti parpadanan. Di Patik ni si Musa didok holan sintua ni malim do na boi masuk tu Inganan na Massai Badia jala holan tikki Ari Pardamean do ibana boi masuk tusi.​—2Mus 26:33; 3Mus 16:2, 17; 1Raj 6:16; Heb 9:3.

• Inganan na timbo.

  Inganan na dipakke lao manomba Debata. Somalna on dibahen di pussu ni akka dolok manang di langgatan na dibahen jolma. Nang pe inganan na timbo on sipata dipakke lao mandok inganan lao manomba Debata na sittong, alai unjotjot do hata on dipakke lao mandok inganan na timbo na dipakke akka halak lao manomba akka debata na so sittong.​—4Mus 33:52, surat na di toru; 1Raj 3:2; Jer 19:5, surat na di toru.

• Inganan ni anggur.

  Tas na dipakke manippan anggur. Sian kulit ni binatang do i dibahen, misalna kulit ni hambing manang  biru-biru. Ikkon tu inganan na baru do dibahen anggur na baru. Alana, tikki berfermentasi anggur i, gabe kambang do inganan ni anggur i ala adong gas karbon dioksida na kaluar sian anggur i. Molo dipakke inganan na leleng lao manippan anggur na baru, boi gabe maribak inganan ni anggur i.​—Jos 9:4; Mat 9:17.

• Inganan ni gara ni api.

  Alat na dibahen sian mas manang perak manang tombaga. Alat on dipakke di tabernakel dohot di bagas joro lao manutung pelean manang lao mambolokkon gara ni api sian langgatan inganan manutung pelean, manang lao mambolokkon sumbu ni api naung mosok sian inganan ni lampu na sian mas i.​—2Mus 37:23.

• Inganan pamoroan ni anggur.

  Dua bak na balga na dibahen sian batu kapur. Ikkon uttimbo do sada bak i sian bak na sada nai. Alani i, tikki didege-dege anggur na di bak na uttimbo i, turun ma aek ni anggur i tu bak na sada nai. Dipakke do hata “pamoroan ni anggur” lao manggombarhon panguhuman ni Debata.​—Jes 5:2; Pgk 19:15.

• Israel.

  Goar na dilehon Debata tu si Jakkob. Di pudian ni ari dibahen ma on gabe goar ni saluhut pinopparna. Pinoppar ni si Jakkob sian anakna na 12 i didok do halak Israel, manang bangso Israel. Jala didok do muse harajaon na sappulu marga na di sabola utara halak Israel. Di pudian ni ari, halak Kristen na dimiahi didok do “Israel ni Debata.”​—Gal 6:16; 1Mus 32:28; 2Sam 7:23; Rom 9:6.

J

• Jahowa.

  Terjemahan ni Tetragramaton, i ma opat huruf Heber na gabe goar ni Debata. On ma terjemahan ni Tetragramaton na somal dipakke di bahasa Batak Toba. Lobi sian 7.000 hali ma goar on disurat di Bibel on.​—Ida Lampiran A4 dohot A5.

• Jakkob.

  Anak ni si Isak dohot si Rebekka. Di pudian ni ari, dibahen Debata ma goarna gabe Israel. Ibana gabe ompu ni bangso Israel (manang halak Israel, jala di pudian ni ari didok do nasida halak Jahudi). Adong 12 anak ni si Jakkob. Goar ni nasida dohot goar ni pahoppuna ma na gabe 12 marga ni bangso Israel. Alai toktong do dipakke goar ni si Jakkob lao patuduhon bangso Israel.​—1Mus 32:28; Mat 22:32.

• Jaman.

  Bahasa Junanina aion. Lapatanna, na masa di sada-sada tikki na mambahen marimbar jaman i sian jaman na asing. Di Bibel, dipakke do hata “jaman” lao patuduhon na masa di portibi on. Dipakke do muse hata i lao mandok halak na makkaholongi portibi on. (2Tim 4:​10, surat na di toru.) Dung adong parjanjian Patik, dibahen Debata do sada jaman na digoari jaman ni halak Israel manang jaman ni halak Jahudi. Alani tobusan ni Jesus, dibahen Debata ma jaman na baru. Halak na dipillit lao mangolu di surgo do na dohot tu jaman i. Jala mulai sian i ma dipukka jaman na baru. Di jaman i ma mulai masa akka na digombarhon di parjanjian Patik. Hata “jaman on” patuduhon situasi naung masa manang na lao masa.​—Mat 24:3; Mrk 4:19; Rom 12:2; 1Kor 10:11.

• Jaminan.

  Arta manang barang na dilehon sasahalak na patuduhon pasti gararonna do utangna. Di Patik ni si Musa adong do aturan na dibahen taringot jaminan. Tujuanna lao mangalinggomi halak na pogos dohot halak Israel na so adong pangalu-aluanna.​—2Mus 22:26; Hes 18:7.

• Janji.

  Marjanji tu Debata lao mangulahon sada ulaon, mangalehon pelean, marhobas tu Debata marhite mangulahon sada tugas, manang marjanji asa unang mangulahon sada ulaon nang pe sasittongna menurut patik dang sala ulaon i. Massai serius do janji on sarupa songon sumpa.​—4Mus 6:2; Pjm 5:4; Mat 5:33.

• Jedutun.

  Istilah na dipaboa di superskripsi ni Psalmen 39, 62, dohot 77. Dang takkas lapatanna, alai olo do ra superskripsi on marisi tudu-tudu lao mangendehon ende psalmen manang lao paboahon gaya manang alat musik na dipakke. Adong do halak Lepi parmusik na goarna si Jedutun. Alani i olo do ra gaya pertunjukan manang alat musik na didok dison adong kaitanna tu ibana manang tu akka pinopparna.

• Juda.

  Anak ni si Jakkob na paopatton sian si Lea. Andorang so mate si Jakkob, dipaboa ibana do taringot sasahalak na sian pinoppar ni si Juda na lao gabe raja saleleng ni lelengna. Tikki di tano on Jesus, tubu sian marga Juda do ibana. Mulana holan tu marga Juda do didok halak Juda alai di pudian ni ari gabe didok bangso i halak Juda. Na nidok na halak Juda i ma bangso na di sabola selatan, i ma marga Juda, marga Benjamin, akka malim dohot halak Lepi. Dohot do Jerusalem gabe luat  ni nasida jala disi do bagas joro.​—1Mus 29:35; 49:10; 1Raj 4:20; Heb 7:14.

• Junani.

  Bahasa na dipakke bangso Junani manang halak Junani asli, manang halak na keluargana sian Junani. Di Akka Bukku Junani Kristen dipakke do muse hata “Junani” lao mandok halak na so bangso Jahudi manang akka halak na dipengaruhi bahasa Junani manang kebudayaan Junani.​—Joel 3:6; Joh 12:20.

• Juru tulis.

  Halak na manalin surat na badia na adong di bahasa Heber. Mulai sian tikki ni Jesus, akka halak na gabe juru tulis, i ma akka halak na mora na diajari taringot tu Patik. Jala dialo nasida do Jesus.​—Esr 7:6, surat na di toru; Mrk 12:38, 39; 14:1, surat na di toru.

K

• Kab.

  Ukuran ni barli manang gandum. Hira-hira dos do on tu 1,22 liter mangihutton ukkuran ni bat. (2Raj 6:25)​—Ida Lampiran B14.

• Kamos.

  Debata na untimbo na disomba halak Moab.​—1Raj 11:33.

• Kanaan.

  Pahoppu ni si Noak sian si Ham, i ma anakna si Ham na nomor opat. Pinoppar ni si Kanaan na sappulu sada marga tinggal di sabola timur ni Laut na Balga di holang-kolang ni Mesir tu Siria. Didok ma luat i ‘Luat Kanaan.’ (3Mus 18:3; 1Mus 9:18; Ul 13:19)​—Ida Lampiran B4.

• Kapal Tarsis.

  Najolo, on do kapal na dipakke tu Tarsis (saonari didok ma Tarsis on Spanyol). Olo do ra on kapal na balga na boi dipakke lao tu huta na dao. Dipakke si Salomo dohot si Jehosapat do kapal on martiga-tiga.​—1Raj 9:26; 10:22; 22:48.

• Kareta.

  Padati na ditarik hoda jala adong dua rodana. Somalna lao marporang do dipakke padati on.​—2Mus 14:23; Pangh 4:13; Ul 8:28.

• Kasdim; Halak Kasdim.

  Mulana istilah on dipakke lao mandok luat na jonok tu Sunge Tigris dohot tu Sunge Euprat, manang mandok halak na tinggal disi. Alai di pudian ni ari, gabe halak na tinggal di Babel do na didok halak Kasdim. Jala halak na malo, na mangattusi sejarah, na mamparsiajari parhusor ni bintang, na mamakke ilmu sihir, dohot na mangida bintang lao manjujur ari, didok do halak Kasdim.​—Esr 5:12; Dan 4:7; Ul 7:4.

• Kemah parpunguan.

  Istilah na dipakke lao mandok kemah ni si Musa dohot tabernakel na parjolo dibahen di padang gurun.​—2Mus 33:7; 39:32.

• Kerubim.

  Suru-suruan na mangulahon tugas na massai rikkot. Dang sarupa nasida dohot serapim.​—1Mus 3:24; 2Mus 25:20; Jes 37:16; Heb 9:5.

• Kesar.

  Marga ni halak Rom na gabe gelar ni akka pamimpin di Rom, uppamana si Agustus, si Tiberius, dohot si Klaudius na disurat di Bibel. Jala dipakke do muse gelar on tu si Nero nang pe dang disurat di Bibel. Dipakke do nang hata “Kesar” di Akka Bukku Junani Kristen lao patuduhon sada harajaon manang Negara.​—Mrk 12:17; Ul 25:12.

• Kislew.

  Dung kaluar sian Babel, on ma goar ni bulan sia di kalender Jahudi, jala bulan tolu di kalender umum. Molo saonari, dimulai ma i sian parsitongaan ni bulan November sahat tu parsitongaan Desember. (Neh 1:1; Sak 7:1)​—Ida Lampiran B15.

• Kor.

  Ukkuran na dipakke lao manakkar cairan, gandum, manang barli. Dos do sada kor tu 220 liter mangihutton ukkuran bat. (1Raj 5:11)​—Ida Lampiran B14.

• Koral.

  Songon batu karang na karas sian holi-holi ni binatang na gelleng di laut. Marragam do warna ni koral. Adong do merah, na bottar, jala na birong. Godang do i di Laut Merah. Di jaman ni Bibel massai arga do koral na merah. Dibahen do i gabe perhiasan.​—Poda 8:11.

• Kota ni si Daud.

  Dung ditaluhon si Daud kota Jebus, dibahen ibana ma goar ni kota i gabe Kota ni si Daud. Dipajongjong ibana ma istanana disi jala digoari kota i Sion. Di sabola selatan do kota on jala on ma na umtua di Jerusalem.​—2Sam 5:7; 1Kron 11:4, 5.

• Kota parlinggoman.

  Akka kota ni halak Lepi, inganan ni akka halak na so sengaja mambunu. Ikkon lari do nasida tu kota on asa unang dibunu keluarga ni na mate i nasida. Adong onom kota na dibahen gabe kota parlinggoman. Jala dibahen do kota i di akka luat di Tano na Dijanjihon i. Marhite tudu-tudu sian Jahowa, si Musa ma na manottuhon didia do akka kota parlinggoman i dibahen. Jala di pudian ni ari si Josua ma na mamillit akka kota i. Tikki lari halak na so sengaja mambunu tu kota parlinggoman i, ikkon dipaboa ibana do parsoalanna i tu sintua na di gerbang ni kota i. Dung i, denggan ma ibana  dijalo disi. Alai asa unang gabe ro halak na sengaja mambunu tu kota i, ikkon diboan do halak na mambunu i tu pengadilan di kota ingananna mambunu i. Molo tutu do dang sengaja ibana mambunu, ikkon dipaulak ma muse ibana tu kota parlinggoman i. Dang boi ibana lewat sian batas ni kota i saleleng ngoluna manang sahat tu na mate sintua ni malim di tikki i.​—4Mus 35:6, 11-15, 22-29; Jos 20:2-8.

• Kristus.

  Gelar ni Jesus, sian bahasa Junani Khristos. Sarupa do lapatan ni hata on tu hata “Messias” manang “Na dipillit” di bahasa Heber.​—Mat 1:16; Joh 1:41.

• Kuburan.

  Molo disuratton mamakke huruf na gelleng, on patuduhon kuburan ni sasahalak. Alai molo disuratton mamakke huruf na balga, on patuduhon inganan ni na mate na di bahasa Heber “Syeol” jala di bahasa Junani “Hades”. Inganan i manggombarhon, halak na mate na so boi mangulahon manang aha pe. (1Mus 47:30; Pjm 9:10; Mat 27:61; Ul 2:31)​—Ida surat na di toru di Joh 5:28.

• Kulit ni eme.

  Tikki mardege do dipapulik kulit ni eme on sian borasna. Dipakke do istilah on gabe tudosan lao mandok akka na so marguna dohot akka na so dihalomohon.​—Ps 1:4; Mat 3:12, surat na di toru.

• Kursi pengadilan.

  Somalna sada panggung na boi diida godang jolma. Hundul ma disi akka pejabat lao paboahon keputusan ni nasida. Hata “kursi pengadilan ni Debata” dohot “kursi pengadilan ni Kristus” manggombarhon panguhuman ni Jahowa tu sude jolma di ari na naeng ro.​—Rom 14:10; 2Kor 5:10; Joh 19:13.

• Kusta.

  Sahit na posi di kulit. Dang sarupa sahit kusta na dipaboa di Bibel tu sahit kusta na saonari. Di Bibel, adong do dipaboa taringot tu pakkean dohot jabu na hona sahit kusta.​—3Mus 14:54, 55; Luk 5:12.

L

• Langgatan.

  Akka batu, tano, dohot hau na marlappis logam na dibahen martimbun-timbun. On dibahen gabe inganan mamelehon pelean dohot dupa. Di ruangan na parjolo di tabernakel dohot di bagas joro, adong do langgatan na gelleng na sian mas lao inganan manutung dupa. Langgatan i dibahen sian hau na marlappis mas. Di alaman ni bagas joro adong do muse langgatan na umbalga na sian tombaga, gabe inganan mamelehon pelean situtungon. (2Mus 27:1; 39:38, 39; 1Mus 8:20; 1Raj 6:20; 2Kron 4:1; Luk 1:11)​—Ida Lampiran B5 dohot B8.

• Laut api.

  “Laut api barerang na marnala-nala” manggombarhon “hamatean na paduahon”. Disappatton ma tusi Sibolis, halak na so olo muba, hamatean dohot Kuburan (Hades). On manggombarhon hamatean na salelengna, dang patuduhon na adong api naroko. Ai dang boi ditutung akka suru-suruan na jahat, hamatean dohot Kuburan umum.​—Pgk 19:20; 20:14, 15; 21:8.

• Legion.

  Di Bibel, hata “legion” jotjot do dipakke lao patuduhon bilangan na godang. Uppamana, adong hira-hira 4.000 sahat tu 6.000 tentara di sada pasukan tentara ni Rom najolo.​—Mat 26:53, surat na di toru; Mrk 5:9; Luk 8:30.

• Lepi.

  Anak ni si Jakkob na patoluhon sian si Lea. Di pudian ni ari dibahen ma i gabe marga ni halak Israel. Tolu anak ni si Lepi ma na gabe tolu punguan ni halak Lepi. Hata “halak Lepi” patuduhon sude halak Israel na marga Lepi, alai dang dohot malim na sian pinoppar ni si Aron. Dang mandapot parbagianan halak Lepi di tano na dijanjihon i. Alai diloas do nasida maringanan di 48 kota na di inganan ni marga na asing.​—5Mus 10:8; 1Kron 6:1; Heb 7:11.

• Lepiatan.

  I ma binatang na mangolu di aek. Di Job 3:8 dohot 41:1 (surat na di toru) olo do ra na nidokna i ma buaya manang binatang na mangolu di laut. Manang binatang na balga jala na gogo na mangolu di laut. Di Psalmen 104:26 ra na nidokna i ma binatang na songon ikan paus. Alai di ayat-ayat na asing dipakke do hata on gabe gombaran. Alani i dang taboto binatang na dia do na nidokna di akka ayat i.​—Ps 74:14; Jes 27:1.

• Lepton.

  Di tikki ni Akka Bukku Junani Kristen, hepeng logam lepton ma hepeng na umotik argana. Hepeng on dibahen sian tombaga manang perunggu. Di Bibel, diterjemahon do on gabe “hepeng logam na otik argana”. (Mrk 12:42; Luk 21:2, surat na di toru.)​—Ida Lampiran B14.

• Log.

  Ukkuran na dipakke lao manakkar cairan, jala on ma ukkuran na unggelleng na dipaboa di Bibel. Mangihutton Talmud (bukku taringot patik ni halak Jahudi) sada log dos ma i tu 1/12 hin. Alani i dos ma sada log tu 0,31 liter. (3Mus 14:10)​—Ida Lampiran B14.

 M

• Mahalat.

  Ra istilah musik do on na dipaboa di superskripsi di Psalmen 53 dohot 88. Ra adong do kaitan ni on tu hata di bahasa Heber na lapatanna “lam gale manang marsahit”. Alani i istilah musik on ra paboahon lungun ni roha jala memang songon i do isi ni dua lagu i.

• Mahkota na badia.

  Sada batang mas na murni na tipis jala na marhillong. Diukir do disi hata di bahasa Heber na lapatanna “Na Badia do Jahowa”. Dibahen ma i di sorban ni sintua ni malim. (2Mus 39:30, surat na di toru)​—Ida Lampiran B5.

• Makedonia.

  Sada luat di utara ni Junani, na gabe tarbarita dung mamaretta si Aleksander Agung sahat tu na marhuaso halak Rom disi. Nungnga gabe provinsi ni Rom kota Makedonia tikki ro si Paulus parjolo sahali tusi. Tolu hali ma si Paulus ro tu kota i. (Ul 16:9)​—Ida Lampiran B13.

• Malim kepala.

  Istilah na asing tu “sintua ni malim” di Akka Bukku Heber. Di Akka Bukku Junani Kristen, istilah on dipakke lao mandok akka malim na sangap. Boi do na nidokna akka halak na hea gabe sintua malim, manang malim kepala na manguluhon 24 punguan ni akka malim.​—2Kron 26:20; Esr 7:5; Mat 2:4; Mrk 8:31.

• Malim.

  Sahalak bawa na dipillit Debata gabe wakilna. Ibana disuru mangajari akka halak taringot Debata dohot patikna. Malim do na mewakili bangso ni Debata. Marhite malim do nasida mangalehon pelean. Malim do na martangiang tu Debata lao mangido na porlu di bangso i. Andorang so adong Patik ni si Musa, akka ama do na gabe malim ni keluargana. Dung adong Patik ni si Musa, pinoppar ni si Aron ma na gabe malim. Jala halak Lepi ma na mangurupi nasida. Dung adong perjanjian baru, Israel ni Debata ma na gabe akka malim, jala Jesus Kristus ma na gabe sintua ni malim.​—2Mus 28:41; Gal 6:16; Heb 9:24; Pgk 5:10.

• Malkam.

  Ra on sarupa tu Molok, debata ni halak Ammon. (Sep 1:5)​—Ida MOLOK.

• Mangalakkup.

  Halak naung marhasohotan alai mangulahon seks dohot halak na asing na so istrina manang suamina.​—2Mus 20:14; Mat 5:27; 19:9.

• Mangandungi.

  Lungun ni roha ala mate sasahalak manang ala adong hasusaan. Dipaboa di Bibel, olo do halak mangandungi manang na piga leleng. Halak na mangandungi olo do mangangguhi, mambahen orbuk di uluna, marabit goni, mangaribak bajuna, jala mamukpuhi andorana. Adong do halak na karejona mangandungi jala jotjot do halak sisongon i dijou tu ulaon adat tu na mate.​—1Mus 23:2; Est 4:3; Pgk 21:4.

• Mangappehon tangan.

  Diappehon do tangan tu sasahalak tikki dipillit lao mangulahon sada ulaon, tikki dipasu-pasu, tikki dipamalum manang asa songgop tondi parbadia tu ibana.​—2Mus 29:15; 4Mus 27:18; Ul 19:6; 1Tim 5:22, surat na di toru.

• Manimbil.

  Di bahasa Junani apostasia lapatanna “mandao sian”. Boi do muse lapatanna “lari, manadikkon, manang mangalo”. Di Akka Bukku Junani Kristen, hata “manimbil” jotjot do dipakke tu akka halak na mandao jala mangalo Debata.​—Poda 11:9; Ul 21:21; 2Tes 2:3, surat na di toru.

• Manna.

  Sipanganon na diparade Jahowa tu halak Israel saleleng 40 taon di gurun. Ganup manogot, asing ni ari Sabat turun ma manna sian langit. Tikki parjolo sahali halak Israel mangida i, didok nasida ma, “Aha do on?” manang di bahasa Heber, “manhu?” (2Mus 16:13-15, 35) Di ayat na asing didok do on “sipanganon sian langit” (Ps 78:24), “roti na turun sian langit” (Ps 105:40), dohot “roti na sian suru-suruan”. (Ps 78:25) Hea do muse Jesus dipatudos songon manna.​—Joh 6:49, 50.

• Manuhor.

  Sasahalak na marhak manang na bertanggung jawab lao manobus manang manuhor muse keluargana na gabe hatoban. Marhak do muse ibana manuhor arta manang warisan ni keluargana i. (4Mus 25:25-27, 47-54) Jotjot do muse gabe muli halak na manuhor i tu istri ni keluargana na mabalu i, asa adong pinoppar ni keluargana na mate i.​—Rut 4:7-10.

• Mardatu.

  Ulaon na patuduhon porsea do halak na mangulahon i na mangolu dope halak naung mate. Didok roha ni nasida, boi dope halak na mate i makkatai tu halak na mangolu tarlumobi molo diurupi datu nasida. Bahasa Junanina, i ma pharmakia, lapatanna “dibius”. Najolo, dipakke nasida do narkoba tikki mangido tu suru-suruan na jahat asa diurupi nasida lao mambahen tanda halongangan.​—Gal 5:20; Pgk 21:8.

• Mardege; Pardegean.

  Najolo, di inganan pardegean do halak mardege gandum lao manirang gandum sian kulitna dohot duramena. Molo godang gandum i, dipakke  ma alat na ditarik binatang. Digiling alat i ma gandum na adong di inganan pardegean i. Somalna, di inganan na datar jala na timbo do pardegean i, ala godang alogo disi.​—3Mus 26:5; Jes 41:15; Mat 3:12.

• Maskil.

  Istilah bahasa Heber na dipaboa di superskripsi ni 13 psalmen. Dang taboto lapatan ni hata on, alai olo do ra lapatanna “puisi na ikkon dirimangi”. Piga-piga halak mandok, olo do ra lapatan ni hata i, “marbisuk mangulahon tugas” ala sarupa bentuk ni hata i tu hata marhobas mardongan bisuk.​—2Kron 30:22; Ps 32:Sup.

• Materai; Segel.

  Dibahen do materai manang segel (somalna tu tano liat manang tu lilin) lao patuduhon na tutu sada hatorangan manang parjanjian. Materai najolo dibahen sian batu, gading, manang sian hau jala tarsurat do disi huruf manang gambar na tarbalik. Molo dipakke materai manang segel, on patuduhon na tutu sada hatorangan, manang na dirahasiahon dope i.​—2Mus 28:11, surat na di toru; Neh 9:38; Pgk 5:1; 9:4.

• Media.

  Halak Media, i ma pinoppar ni si Japet sian anakna si Madai. Nasida tinggal di inganan na mardolok-dolok di Iran, i ma luat ni halak Media. Marsada do halak Media dohot Babel mangalo halak Asiria. Di tikki i provinsi ni Media do Persia. Alai ala mangalo si Sirus, gabe marsada ma Media dohot Persia mambahen sada pamarettaon na digoari Media-Persia. Ditaluhon nasida ma pamarettaon ni Babel na baru di taon 539 SM. Adong do halak Media di Jerusalem tikki Pentakosta taon 33 M. (Dan 5:28, 31; Ul 2:9)​—Ida Lampiran B9.

• Merodak.

  Debata na ussangap di kota Babel. Si Hamurabi do raja jala sibahen patik di kota Babilon. Jala dibahen ibana ma Babilon i gabe ibukota ni Babel. Alani i gabe lam dipasangap nasida ma si Merodak (manang, Marduk) debata ni nasida. Gabe unjotjot do on disomba nasida sian akka debata na asing na adong di Babilon. Di pudian ni ari digatti ma goar ni si Merodak (manang, Marduk) i gabe “Belu” na lapatanna (“Nappuna”). Jala unjotjot do didok nasida Bel lao mandok Merodak.​—Jer 50:2.

• Mesias.

  Sian bahasa Heber na lapatanna “dimiahi” manang “na miniahan”. Sarupa do lapatan ni hata Messias tu hata “Kristus” di bahasa Junani.​—Dan 9:25, surat na di toru; Joh 1:41.

• Miak balsam.

  Miak na angur na dibahen sian gota ni suan-suanan manang gota ni hau. Boi do on dipakke gabe ubat manang gabe parfum, jala massai arga do on.

• Miktam.

  Istilah bahasa Heber na adong disurat di onom Psalmen, i ma (Ps 16, 56-​60). Dang taboto lapatan ni istilah on, alai olo do ra lapatanna berkaitan tu surat na diukir.

• Mil.

  Hata na jotjot dipakke lao paboahon jarak ni pardalanan. Holan sahali do disurat hata on di Akka Bukku Junani Kristen, i ma di Mateus 5:41, surat na di toru. Na nidokna disi, i ma mil ni halak Rom na daona dos tu 1.479,5 meter.

• Milkom.

  Debata na disomba halak Ammon. Ra sarupa do on tu debata Molok. (1Raj 11:5, 7) Dipajongjong si Salomo do inganan na timbo lao manomba akka debata na so sittong on di tikki naeng marujung pamarettaonna.​—Ida MOLOK.

• Milloh.

  Olo do ra na didokna dison i ma dolok-dolok manang akka bangunan na adong disi. Olo do ra na didokna dison tembok na dibahen lao manukkol manang terras ni dolok-dolok manang panukkol na asing na dipajongjong di inganan i.​—2Sam 5:9; 1Raj 11:​27, surat na di toru.

• Mina.

  Di bukku Hesekiel didok do on mane. Mina i ma hata na jotjot dipakke lao paboahon borat ni sada barang jala goar ni hepeng. Mangihutton hasil penelitian, sada mina dos tu 50 sekel. Sada sekel dos tu 11,4 gram. Mina na dipakke di Akka Bukku Heber dos tu 570 gram. Adong do muse mina na dipakke di istana ni raja jala dipakke dos songon asta na dipakke di istana. Di Akka Bukku Junani Kristen, sada mina dos do tu 100 drakhma. Jala sada mina boratna dos tu 340 gr. Jala 60 mina dos tu sada talenta. (Esr 2:69; Luk 19:13)​—Ida Lampiran B14.

• Mir.

  Gota ni ramba na marsuga sian hau Commiphora. Dipamasuk do mir tu miak na dipakke lao mangalantik. Ala angur, dibahen do mir tu pakkean manang tu podoman. Dibahen do muse mir tu miak na dipakke lao mandappol jala dipakke do on tikki paradehon bakke na lao ditanom.—2Mus 30:23; Poda 7:17; Mrk 15:23; Joh 19:39.

• Molok.

  Debata ni halak Ammon. Ra sarupa do on tu Malkam manang Milkom. Ra gelar ni debata ni nasida do on, dang goarna.  Di Patik ni si Musa dipaboa ikkon dipamate do manang ise pe na mangalehon anakna gabe pelean tu debata Molok.​—3Mus 20:2; Jer 32:35; Ul 7:43.

• Muba.

  Molo di Bibel, halak na muba, i ma halak na manolsoli sian nasa rohana ala nungnga mangulahon na sala, ala adong hasomalan na so denggan na diulahon ibana saleleng on, manang ala dang diulahon ibana ulaon na ikkon ulahononna. Molo nungnga tutu muba sasahalak sian nasa rohana, tarida do i sian parniulaonna.​—Mat 3:8; Ul 3:19; 2Ptr 3:9.

• Mut-laben.

  Istilah na dipakke di superskripsi Psalmen 9. Lapatanna taringot “sasahalak na matean anakna”. Alai adong do na mandok molo istilah on i ma goar manang hata parjolo di sada ende na terkenal jala dipakke do nadana i lao mangendehon psalmen on.

N

• Nardus.

  Miak na angur jala na massai arga. Sian suan-suanan nardus (Nardostachys jatamansi) do on dibuat jala marwarna na merah. Ala arga, jotjot do Nardus dicampur dohot miak na asing na ummura. Alai si Markus dohot si Johannes mandok, “Miak nardus na angur jala na massai arga” do na diusehon tu ulu Jesus.​—Mrk 14:3; Joh 12:3.

• Nefes.

  Bahasa Heber do hata on, molo bahasa Junanina psykhe. Diterjemahon do hata on di Bibel gabe (1) jolma, (2) binatang, (3) hangoluan ni jolma manang binatang. (1Mus 1:20; 2:7; 4Mus 31:28; 1Ptr 3:20; surat na di toru.) Asing do na diajarhon godang agama taringot tu hata nefes dohot psykhe on sian na di Bibel. Molo di Bibel lapatan ni hata on, i ma akka toppaan na di tano on, songon jolma dohot binatang. Boi do lapatanna na boi diida, dijama, jala na boi mate. Molo di terjemahan ni Bibel on, diterjemahon ma akka hata on sesuai tu konteksna. Misalna diterjemahon ma i gabe, “hosa”, “ngolu”, “halak”, manang holan dibahen gabe “au”. Di godang ayat dibahen do terjemahan aslina di surat na di toru. Boi do muse diterjemahon hata on lao mandok sian nasa roha manang sian nasa ngolu. (5Mus 6:5; Mat 22:37; surat na di toru.) Di piga-piga ayat boi tong akka hata on diterjemahon lao mandok rencana manang lomo ni roha ni sasahalak, jala lao mandok bakke manang halak naung mate.​—4Mus 6:6; Poda 23:2; Hag 2:13, surat na di toru.

• Nehilot.

  Sada istilah na adong di superskripsi ni Psalmen 5. Dang taboto dope aha lapatanna. Alai adong do halak na mandok molo nehilot i alat musik na diombus. Olo do ra ala dikaitton nasida tu hata di bahasa Heber na adong kaitanna tu chalil (suling). Alai olo do ra nehilot on nada ni ende.

• Nepilim.

  I ma akka raksasa na jahat, anak ni suru-suruan naung gabe jolma na mambuat akka borua na di tano on gabe istrina. Masa do i andorang so ro Aek na Sumar.​—1Mus 6:4, surat na di toru.

• Nisan.

  Dung kaluar sian Babel, on ma goar na baru tu bulan Abib. On ma goar ni bulan na parjolo di kalender ni halak Jahudi, jala goar ni bulan na papituhon di kalender umum. Molo dipatudos tu saonari, di mulai ma i sian parsitongaan ni bulan Maret sahat tu parsitongaan ni bulan April. (Neh 2:1)​—Ida Lampiran B15.

O

• Omer.

  Ukkuran na dipakke lao manakkar gandum manang barli. Dos do on tu 2,2 liter, manang 1/10 epa. (2Mus 16:16, 18)​—Ida Lampiran B14.

P

• Palistim; Halak Palistim.

  Palistim i ma sada huta na jonok tu laut na di sabola selatan ni Israel. Akka halak na sian Kreta do na tinggal disi, jala didok ma nasida halak Palistim. Nang pe hea si Daud manaluhon nasida, alai toktong do adong raja ni nasida sandiri. Jala torus do nasida gabe musu ni halak Israel. (2Mus 13:17; 1Sam 17:4; Am 9:7)​—Ida Lampiran B4.

• Pamimpin.

  Hata on dipakke lao patuduhon ulaon ni Jesus na rikkot, i ma paluahon akka jolma sian hamatean alani dosa. Dung i ditogu-togu Jesus ma nasida tu hangoluan na saleleng ni lelengna.​—Ul 3:15; 5:31; Heb 2:10; 12:2.

• Pamimpin ni akka parende.

  Dipakke do hata on di bukku Psalmen. Molo di bahasa Heber lapatan ni hata on, i ma halak na makkarang lagu, na manguluhon akka parende, na mangalatik akka parende na sian marga Lepi, jala na manguluhon akka pertunjukan-pertunjukan na resmi.​—Ps 4:Sup; 5:Sup.

• Pamimpin ni suru-suruan.

  Di Bibel, holan sahalak do na didok pamimpin ni suru-suruan, i ma si Mikhael.​—Dan 12:1; Jud 9; Pgk 12:7.

•  Panguhum.

  Halak na dipillit Jahowa lao paluahon bangsona andorang so dipillit dope akka raja di Israel.​—Pangh 2:16.

• Panjaga.

  Halak na manjaga sada bangso manang bangunan sian bahaya, jala diulahon nasida do i jotjotan tikki borngin. Dibahen nasida do tanda molo adong bahaya. Biasana di tembok ni kota do nasida mangulahon tugasna. Ala di ginjang ni menara do nasida hundul manang jongjong, gabe boi ma diida nasida sian na dao halak na naeng ro tu kota. Adong do akka tentara na gabe panjaga. Jala akka panurirang pe didok do panjaga ni bangso Israel. Ai nasida do na pasingotton bangso i asa malua sian hukuman na lao bahenon ni Debata.​—2Raj 9:20; Hes 3:17.

• Panurirang.

  Halak na paboahon rencana ni Debata dohot na pasahatton hata ni Debata. Ibana do muse na paboahon aha na lao masa. Alai dang holan i tugasna, dohot do paboahon ajaran ni Jahowa, parettana, dohot panguhumanna.​—Am 3:7; 2Ptr 1:21.

• Panutup ni andora.

  Kain panutup na dibahen tu andora ni Sintua ni Malim ni halak Israel. Dihiasi do kain panutup on pakke batu permata. Dipakke malim ma kain panutup ni andora on tikki masuk ibana tu Inganan na Badia. Di panutup ni andora i adong do Urim dohot Tumim, dipakke malim do i lao manukkun lomo ni roha ni Jahowa. (2Mus 28:15-30)​—Ida Lampiran B5.

• Panutup ni jaman.

  Jaman andorang so dihancurhon portibi na dirajai Sibolis. Masa ma on di tikki haroro ni Kristus. Disuru Jesus ma akka suru-suruan “manirang akka parjahat sian halak na mangulahon na sittong”. Dung i diripasson ma parjahat i. (Mat 13:40-42, 49) Tarpaima-ima do akka sisean ni Jesus lao mamboto andigan do “panutup ni jaman on”. (Mat 24:3) Andorang so mulak dope Jesus tu surgo, marjanji do Jesus lao mandongani halak na mangihutton ibana sahat tu panutup ni jaman on.​—Mat 28:20.

• Papirus.

  Suan-suanan na tubu di aek na songon hau tolong. Dipakke do on lao mambahen karanjang, parau, dohot lao mambahen inganan ni manang aha. Dipakke do muse papirus on gabe bahan lao mambahen harotas jala dipakke do i lao mambahen akka gulungan.​—2Mus 2:3, surat na di toru.

• Papunguhon sisa panen.

  Mambuat sisa panen na ditadikkon akka panabi, disengaja manang dang disengaja. Di Patik ni si Musa dipaboa do asa unang dibuat bangso i hasil panen ni nasida na di pinggir-pinggir ni ladang ni nasida. Jala dang boi buaton ni nasida sude parbue ni jetun ni nasida dohot anggur ni nasida. Ai nungnga dilehon Debata i tu akka halak na pogos, na susa, akka halak na sian bangso na asing, akka dakdanak na so marama, dohot akka ina na mabalu. Nasida ma na mambuat akka panen na tinggal i.​—Rut 2:7.

• Paradeiso.

  Taman manang inganan na bagak. Porlak Eden ma inganan na bagak na parjolo sahali dibahen Jahowa lao inganan ni jolma na parjolo. Tikki makkatai Jesus tu parjahat na dipakkuhon di labbungna, dipaboa Jesus do taringot tano on na lao gabe Paradeiso. Di 2 Korint 12:4 hata “paradeiso” patuduhon paradeiso di ari na naeng ro. Di Pangungkapon 2:7, hata “paradeiso ni Debata” patuduhon banua ginjang.​—Ende 4:13; Luk 23:43.

• Parbue na parjolo.

  Parbue na parjolo dipanen di musimna. Ikkon dipelehon bangso Israel do tu Jahowa akka parbue na parjolo. Uppamana jolma, binatang, dohot akka parbue ni suan-suanan ni nasida. Ganup taon, halak Israel ikkon mangalehon parbue na parjolo tikki Perayaan Roti na So Marragi dohot tikki Perayaan Pentakosta. Hata “parbue na parjolo” dipakke do muse lao manggombarhon Kristus dohot akka siihuthon ibana na dimiahi.​—1Kor 15:23, surat na di toru; 4Mus 15:21, surat na di toru; Poda 3:9, surat na di toru; Pgk 14:4.

• Pardamean.

  Di Akka Bukku Heber dipaboa do na ikkon lehonon ni akka halak do pelean pardamean asa boi pajonokkon diri tu Debata, jala manomba Ibana. Songon na didok di patik ni si Musa, ikkon dilehon nasida do pelean ganup taon di Ari Pardamean. Ikkon dilehon nasida do i asa boi nasida mardame tu Debata nang pe mardosa dope. Sasittongna akka pelean on manggombarhon pelean ni Jesus na paiasson akka jolma sian dosa sahat tu salelengna. Alani pelean i boi ma jolma mardame tu Jahowa.​—3Mus 5:10; 23:28; Kol 1:20; Heb 9:12.

• Parhitean.

  Sasahalak na padomuhon dua halak na marmusu. Di Bibel, si Musa do na didok gabe parhitean parjanjian Patik jala Jesus ma na gabe parhitean parjanjian baru.​—Gal 3:19; 1Tim 2:5; Heb 12:24.

•  Parhobas.

  Sian hata Junani diakonos. Hata “parhobas” lapatanna halak na mangurupi akka sintua di huria. Di Bibel disurat tudu-tudu na ikkon diihutton sasahalak andorang so gabe parhobas.​—1Tim 3:8-10, 12.

• Parise.

  Sekte ni agama Jahudi na godang ditanda halak tikki di tano on Jesus. Dang pinoppar ni akka malim nasida. Alai diulahon nasida do sude patik ni si Musa dohot akka hasomalan na so adong disurat di patik i. (Mat 23:23) Dang olo nasida mangihutton adat ni halak Junani. Ala siboto Patik do nasida, gabe mabiar do akka halak tu nasida. (Mat 23:2-6) Adong do halak Parise na gabe anggota ni Sanhedrin. Jotjot do nasida marsoal dohot Jesus alani Sabat, alani adat dohot ala na olo Jesus mardongan tu akka pardosa dohot sijalo pajak. Adong do halak Parise na gabe porsea tu Jesus, songon si Saulus na sian Tarsus.​—Mat 9:11; 12:14; Mrk 7:5; Luk 6:2; Ul 26:5.

• Parjanjian.

  Janji na sah na dibahen Debata tu jolma manang janji ni jolma tu halak na asing. Boi do on janji lao mangulahon sada ulaon manang dang mangulahon sada ulaon. Sipata holan sada pihak do na ikkon mangulahon parjanjian i. Digoari ma i parjanjian sada pihak (unilateral, manang janji). Alai adong do muse parjanjian na ikkon diulahon dua pihak, digoari ma on parjanjian dua pihak (bilateral). Di Bibel, dipaboa do taringot tu parjanjian ni Debata tu jolma, parjanjian ni akka jolma, akka marga, dohot akka bangso. Parjanjian na dibahen Debata na massai rikkot, i ma parjanjian tu si Abraham, tu si Daud, tu bangso Israel (parjanjian patik), dohot parjanjian ni Debata tu Israel ni Debata (padan na imbaru).​—1Mus 9:11; 15:18; 21:27; 2Mus 24:7; 2Kron 21:7.

• Partai ni si Herodes.

  Didok do on tu akka halak na mangihutton si Herodes. Di tikki pamarettaon ni Rom, partai on ma na unggodang mangurupi si Herodes. Ra, dohot do deba halak Saduse gabe anggota ni partai on. Jala akka halak na sian partai on do na mangurupi halak Parise lao mambunu Jesus.​—Mrk 3:6.

• Paska.

  Perayaan na diulahon di ari pasappulu opatton di bulan Abib (di pudian ni ari didok do bulan Nisan). Perayaan on dibahen ganup taon gabe parningotan di halak Israel dung kaluar sian tano Mesir. Di perayaan i, diseat do anak ni biru-biru manang hambing, dipanggang, jala dipangan ma i rap dohot sayur na paet dohot roti na so marragi.​—2Mus 12:27; Joh 6:4; 1Kor 5:7.

• Pasung.

  Alat na dipakke lao manghukum sasahalak. Olo do holan patna na dipasung, alai adong do na dohot tanganna, patna, dohot rukkungna.​—Jer 20:2; Ul 16:24.

• Patik.

  On patuduhon Patik na dilehon Jahowa tu halak Israel marhite si Musa tikki di Gurun Sinai taon 1513 SM. (Jos 23:6; Luk 24:44) Alai olo do hata patik on dipakke lao mandok sada sian patik ni si Musa manang dasar ni patik i.​—4Mus 15:16; 5Mus 4:8; Mat 7:12; Gal 3:24.

• Pejabat pengadilan.

  Di pamarettaon ni Babel, akka pejabat pengadilan do na martugas di akka provinsi. Jala diloas do nasida gabe hakim lao pasaehon piga-piga parsoalan. Alai di akka huta na dirajai halak Rom, pejabat pengadilan ma na gabe wakil ni pamaretta. Nasida ma na mangatur parhepengon, manguhum akka parjahat, jala na mangatur asa dame luat i.​—Dan 3:2; Ul 16:20.

• Pelean.

  Na dilehon tu Debata lao mandok mauliate, lao mangakkui hasalaan, jala lao mardame tu Debata. Mulai sian jaman ni si Abel, dang adong dope dibahen aturan lao mangalehon pelean tu Debata. Dung pe adong Patik ni si Musa, asa dibahen aturan taringot tu na mangalehon pelean. Dung dipelehon Jesus ngoluna, dang porlu be halak Kristen mangalehon pelean binatang. Alai adong dope pelean na asing na ikkon toktong lehonon ni halak Kristen tu Debata.​—1Mus 4:4; Heb 13:15, 16; 1Joh 4:10.

• Pelean hamauliateon.

  Pelean na gabe tanda mardongan tu Debata. Dilehon do pelean on, lao mamuji Debata alani sude na nilehonna dohot alani holongna na manoktong. Daging ni binatang na dipelehon, ikkon diallang do rap dohot roti na marragi manang na so marragi. Ikkon habis do diallang daging i di bagasan sadari i.​—2Kron 29:31.

• Pelean hasalaan.

  Pelean on dilehon lao manesa dosa ni sasahalak. Asing do pelean on dohot pelean hasesaan ni dosa na asing. Pelean on ikkon dilehon asa boi sasahalak marhamubaon jala boi ma dapotna akka hakna songon na didok di sada parjanjian. Alana nungnga sanga mago hakna i tikki na mangulahon dosa i ibana. Asing ni i ikkon dilehon do muse pelean  on asa dang dihukum ibana.​—3Mus 7:37; 19:22; Jes 53:10.

• Pelean hasesaan ni dosa.

  Pelean na dipelehon ala mangulahon dosa na so disengaja. Marragam do na boi dipelehon. Boi do dilehon lombu jantan manang darapati, dia ma na tolap lehonon ni halak na mardosa i.​—3Mus 4:27, 29; Heb 10:8.

• Pelean na diayun-ayunhon.

  Pelean na dibahen di tangan ni halak na mangalean pelean i, dung i diayun-ayunhon ma pelean i tu jolo dohot tu pudi. Jala olo do ra, di toru ni tangan ni na mangalean i ma tangan ni malim. Alai, olo do ra malim i na mangayun-ayunhon pelean i. Tikki diayun-ayunhon pelean i tu jolo dohot tu pudi, on patuduhon molo pelean i nungnga diboan tu jolo ni Jahowa.​—3Mus 7:30.

• Pelean pardamean.

  Pelean na dilehon tu Jahowa lao mangido asa mardame tu Ibana. Boi do na mangalehon pelean i mangallang jagal ni binatang na dipelehon i. Songon i nang keluargana, malim na mamelehon i, dohot malim na martugas di tikki i. Ai hira na rap mangan ma na mangalehon pelean i, akka malim, dohot Jahowa. Dijalo Jahowa ma pelean i dos songon tikki manjalo uap ni tabo-tabo na ditutung. Dohot do mudar ni pelean on dilehon tu Jahowa. Ai manggombarhon hangoluan do pelean i.​—3Mus 7:29, 32; 5Mus 27:7.

• Pelean siinumon.

  Anggur na gabe pelean siinumon diusehon tu langgatan raphon akka pelean na asing. Didok si Paulus do ibana gabe pelean siinumon. On patuduhon na rade do ibana mangalehon ngoluna lao mangurupi akka donganna sahaporseaon.​—4Mus 15:5, 7; Plp 2:17.

• Pelean sipanganon.

  Topung na denggan na dibahen gabe pelean, manang boi do gandum manang barli na digongseng, kue golang-golang na dipanggang, manang roti na dibahen di tuangan na datar.

• Pelean situtungon.

  Pelean na ditutung di langgatan. Sude pelean on dipelehon tu Debata. Dang boi buaton ni na mangalehon i manang aha pe sian bagian ni binatang i (lombu jantan, hambing jantan, anduhur manang anak ni darapati).​—2Mus 29:18; 3Mus 6:9.

• Pengawal ni istana.

  Sada punguan ni tentara Rom na gabe pengawal ni kesar Rom. Boi do akka pengawal on mangurupi manang mangalo sahalak kesar.​—Plp 1:13.

• Pengawas.

  Sahalak bawa na mangaradoti jala na mamparrohahon akka ruas di huria. Di bahasa Junani episkopos lapatanna “mengawasi lao manjaga”. Sarupa do hata “pengawas” tu hata “sintua” (presbyteros). Hata “sintua” patuduhon halak na togu parale-aleonna tu Debata. Jala hata “pengawas” patuduhon akka tugasna di huria.​—Ul 20:28, surat na di toru; 1Tim 3:2-7, surat na di toru; 1Ptr 5:2, surat na di toru.

• Penjepit ni sumbu.

  Penjepit na dibahen sian mas. Dipakke do on di tabernakel dohot di bagas joro lao pamatehon api ni lampu na adong disi.​—2Mus 37:23.

• Pentakosta.

  On ma perayaan na paduahon sian tolu perayaan na ikkon diulahon sude bawa halak Jahudi di Jerusalem. Hata “Pentakosta” lapatanna “Ari Palimapuluhon”. Di Akka Bukku Junani Kristen, didok ma on “Pentakosta”. Di Akka Bukku Heber, didok ma on Perayaan di Mula ni Musim Panen manang Perayaan dung Pitu Minggu. Perayaan on dibahen di ari palimapuluhon sian tanggal 16 Nisan.​—2Mus 23:16, surat na di toru; 34:22; Ul 2:1.

• Peramal.

  Halak na mandok dirina boi paboahon aha na lao masa di ari na naeng ro. Di Bibel halak na mangulahon ilmu gaib, halak na boi makkatai tu halak na mate, halak na paboahon aha na lao masa marhite parhusor ni akka bintang dohot halak na asing didok do i peramal.​—3Mus 19:31; 5Mus 18:11; Ul 16:16.

• Perayaan di Mula ni Musim Panen; Perayaan Dung Pitu Minggu.​—

  Ida PENTAKOSTA.

• Perayaan Pabadiahon Bagas Joro.

  Parningotan na diulahon ganup taon lao paiasson bagas joro ala nungnga ramun dibahen si Antiokhus Epifanes. Dimulai ma perayaan i tanggal 25 Khislew jala diulahon ma i saleleng ualu ari.​—Joh 10:22.

• Perayaan Pondok Daun.

  Digoari do on muse Perayaan Tabernakel manang Perayaan dung Pitu Minggu. Perayaan on dibahen di tanggal 15-21 bulan Etanim, lao marlas ni roha jala mandok mauliate ala nungnga dipasu-pasu Jahowa panen ni nasida. Dibahen do on di ujung ni musim panen. Tikki perayaan, ikkon tinggal di sopo-sopo nasida, asa diingot nasida songon dia ngoluna tikki kaluar sian Mesir. On ma sada sian tolu perayaan di Israel na mambahen akka bawa ikkon lao tu Jerusalem lao mangarayahon i.​—3Mus 23:34; Esr 3:4.

•  Perayaan Roti na So Marragi.

  On ma perayaan na parjolo sian tolu perayaan na ikkon diulahon halak Israel. Dimulai ma on tanggal 15 Nisan sadari dung sae Paska, jala saleleng pitu ari ma on diulahon. Holan roti na so marragi do na boi diallang nasida tikki i, lao paingotton nasida tikki kaluar sian tano Mesir.​—2Mus 23:15; Mrk 14:1.

• Perlengkapan porang.

  Perlengkapan porang na dipakke tentara, i ma takkuluk bosi, baju partahanan, ikkat pinggang, sipatu, dohot perisai.​—1Sam 31:9; Eps 6:13-17.

• Persia; Halak Persia.

  Luat manang halak Persia jotjot do didok rap dohot Media. Jala adong do ra kaitan ni na dua on. Mulana holan di luat na di sabola selatan ni Iran do Persia on. Alai tikki di pamarettaon ni si Kores Agung, gabe dirajai halak Persia ma halak Media. Adong do na mandok molo bapak ni si Kores i halak Persia jala omakna halak Media. Ditaluhon si Kores ma pamarettaon ni Babel di taon 539 SM. Di tikki i diloas ibana ma halak Jahudi mulak tu huta ni nasida. Luat na dirajai halak Persia, i ma mulai sian Sunge Indus na di sabola timur sahat tu Laut Aegea na di sabola barat. Persia ma na mangarajai halak Jahudi sahat tu na ditaluhon si Aleksander Agung Persia di taon 331 SM. Alai andorang so masa i nungnga dipaboa si Daniel hian marhite parnidaan taringot harajaon ni Persia i. Jala dipaboa do muse i di bukku Esra, Nehemia, dohot Ester. (Esr 1:1; Dan 5:28; 8:20)​—Ida Lampiran B9.

• Pim.

  Batu timbangan manang arga na dipakke halak Palistim lao patajompon akka alat na sian bosi. Tikki digali akka batu na di Israel, dapot ma akka batu na marsurat hata “pim” mamakke bahasa Heber. Borat ni akka batu i hira-hira 7,8 gram, manang dua partolu sekel.​—1Sam 13:20, 21, surat na di toru.

• Porneia.​—

  Ida SEKS NA SO PATUT.

• Poti parpadanan.

  Poti na dibahen sian hau akasia jala dilappis dohot mas. Dibahen do poti on di Inganan na Massai Badia di tabernakel. Alai di pudian ni ari dipapinda ma poti on tu bagas joro na dipajongjong si Salomo. Dibahen ma poti i di Inganan na Massai Badia na di bagas joro i. Sian mas do panutup ni poti on jala adong do dua patung ni kerubim na marsiadop-adopan di ginjangna. Di bagasan poti i do dibahen dua batu panuratan ni patik i. (5Mus 31:26; 1Raj 6:19; Heb 9:4)​—Ida Lampiran B5 dohot B8.

• Prokonsul.

  Sasahalak na mamarenta di sada provinsi jala na diawasi Senat Romawi. Boi do sahalak gubernur gabe hakim manang komandan. Nang pe ikkon tunduk ibana tu Senat Romawi, alai pangkatna do na untimbo di provinsi na dirajai ibana.​—Ul 13:7, surat na di toru; 18:12, surat na di toru.

• Proselit.

  Halak na margatti agama. Di Bibel, hata on lapatanna halak na mangihutton agama Jahudi. Molo sahalak bawa do ibana, ikkon jolo disunat do ibana asa boi gabe proselit.​—Mat 23:15, surat na di toru; Ul 13:43, surat na di toru.

• Psalmen.

  Ende puji-pujian tu Debata. Dipakke do akka alat musik lao mangendehon psalmen tikki manomba Debata. Jala diendehon do on tikki mamuji Debata Jahowa di bagas joro na di Jerusalem.​—Luk 20:42; Ul 13:33; Jak 5:13, surat na di toru.

• Psykhe.​—

  Ida NEFES.

• Pualam.

  Botol na gelleng na marisi miak na angur jala arga. Botol on dibahen sian batu na di jonok ni Alabastron na di Mesir. Somalna boi do ditutup botol on asa unang use miak i. Jala batu na dipakke lao mambahen batu on pe digoari do pualam.​—Mrk 14:3, surat na di toru.

• Puasa; Marpuasa.

  Dang mangallang manang aha saleleng tikki naung ditottuhon. Halak Israel marpuasa di tikki Ari Pardamean, tikki adong hasusaan jala tikki naeng mangido tudu-tudu sian Debata. Opat hali ma halak Jahudi marpuasa di bagasan sataon, lao marningot hasusaan na hea dihilala nasida. Alai dang disuru halak Kristen marpuasa.​—Esr 8:21; Jes 58:6; Luk 18:12.

• Pulpen.

  Alat na dipakke asa tanda surat na dibahen di tano liat manang di lilin. (Ps 45:1; Jes 8:1; Jer 8:8) Adong do pulpen na dibahen sian logam manang sian bahan na asing na karas, ala dipakke pulpen i lao manurat di atas ni batu manang di atas ni logam.​—Job 19:24; Jer 17:1.

• Purim.

  Perayaan na dirayahon ganup taon di tanggal 14 dohot 15 di bulan Adar. Dibahen do perayaan on gabe parningotan di halak Jahudi ala nungnga dipalua nasida di tikki ni Ratu Ester. Hata Purim (dang bahasa Heber hata on) lapatanna “undi”. Di tikki i, dibahen si Haman do undi lao  manottuhon sadihari pasautonna rencanana lao pamatehon sude halak Jahudi. Alani i ma didok perayaan on, Perayaan Purim manang Perayaan Undi.​—Est 3:7; 9:26.

R

• Ragi.

  Molo dipamasuk ragi tu topung, kombang ma i. Manang molo dibahen tu siinumon, gabe maralkohol ma siinumon i. Di Bibel, jotjot do on manggombarhon dosa. Sipata on manggombarhon siihuthon Kristus na lam martamba na so pamotoanta.​—2Mus 12:20; Mat 13:33; Gal 5:9.

• Rahab.

  Sada istilah na adong di bukku Job, Psalmen, dohot bukku Jesaya. (Alai on, dang borua na margoar si Rahab na disurat di bukku Josua.) Molo di bukku Job, Rahab na nidokna, i ma binatang na balga na mangolu di laut. Jala di akka ayat na asing dipakke do binatang i lao manggombarhon Kota Mesir.​—Job 9:13; Ps 87:4; Jes 30:7; 51:9, 10.

• Rahasia na badia.

  Rencana ni Debata na so dipaboa dope sahat tu tikki na ditottuhon. Jala holan tu akka halak na dipillit Ibana do on dipaboa.​—Mrk 4:11; Kol 1:26.

• Ramun.

  Boi do na nidokna daging ni sasahalak na kotor manang halak na so hasea pangalahona. Molo di Bibel, jotjot do dipakke hata i lao mandok ulaon na so boi diulahon manang ulaon na so ias menurut Patik ni si Musa. (3Mus 5:2; 13:45; Ul 10:14; Eps 5:5)​—Ida IAS.

• Ratu Surga.

  Gelar ni dewi na disomba ni halak Israel naung manimbil sian Debata di tikki ni si Jeremia. Adong na mandok sarupa do on tu dewi Istar (Astarte), i ma dewi ni halak Babel. Goar ni dewi ni halak Sumer na sarupa tuson, i ma Inanna, lapatanna “Ratu surga”. Didok akka halak do dewi on parhuaso ni surgo. Alai dang holan i, didok nasida do muse molo dewi on boi mambahen sahalak borua marianakkon. Jala adong do tong sada ukiran di Mesir na mandok Astarte on “Permaisuri Surga”.​—Jer 44:19.

• Roti pelean.

  Sappulu dua roti na disusun di meja na di Inganan na Badia na adong di tabernakel dohot di bagas joro. Disusun ma i gabe dua baris, jala onom be ma dibahen sabaris. Dipelehon do i tu Debata jala digatti do i ganup ari Sabat. Jala somalna holan malim do na boi mangallang roti naung digatti i. (2Kron 2:4; Mat 12:4; 2Mus 25:30; 3Mus 24:5-9; Heb 9:2)​—Ida Lampiran B5.

• Ruach; Pneuma.

  Bahasa Heber do Ruach jala bahasa Junani do Pneuma. Molo di Bibel bahasa Batak Toba diterjemahon do hata on gabe “tondi”. Alai dang pas terjemahon on, alana boi do gabe mangajarhon ajaran na sala taringot tondi na so ra mate. (Ps 146:4) Arti ni dua hata i, i ma “hosa”. Jala boi do muse dua hata i mangartihon, (1) alogo, (2) hosa ni toppaan na mangolu, (3) roha manang pikkiran na manjujui jolma mandok hata manang mangulahon sada ulaon, (4) surirang manang parnidaan sian Debata, (5) Jahowa, Jesus, suru-suruan, dohot suru-suruan na jahat, (6) tondi parbadia. (2Mus 35:21; Ps 104:29; Mat 12:43; Luk 11:13) Alani i ma di terjemahan ni Bibel on, diterjemahon do hata i sesuai tu konsteksna.

• Rubah.

  Binatang na songon biang. Pendek patna, ganjang pinggolna, jala gok ibbulu ni ihurna. Ditanda do binatang on, binatang na licik.

S

• Sabat.

  Di bahasa Heber lapatanna “maradi; so”. On ari papituhon di halak Jahudi, i ma mulai sian ari Jumat botari sahat tu ari Sabtu botari. Perayaan di taon papituhon dohot di taon palimapuluhon pe didok do Sabat. Di Ari Sabat dang adong halak na boi karejo. Holan akka malim do na boi mangulahon ulaonna di inganan na badia. Molo dapot taon Sabat, dang boi tano diula. Jala dang boi halak Heber dipaksa manggarar utang di tikki i. Sasittongna molo di Patik ni si Musa, massai denggan jala masuk akal do dibahen aturan taringot tu Sabat. Alai di tikki ni Jesus, ditambai akka pamimpin agama do aturan taringot tu Sabat. Ujungna gabe lam maol ma akka halak mangulahon Sabat.​—2Mus 20:8; 3Mus 25:4; Luk 13:14-16; Kol 2:16.

• Saduse.

  Sekte ni agama Jahudi na tarbarita jala berpengaruh besar do nasida tu akka ulaon di bagas joro. Halak na mora dohot akka malim do na godang mangihutton sekte on. Akka halak na mangihutton sekte Saduse on dang olo mangihutton hasomalan dohot haporseaon ni halak Parise. Dang porsea nasida na adong haheheon, dang porsea nasida adong suru-suruan, jala dialo nasida do na nidok ni Jesus.​—Mat 16:1; Ul 23:8.

• Sahit na masa di godang inganan.

  Na didokna i ma sahit manang aha pe na hatop bali tu halak na asing jala on boi  mambahen akka halak mate. Jotjot do sahit na posi on dipakke Debata lao menghukum akka halak.​—4Mus 14:12; Hes 38:​22, 23; Am 4:10.

• Sahit ni suan-suanan.

  Sahit ni suan-suanan na nidokna dison i ma sahit na binahen ni jamur. Dibuat jamur i ma sipanganon dohot aek na adong di suan-suanan i. Adong na mandok jamur sisongon on i ma jamur karat na birong (Puccinia graminis).​—1Raj 8:37.

• Samaria.

  Di Dolok Samaria do dipajongjong kota Samaria. Saleleng 200 taon, kota Samaria ma na gabe ibukota ni Israel na sappulu marga. Jala didok do sude luat i Samaria. Di tikki ni Jesus, Samaria i sada provinsi na adong di holang-kolang ni Galilea na di utara dohot Judea na di selatan. Somalna molo lewat Jesus sian luat i, dang marbarita ibana disi. Alai hea do ibana sahali marbarita tu akka halak na di luat i. Jala si Petrus pe, dipakke do kunci Harajaon na paduahon tikki dijalo halak Samaria tondi parbadia sian Debata. (1Raj 16:24; Joh 4:7; Ul 8:14)​—Ida Lampiran B10.

• Sanhedrin.

  Pengadilan tertinggi ni halak Jahudi na di Jerusalem. Di tikki ni Jesus, adong ma 71 halak na gabe anggota ni Sanhedrin. Na dohot gabe anggota ni Sanhedrin on, i ma sintua ni malim, malim kepala manang halak na hea gabe sintua ni malim, keluarga ni sintua ni malim, akka pangituai, akka pamimpin ni ganup marga, akka pamimpin ni ganup keluarga, dohot akka siboto surat.​—Mrk 15:1; Ul 5:34; 23:1, 6.

• Saparsappulu.

  Sappulu porsen bagian na ikkon dilehon halak Israel. (Mal 3:10; 5Mus 26:12; Mat 23:23; Heb 7:5) Di Patik ni si Musa, ikkon dilehon nasida do ganup taon saparsappulu sian panen ni nasida manang sian binatang na dipiaro nasida tu halak Lepi. Dilehon do na saparsappulu i gabe bagian ni halak Lepi. Dung i dilehon halak Lepi ma saparsappulu sian i tu akka malim pinoppar ni si Aron. Adong do muse aturan na asing taringot mangalehon saparsappulu. Alai dang dohot be halak Kristen mangalehon saparsappulu.

• Sea.

  Ukuran na dipakke lao manakkar biji-bijian. Molo dipatudos tu ukuran bat na dipakke lao mangukkur cairan, sarupa ma sada sea tu 7,33 liter. (2Raj 7:1)​—Ida Lampiran B14.

• Sebat.

  Dung kaluar sian Babel, on ma goar ni bulan na pasappulu sadahon di kalender ni halak Jahudi, jala goar ni bulan na palimahon di kalender umum. Molo dipatudos tu saonari, di mulai ma i sian parsitongaan ni bulan Januari sahat tu parsitongaan ni bulan Februari. (Sak 1:7)​—Ida Lampiran B15.

• Sekel.

  Mata uang na dipakke halak Heber jala ukkuran na dipakke gabe satuan berat. Sada sekel, boratna dos ma i tu 11,4 gram. Istilah “sekel na badia” dipakke lao patuduhon ikkon pas do boratna jala ikkon sesuai do ukkuranna tu ukkuran na dipakke di tabernakel. Adong do muse sekel harajaon manang ukuran berat na dipakke di istana jala asing do on tu sekel na somal.​—2Mus 30:13.

• Seks na so patut.

  Bahasa Junanina porneia, na patuduhon sude ulaon seks na so patut. Uppamana mangalakkup, halak na so marhasohotan hape mangulahon seks, bawa na mangulahon seks dohot bawa, borua na mangulahon seks dohot borua, manang halak na mangulahon seks dohot binatang. Di bukku Pangungkapon dipatudos do agama na so sittong songon boru-boru na so hasea. Ai marale-ale do agama na so sittong tu pamaretta na di portibi on lao mangalului uttung dohot hamoraon. (Pgk 14:8; 17:2; 18:3; Mat 5:32; Ul 15:29; Gal 5:19)​—Ida BORU-BORU NA SO HASEA.

• Sekte.

  Sada punguan na porsea tu ajaran ni sasahalak manang ajaran ni agama. Adong dua sekte ni agama Jahudi, i ma sekte Parise dohot sekte Saduse. Didok halak na so Kristen do molo halak Kristen “sekte ni halak Nasaret”. Ai didok roha ni nasida, nungnga manimbil halak Kristen sian agama Jahudi. Di pudian ni ari, adong do akka sekte na baru sian tonga-tonga ni halak Kristen. Di bukku Pangungkapon, didok ma i “sekte Nikolaus”.​—Ul 5:17; 15:5; 24:5; 28:22; Pgk 2:6; 2Ptr 2:1.

• Sela.

  Istilah musik na mulak-ulak disurat di bukku Psalmen dohot bukku Habakuk. Lapatanna, i ma so satokkin tikki marende manang marmusik. Tujuanna lao mangarimangi manang mangattusi isi ni ende i. Molo di Septuaginta Junani, hata on diterjemahon gabe diapsalma, lapatanna “so satokkin tikki marmusik”.​—Ps 3:4; Hab 3:3.

• Serapim.

  Sian bahasa Heber do hata on, lapatanna, “Na Marsigorgor”. Suru-suruan na marhobas di sakaliling ni tahta ni Jahowa na di surgo do serapim on.​—Jes 6:2, 6.

•  Setan.

  Na nidokna dison i ma Sibolis, musu ni Debata. Sian bahasa Heber do hata on, lapatanna i ma “Pangalo”.​—Job 1:6; Mat 4:10; Pgk 12:9.

• Sibolis.

  Di Akka Bukku Junani Kristen, gelar Sibolis dipakke lao mandok Setan. Lapatan ni Sibolis, i ma “Pargabus”. Didok do ibana Sibolis ala sian ibana ma haroro ni gabus taringot tu Jahowa, taringot tu hata ni Debata, dohot taringot tu goar ni Debata na badia i.​—Mat 4:1; Joh 8:44; Pgk 12:9.

• Sida-sida.

  Lapatanna i ma bawa na dikasing. Somalna dipillit do akka bawa sisongon i lao gabe parkarejo di istana ni raja manang lao gabe pangurupi ni ratu manang gundik ni raja. Alai dipakke do muse istilah on lao tu akka halak na dipillit lao mangulahon tugas di istana ni raja. Alai sasittongna dang na dikasing bawa i. Jala dipakke do muse istilah on gabe gombaran tu akka halak “na mamillit dang marhasohotan alani Harajaon banua ginjang” i, i ma akka halak na mangorom dirina asa boi mangalehon gumodang tikki lao marhobas tu Debata.​—Mat 19:12; Est 2:15; Ul 8:27, surat na di toru.

• Sihapor.

  Hama na jotjot marpungu-pungu jala marpinda-pinda. Mangihutton Patik ni si Musa, boi do sihapor dipangan. Didok do ro bala molo ro sapunguan sihapor mangallang manang manegai suan-suanan di sada inganan.​—2Mus 10:14; Mat 3:4.

• Sijahat.

  Istilah na dipakke lao mandok Sibolis. Dialo Sibolis do Debata jala dilanggar ibana do aturan naung dibahen Debata.​—Mat 6:13; 1Joh 5:19, surat na di toru.

• Silehon-lehon.

  Nang pe dang takkas paretta on dibahen di Akka Bukku Heber, alai adong do patik na dilehon tu halak Israel asa olo nasida mangurupi akka na pogos.​—Mat 6:2.

• Sinagoga.

  On lapatanna “papunguhon; parpunguan”. Alai di godangan ayat, on patuduhon inganan parpunguan ni halak Jahudi. Disi ma nasida manjaha hata ni Debata, manangihon tudu-tudu, marbarita na uli, jala martangiang. Tikki di tano on Jesus, adong sinagoga di akka kota na balga di Israel. Di kota na umbalga, olo do adong piga-piga sinagoga.​—Luk 4:16; Ul 13:14, 15.

• Sintua ni malim.

  Di patik ni si Musa dipaboa sintua ni malim do na pasahatton pangidoan ni halak Israel tu Debata jala na mangaradoti akka malim na asing. Didok do nasida “malim kepala”. (2Kron 26:20; Esr 7:5) Holan sintua ni malim do na boi masuk tu Inganan na Massai Badia, i ma inganan na sumurung di tabernakel nang di bagas joro. Holan sahali do ibana masuk tusi, i ma di Ari Pardamean. Didok do muse Jesus Kristus “sintua ni malim”.​—3Mus 16:2, 17; 21:10; Mat 26:3; Heb 4:14.

• Sintua; Pangituai.

  Halak naung matua. Alai molo di Bibel na nidokna i ma sahalak bawa na martanggung jawab di sada huta manang sada bangso. Dipaboa di bukku Pangungkapon, adong do akka sintua di surgo. Hata Junani presbyteros diterjemahon gabe hata “sintua”, molo na nidokna i ma sasahalak na mangurupi manang na martanggung jawab di huria.​—2Mus 4:29; Poda 31:23; 1Tim 5:17; Pgk 4:4.

• Sion; Dolok Sion.

  Goar ni kota na marbenteng. Kota ni halak Jebus do kota on jala di dolok na adong di sabola tenggara ni Jerusalem do posisi ni kota on. Dung ditaluhon si Daud akka halak na di kota i, dipajongjong ibana ma disi istanana. Ujungna dibahen ma goar ni kota i, “Kota ni si Daud”. (2Sam 5:7, 9) Gabe dolok na badia ma Dolok Sion dung dipapinda si Daud poti parpadanan tusi. Di pudian ni ari, bagas joro na di Dolok Moria pe didok do Sion. Di Akka Bukku Junani Kristen, jotjot do dipakke hata “sion” gabe gombaran.​—Ps 2:6; 1Ptr 2:6; Pgk 14:1.

• Sipan.

  Dung kaluar sian Babel, on ma goar ni bulan na patoluhon di kalender ni halak Jahudi, jala goar ni bulan na pasiahon di kalender umum. Molo dipatudos tu saonari, dimulai ma i sian parsitongaan ni bulan Mei sahat tu parsitongaan ni bulan Juni. (Est 8:9)​—Ida Lampiran B15.

• Siria; Halak Siria.​—

  Ida ARAM; HALAK ARAM.

• Sirtis.

  Dua pantai na bidang jala na jeppek na adong di pesisir Libia, Afrika Utara. Di toru ni aek i, godang do pasir na pungu ala diboan galumbang ni laut. Alani i, mabiar do parlaut mamolus sian i ala boi sega kapal dibahen pasir i. (Ul 27:17)​—Ida Lampiran B13.

• Sitopa hudon.

  Halak na mambahen piring, makkuk, manang baskom sian tano liat. Di bahasa Heber lapatanna “na mambentuk”. Lomo ni roha ni sitopa hudon lao mambahen tano liat gabe manang aha. Dipatudos ma i songon hak ni Jahowa lao mamaretta ganup halak manang ganup bangso.​—Jes 64:7; Rom 9:21.

•  Siw.

  Di mulana, on ma goar ni bulan na paduahon di kalender ni halak Jahudi, jala on ma bulan na paualuhon di kalender umum. Molo dipatudos tu saonari, di mulai ma i sian parsitongaan ni bulan April sahat tu parsitongaan ni bulan Mei. Alai didok do on bulan lyar di Talmud (bukku taringot patik ni halak Jahudi) dohot di akka surat asing na dibahen dung kaluar halak Israel sian Babel. (1Raj 6:37)​—Ida Lampiran B15.

• Sorban.

  Abit na dililit tu ulu ni sasahalak lao manutupi uluna. Dipakke malim do sorban na sian abit linen na halus. Di bagian jolo ni sorban i, adong lempengan mas na diikkat mamakke tali warna biru. Dipakke sahalak raja do sorban di toru ni mahkotana. Dipakke si Job do hata sorban lao patuduhon na sittong do akka ulaonna.​—2Mus 28:36, 37; Job 29:14; Hes 21:26.

• Stoa.

  Sikkola filsafat na adong di Junani. Nasida porsea molo naeng marlas ni roha sasahalak, ikkon pikkiranna sandiri do na diihutton ibana. Didok nasida, halak na marbisuk, i ma halak na so parduli susa manang sonang.​—Ul 17:18.

• Suan-suanan na paet.

  Istilah on manggombarhon hasil na so denggan na ikkon taonon ni sasahalak ala dang hasea pangalahona. Manang lao manggombarhon hasusaan ala diparhatoban, ala dang adil sada keputusan, jala ala manimbil sasahalak sian Debata.​—5Mus 29:18; Poda 5:4; Jer 9:15; Am 5:7, surat na di toru.

• Sumpa; Marsumpa.

  Marsumpa do sasahalak lao patuduhon na tutu do hatana manang janjina. Somalna marhite na umtimbo do halak marsumpa. Umpamana, marsumpa marhite Debata. Marsumpa do Jahowa lao patuduhon na tutu do parjanjianna tu si Abraham.​—1Mus 14:22; Heb 6:16, 17.

• Sunat.

  Mambolokkon kulit luar ni alat kelamin ni bawa. Ulaon on diparettahon tu si Abraham dohot tu akka pinomparna. Alai dang ikkon ulahonon ni halak Kristen on. Di akka ayat na asing dipakke do hata on gabe tudosan.​—1Mus 17:10; 1Kor 7:19; Plp 3:3.

• Superskripsi.

  Hata na adong di mula ni piga-piga Psalmen. Dibahen do i lao paboahon ise panurat ni Psalmen i, situasi tikki disurat Psalmen i, jenis musik na dipakke, jala tujuan ni psalmen i dibahen.​—Ida superskripsi ni Psalmen 3, 4, 5, 6, 7, 30, 38, 60, 92, 102.

• Surat na badia.

  Hata ni Debata na disuratton. Jala holan di Akka Bukku Junani Kristen do disurat hata “Surat na Badia”.​—Luk 24:27; 2Tim 3:16.

• Surirang.

  Barita na sian Debata na paboahon taringot na lao ulahononna. Olo do sipata surirang marisi ajaran, paretta ni Debata, panguhumanna, dohot akka na lao masa di ari na naeng ro.​—Hes 37:9, 10, surat na di toru; Dan 9:24, surat na di toru; 2Ptr 1:20, 21, surat na di toru.

• Suru-suruan.

  Sian bahasa Heber malakh jala di bahasa Junani aggelos, lapatanna “suruan”. Alai diterjemahon do on gabe “suru-suruan” molo mandok akka suruan na adong di surgo. (1Mus 16:7; 32:3; Jak 2:25; Pgk 22:8) Massai gogo do akka suru-suruan. Andorang so ditoppa Debata jolma, nungnga ditoppa suru-suruan. Di Bibel didok do nasida “marpulu ribu akka suru-suruan na badia”, “anak ni Debata”, dohot “bintang manogot-nogot”. (5Mus 33:2; Job 1:6; 38:7) Sada-sada do nasida ditoppa jala dang na lao markeluarga nasida ditoppa. Saratus juta lobi ma godang ni nasida. (Dan 7:10) Didok di Bibel, adong do goar ni nasida ganup marsada-sada jala dang sarupa parange ni nasida. Serep do roha ni nasida jala dang olo disomba. Jala godangan sian nasida, dang olo paboahon goarna. (1Mus 32:29; Luk 1:26; Pgk 22:8, 9) Marasing-asing do tugas dohot tanggung jawabna. Adong do na marhobas di jolo ni tahta ni Jahowa, pasahatton barita sian Debata, mangurupi akka naposo ni Jahowa na di tano on, mangulahon panguhuman ni Debata, jala mangurupi ulaon marbarita na uli. (2Raj 19:35; Ps 34:7; Luk 1:30, 31; Pgk 5:11; 14:6) Di tikki na naeng ro, dohot do nasida marporang rap dohot Jesus di Armagedon.​—Pgk 19:14, 15.

• Suru-suruan na jahat.

  Suru-suruan hian do nasida ditoppa Debata jala dang jahat. Di Judas 6 didok do nasida “suru-suruan” jala di 1Musa 6:2 didok do nasida “akka anak ni Debata na sittong”. Alai di pudian ni ari gabe dibahen nasida do nasida musu ni Debata marhite dang mangoloi Debata di jaman ni si Noak. Jala diihutton nasida do Sibolis lao mangalo Jahowa.​—5Mus 32:17; Luk 8:30; Ul 16:16; Jak 2:19.

• Syeminit.

  Istilah musik na lapatanna, “paualuhon”. Dipakke do on lao mandok nada rendah manang nada oktaf na rendah. Molo  dipakke hata on tu alat musik, olo do ra na nidokna akka alat musik na menghasilkan soara bas. Jala molo dipakke hata on tu ende, olo do ra na nidokna ikkon di nada rendah do diendehon akka ende i.​—1Kron 15:21; Ps 6:Sup; 12:Sup.

• Syeol.

  Bahasa Heber do hata on jala sarupa do lapatanna tu hata “Hades” na di bahasa Junani. Di terjemahon do on gabe “Kuburan” (disurat mamakke huruf besar). Na nidokna dison kuburan secara umum do, dang lao mandok kuburan ni sasahalak.​—1Mus 37:35; Ps 16:10; Ul 2:31, surat na di toru.

T

• Tabernakel.

  Kemah na boi diboan marpinda-pinda. Mulai sian kaluar halak Israel sian Mesir, dipakke halak Israel do kemah on lao manomba Debata. Dibahen do tabernakel on gabe inganan ni poti parpadanan ni Jahowa na manggombarhon haroro ni Jahowa. Jala di tabernakel on ma halak Israel mangalehon pelean dohot manomba Debata. Didok do on tong “kemah parpunguan”. Rangkana dibahen sian hau jala ditutup ma i pakke abit linen. Disulam do gambar ni kerubim di abit linen i. Dibahen do disi dua ruangan, na parjolo didok ma i Inganan na Badia, jala na paduahon didok ma Inganan na Massai Badia. (Jos 18:1; 2Mus 25:9)​—Ida Lampiran B5.

• Talenta.

  Mata uang dohot ukkuran na umbalga na dipakke halak Israel lao mamboto borat ni sada barang. Sarupa do borat ni sada talenta tu 34,2 kilogram. Alai molo di halak Junani unggeleng do ukkuran ni talenta, sada talenta dos ma i tu 20,4 kilogram. (1Kron 22:14; Mat 18:24)​—Ida Lampiran B14.

• Tamborin; Martamborin.

  Alat musik na gelleng. Lao mamakke on, ikkon ditiop jala diattuk-attuk. Sian kulit ni binatang manang sian perkamen do on dibahen. Dung i dilappishon ma i tu hau manang tu logam.

• Tamus.

  (1) Goar ni dewa na diandungi akka borua Ibrani na di Jerusalem naung manimbil sian Debata. Adong halak na mandok sahalak raja hian do Tamus on. Alai dung mate ibana, dibahen ma gabe Dewa. Didok halak Sumer do on Dumuzi, i ma hallet ni dewi Inanna (dewi Istar na disomba halak Babel) na didok nasida boi mambahen borua marianakkon. (Hes 8:14) (2) Dung kaluar sian Babel, on ma goar ni bulan na paopatton di kalender ni halak Jahudi, jala goar ni bulan na pasappuluhon di kalender umum. Molo dipatudos tu saonari, di mulai ma i sian parsitongaan ni bulan Juni sahat tu parsitongaan ni bulan Juli.​—Ida Lampiran B15.

• Tanda.

  Ulaon manang situasi na so somal masa, na adong lapatanna. Boi do on manggombarhon manang patuduhon akka naung masa manang akka na lao masa.​—1Mus 9:12, 13; 2Raj 20:9; Mat 24:3; Pgk 1:1.

• Tanda halongangan.

  Ulaon na so tolap diulahon jolma. Ikkon Debata manang na marhuaso na balga do na boi mangulahon on.​—Mat 11:20; Ul 4:22; Heb 2:4.

• Tanduk.

  Na didokna i ma tanduk ni binatang. Dipakke do on gabe inganan ni siinumon, inganan ni miak, manang inganan ni tinta manang kosmetik. Jala dipakke do on gabe alat musik manang alat lao paboahon sada tanda. (1Sam 16:1, 13; 1Raj 1:39) Sipata dipakke do hata “tanduk” lao manggombarhon taringot tu gogo, taringot tu na manaluhon, manang hamonangan.​—5Mus 33:17; Mik 4:13; Sak 1:19.

• Tanduk na di langgatan.

  Na didokna i ma ukiran na songon tanduk na dibahen di opat sudut ni langgatan. (3Mus 8:15; 1Raj 2:28)​—Ida Lampiran B5 dohot B8.

• Taon Yobel.

  On ma ganup 50 taon dung masuk halak Israel tu luat na dijanjihon. Di tikki taon Yobel dang boi nasida marsuan jala ikkon dipaulak nasida do akka hatoban ni nasida halak Heber. Di taon Yobel ikkon dipaulak do muse akka tano warisan naung dijual. Jala dirayahon do taon Yobel on. On ma taon haluaon alana di tikki i boi ma muse mulak ngolu ni bangso i dos songon di tikki dipillit Debata nasida gabe bangsona.​—3Mus 25:10.

• Tardidi; Pandidion.

  Lapatan ni hata on, i ma “dibonompon” di aek. Jesus mandok, ikkon tardidi do halak na lao gabe siseanna. Dipaboa do muse di Bibel taringot tu pandidion ni si Johannes, pandidion marhite tondi parbadia, pandidion marhite api, dohot na asing.​—Mat 3:11, 16; 28:19; Joh 3:23; 1Ptr 3:21.

• Tarompet.

  Alat na dibahen sian logam jala diombus tikki mamakke. Dipakke do on gabe alat musik manang alat lao mangalehon tanda. Menurut 4 Musa 10:2 adong tudu-tudu na dilehon Jahowa tu halak Israel asa dibahen dua tarompet na sian perak. Dipakke ma akka tarompet lao  mangalehon boa-boa tu bangso i lao marpungu, mambongkar kemah, dohot paboahon boa-boa lao marporang. Ra tarompet on lurus do, dang songon tarompet na dibahen sian tanduk ni binatang. Adong do tarompet na dipakke gabe alat musik di bagas joro, alai dang pola dipaboa sian dia dibahen akka tarompet i. Jotjot do didok di Bibel, hira na diombus do tarompet tikki dipaboa Debata panguhumanna manang akka ulaonna na asing.​—2Kron 29:26; Esr 3:10; 1Kor 15:52; Pgk 8:7–11:15.

• Tartarus.

  Di Akka Bukku Junani Kristen, hata “Tartarus” lapatanna dibahen gabe lea songon na dihurung di penjara. Hira na disampatton tu inganan i ma akka suru-suruan na jahat di tikki ni si Noak. Di 2 Petrus 2:4, hata ‘disampatton tu Tartarus’ dang na patuduhon disampatton “akka suru-suruan na mardosa” i tu sada inganan na margoar Tartarus na dihaporseai na so sisomba Jahowa (penjara na golap na di toru ni tano, inganan ni akka dewa na hurang sangap). Alai on patuduhon nungnga dibahen Debata nasida marlea ala nungnga diusir sian surgo. Alani i gabe hira na golap ma pikkiran ni nasida jala dang boi be mangattusi lomo ni roha ni Debata. Dipaboa di Bibel, na lao diripasson ma nasida rap dohot pemimpin ni nasida, i ma Sibolis. Alani i, Tartarus lapatanna dang diloas be suru-suruan na jahat i mangulahon lomo ni roha ni Debata. Dang sarupa Tartarus tu lobbang na massai bagas na disurat di Pangungkapon 20:1-3.

• Tebet.

  Dung kaluar sian Babel, on ma goar ni bulan na pasappuluhon di kalender Jahudi, jala goar ni bulan na paopatton di kalender umum. Molo saonari, mulai ma i sian parsitongaan ni bulan Desember sahat tu parsitongaan Januari. Jotjotan langsung do didok on “bulan na pasappuluhon”. (Est 2:16)​—Ida Lampiran B15.

• Terapim.

  Patung na disomba sada keluarga jala dipakke lao mangido tudu-tudu. (Hes 21:21) Adong do na balga ukuranna songon jolma jala bentukna pe songon jolma, alai adong do tong na gelleng. (1Mus 31:34; 1Sam 19:13, 16) Arkeolog mandok molo di Mesopotamia, ikkon adong do patung terapim ni sasahalak asa boi ibana mandapot warisan. (Alani i do ra dibuat si Rahel patung terapim ni bapakna.) Alai dang boi adong patung terapim di Israel. Nang pe songon i, hea do adong patung terapim on di Israel di tikki ni akka panguhum dohot akka raja. Dohot do akka patung on dihancurhon Raja Josia na setia.​—Pangh 17:5; 2Raj 23:24; Hos 3:4.

• Terras ni si Salomo.

  Posisi ni terras on adong di alaman luar ni bagas joro na di sabola timur. Di tikki ni Jesus, dipakke do on gabe dalan. Jala adong do atap ni terras on. Didok halak do terras on sisa ni bagas joro na dipajongjong ni si Salomo. Mardalan do Jesus sian i tikki musim dingin. Jala di abad na parjolo, disi do halak Kristen marpungu lao manomba Debata. (Joh 10:22, 23; Ul 5:12)​—Ida Lampiran B11.

• Tiang.

  Dibahen do tiang lao marningot sada peristiwa na penting. Dibahen akka halak na sian bangso na asing do akka tiang sisombaon lao manomba debata na so sittong. Jala gabe dohot do halak Israel mangulahon sisongon i.​—1Raj 14:23.

• Tiang sisombaon.

  Bahasa Heberna, asherah. Dipakke do hata on lao mandok (1) tugu sisombaon na manggombarhon Aserah, i ma debata ni halak Kanaan na didok boi mambahen borua marianakkon, jala (2) patung ni debata Asera i. Olo do ra on sada tiang na tigor jala dibahen sian hau manang sabagian sian hau. Jala olo do ra on tiang na so pola diukir manang bona ni hau.​—5Mus 16:21; Pangh 6:26; 1Raj 15:13.

• Tire.

  Abit na bagak jala na ditonun. Disulam do disi gombar ni akka kerubim. On dipakke gabe batas ni Inganan na Badia dohot Inganan na Massai Badia na di tabernakel dohot di bagas joro. (2Mus 26:31; 2Kron 3:14; Mat 27:51; Heb 9:3)​—Ida Lampiran B5.

• Tisri.

  —Ida ETANIM dohot Lampiran B15.

• Tobusan.

  Na ikkon sigararon lao paluahon halak na dibahen gabe hatoban, halak na dihukum, halak na marsitaonon, paluahon halak sian dosa, manang paluahon halak sian sada tanggung jawab. Dang ikkon hepeng dilehon gararna. (Jes 43:3) Adong do piga-piga situasi na mambahen porlu dilehon tobusan. Misalna, appuna ni Jahowa do sude anak siakkangan ni jolma, jala appuna ni Jahowa do tong anak ni binatang na parjolo tubu. Alani i, ikkon ditobus do i molo dang dipelehon tu Jahowa. (4Mus 3:45, 46; 18:15, 16) Molo adong lombu na sai mananduk jala dang dihurung nappunasa i lombuna i, dung i gabe mate dibahen lombu i jolma, ikkon dilehon nappuna lombu i do gatti rugi  bahen tobusan asa unang dipamate ibana. (2Mus 21:29, 30) Alai dang boi dijalo tobusan sian halak na sengaja mambunu. (4Mus 35:31) Tobusan na paling penting na disurat di Bibel, i ma tobusan na dilehon Kristus. Dilehon ibana do ngoluna asa boi paluahon akka jolma na mangoloi ibana. Dipalua do nasida sian dosa dohot hamatean.​—Ps 49:7, 8; Mat 20:28; Eps 1:7.

• Tondi parbadia.

  Huaso manang gogo na dipakke Debata lao mangulahon lomo ni rohana. Didok do on badia, ala sian Jahowa. Ibana do na umbadia sian saluhutna jala tigor do ulaonna. Jala didok do on badia ala on do na dipakke Debata lao pasautton sakkapna na badia i.​—Luk 1:35; Ul 1:8.

• Tugu sisombaon.

  Tugu na tigor, somalna dibahen sian batu, jala manggombarhon alat kelamin ni bawa na dipakke lao manomba Baal manang akka debata na so sittong.​—2Mus 23:24.

• Tuhan.

  Sian bahasa Heber “Adhonai” jala di bahasa Junani “Kyrios”, na lapatanna tuan, nappuna, manang pamimpin. Dua hata Heber dohot Junani i diterjemahon gabe “Tuhan” molo na dimaksud Jahowa.

• Tukkang ramal.

  Halak na mandapot huaso dohot parbinotoan sian suru-suruan na jahat.​—2Kron 33:6.

• Tukkot bosi.

  Tukkot na ganjang jala adong bosi na pissur di ujungna. Somal do dipakke partani tukkot on lao mangusir binatang. Hata “dialo ho au” di bukku Ulaon dibuat sian hata “molo sai disipaki ho tukkot bosi”. Hata on dibuat sian hasomalan ni lombu na sai mangalo tu parmahan jala sai manipaki tukkot ni parmahan i, nang pe gabe hassit dihilala lombu i. Tukkot manggombarhon poda ni akka halak na marbisuk na manjujui akka halak na manangihon asa mangihutton poda i.—Ul 26:14; Pangh 3:31, surat na di toru.

• Tukkot pangukkur.

  Tukkot pangukkur na ganjangna onom asta na ganjang. Molo mangihutton asta na somal, ukkuranna i ma 2,67 meter. Alai molo mangihutton asta na ganjang ukkuranna i ma 3.11 meter. (Hes 40:3, 5; Pgk 11:1)​—Ida Lampiran B14.

• Tutup ni poti.

  Panutup ni poti parpadanan. Di jolo ni poti parpadanan i do malim mamispisson mudar tikki Ari Pardamean. Di bahasa Heber, on lapatanna “manutup dosa” manang “manesa dosa”. Sian mas do dibahen panutup on jala adong dua patung kerubim na dibahen di ujung ni poti parpadanan i. (2Mus 25:17-22; Heb 9:5)​—Ida Lampiran B5.

U

• Ulaon ni halak na so umboto ila.

  Sian hata Junani aselgeia, dosa na balga do na nidokna dison. Alana halak sisongon on patuduhon barani do ibana mangulahon ulaon na sala na maralo tu patik ni Debata. Dang maila ibana. Jala leas do rohana tu na marhuaso, tu patik, dohot aturan ni Debata.​—Gal 5:19; 2Ptr 2:7.

• Undi.

  Dibahen lao manottuhon sipilliton marhite akka batu karikil manang akka hau na gelleng. Dipamasuk ma batu manang karikil tu sada inganan, dung i dihutur ma. Batu manang hau na kaluar ma na tarpillit. Jotjotan jolo martangiang do andorang so mambahen undi. Jala dipakke do hata undi lao mandok undi na sasittongna manang tikki mambahen gombaran na lapatanna, “parbagianan”.​—Jos 14:2; Ps 16:5; Poda 16:33; Mat 27:35.

• Urim dohot Tumim.

  Alat na dipakke sintua ni malim na sarupa tu undi. Dipakke do on molo adong sukkun-sukkun ni bangso Israel na porlu alus sian Jahowa. Dibahen sintua ni malim do Urim dohot Tumim di baju epodna tikki masuk ibana tu tabernakel. Alai dang dipakke be on dung dihancurhon halak Babel kota Jerusalem.​—2Mus 28:30; Neh 7:65.

W

• Wadi.

  Rura manang bagian partoru ni sunge na biasana koring asing ni musim udan. Alai boi do na nidokna sunge i sandiri. Adong do sunge na aekna sian matamual dang sian aek udan. Alani i, gabe torus ma adong aek di sunge i di bagasan sataon i. Di piga-piga ayat diterjemahon do wadi gabe “rura”.​—1Mus 26:19; 4Mus 34:5; 5Mus 8:7; 1Raj 18:5; Job 6:15, surat na di toru.

Z

• Zeus.

  Dewa ni halak Junani na uttimbo pangkatna sian sude dewa ni nasida. Di akka surat najolo na dapot sian jonok ni kota Listra, disurat do taringot “akka malim ni Zeus” dohot taringot “Zeus dewa matahari”. Tikki di Listra si Barnabas, dirippu halak na disi do ibana Dewa Zeus. Jala, tikki lao si Paulus markapal sian Pulo Malta, adong do tarsurat “Akka Anak ni Zeus” di kapal i. “Akka Anak ni Zeus” na nidokna, i ma si Kastor dohot si Poluks.​—Ul 14:12; 28:11.