Marumur 17 taon do omakku tingki tubu ahu taon 1960. Ditadingkon bapak do hami andorang so tubu dope ahu. Gabe sajabu ma hami dohot ompung dolingku di Burg, sada kota di negara na didok najolo Republik Demokrasi Jerman, manang Jerman Timur. Godang do halak ateis di inganannami, dohot ma i keluargangku. Ndang porsea hami tu Debata.

Dihaholongi ompung dolingku do ahu. Ditogihon do ahu rap mangulahon ulaon, umpamana manjangkit hau laho manggargaji dangkana. Ala metmet dope ahu, las hian do rohangku mangulahon i. Dame jala sonang do ngolungku.

Sada tingki, tingki marumur pitu taon dope ahu, madabu ahu sian tiang listrik. Baru dope laho naik kalas dua ahu. Tingki mulak, hujangkit ma tiang listrik. Dung hujangkit hirahira 8 meter, pingsan ma ahu ala hona setrum listrik. Dung diboan tu rumah sakit, ndang mangkilala be tanganku. Parah hian do lungkana ala tarbakar. Ingkon diponggol ma tanganku asa unang hona infeksi sude dagingku. Mansai lungun jala hansit do pangkilalaan ni ompung dolingku dohot omakku. Ala metmet dope ahu, ndang huantusi dope songon dia hansit ni na so martangan.

Dung kaluar sian rumah sakit, marsingkola ma muse ahu. Ala ndang adong tanganku, direhei angka donganku ma ahu, digugai, jala didangguri. Ujungna, pinda ma ahu tu Singkola Birkenwerder, i ma Singkola tu Penyandang Cacat. Ala dao singkola i sian jabu, ndang boi omak dohot ompung dolingku manjumpangi ahu. Holan tingki libur do hami boi pajumpang. Saleleng sampulu taon, ndang rap ahu dohot omak jala ompungku.

Marsiajar ma ahu mangulahon ulaon mamangke pathu. Boi do dapot rohamuna songon dia maniop sendok dohot garpu mamangke pat? Boi do i huulahon. Ahu pe marsiajar manikat gigi dohot marsuri mamangke pat. Tingki mangkatai, marisyarat do ahu mamangke pat. Tutu ma, pathu do na gabe tanganku.

 Tingki remaja, lomo rohangku manjaha buku fiksi ilmiah. Sipata, hubayangkon do adong tanganku songon robot asa boi mangulahon sude ulaon. Tingki marumur 14 taon, marisap ma ahu. On mambahen ahu ndang maila jala lomo rohangku asa sarupa songon na asing. Gabe hudok ma di bagasan rohangku, ’Ahu pe boi do songon hamu. Halak naung magodang do molo marisap, adong manang so adong tanganna.’

Jotjot do ahu dohot tu kegiatan sosial. Dohot do ahu di Free German Youth, sada organisasi ni angka na poso na sosialis, na diurupi pamarenta. Gabe sekretaris ma ahu disi, jala tanggung jawab na ringkot do on. Dohot do ahu molo adong acara marende, manjaha puisi, dohot olahraga tu penyandang cacat. Dung tammat singkola, karejo ma ahu di sada perusahaan. Dung magodang, jotjot ma ahu mamangke tangan palsu asa sarupa songon angka na asing.

Sada tingki, tingki paimahon kareta api ahu laho borhat tu parkarejoan, adong sahalak baoa manjumpangi ahu, didok ibana bahenon ni Debata do ahu gabe martangan muse. Gabe bingung ahu. Lomo do rohangku asa martangan muse, alai ndang dapot rohangku na nidokna i! Ala ateis do ahu, ndang porsea ahu adong Debata. Gabe ndang olo ahu pajumpang dohot baoa i.

Dung i, ditogihon dongan sakarejongku ma ahu manjumpangi keluargana. Tingki rap manginum kopi hami, dipaboa natuatuana ma taringot Debata, i ma na margoar Jahowa. Di tingki i, gabe huboto ma adong do hape goar ni Debata. (Psalmen 83:19) Alai, ninna rohangku, ’Ise pe goarNa, ndang adong Debata. Ingkon hupatudu na sala do pangantusion ni nasida.’ Alani i, olo ma ahu marsiajar Bibel. Hape ndang boi hudok molo Debata ndang adong.

Tingki marsiajar taringot surirang na dipaboa di Bibel, gabe muba ma pamingkirionku. Godang do surirang i nunga digohi nang pe disurat marratus manang marribu taon naung salpu. Tingki marsiajar Bibel, dibandingkon hami ma angka na masa di portibi on tu surirang na disurat di Mateus bindu 24, Lukas bindu 21, dohot 2 Timoteus bindu 3. Dos songon gejala ni sahit na mangurupi dokter mamboto taringot sahit ni pasienna, angka na masa na dipaboa di surirang i mangurupi ahu mangantusi molo hita nunga mangolu di ”angka tingki parpudi”, songon na didok di Bibel. * Longang do ahu mamboto i. Huida sandiri do surirang on digohi saonari.

Pos rohangku, hasintongan do na huparsiajari on. Jotjot do ahu martangiang tu Debata Jahowa asa diurupi jala ndang marisap be ahu, hape parisap na utusan hian do ahu saleleng martaontaon. Marsiajar Bibel ma ahu muse hirahira  sataon. Tanggal 27 April 1986, tardidi ma ahu di bak mandi jala sipsip do i diulahon hami. Alana di tingki i, diorai do Sitindangi Ni Jahowa di Jerman Timur.

Ala diorai hami, marpungu ma hami di jabu ni angka donganta jala holan saotik do donganta na hutanda. Alai, ndang diboto alani aha, dipaloas pamarenta ma ahu tu Jerman Barat. Disi, ndang diorai Sitindangi Ni Jahowa. Disi ma parjolo sahali boi ahu dohot tu kebaktian jala mangida marribu dongan sahaporseaon. Ndang tarlupahon ahu i.

Dung marumpak Tembok Berlin, ndang diorai be Sitindangi Ni Jahowa. Ujungna, ndang martabuni be hami manomba Jahowa. Lomo rohangku bebas marbarita. Alai, mabiar do ahu pajumpang dohot halak na so hutanda. Maila do ahu alani hahuranganku, jala maol do ahu jonok tu na asing. Alai taon 1992, hucoba ma marbarita saleleng 60 jom sabulan. Boi do i huulahon, jala las situtu rohangku. Alani i, huulahon ma i ganup bulan saleleng tolu taon.

Huingot do ayat na mandok, ”Ise na gale, so dohot ahu gale?” (2 Korint 11:29) Nang pe adong hahuranganku, boi dope ahu marpingkir jala marsoara. Alani i, marsitutu do ahu mangulahon na dumenggan laho mangurupi na asing. Ala ndang adong tanganku, lam marasi ni roha ma ahu tu na marhahurangan. Huhilala do songon dia hansitna molo so boi mangulahon na dihalomohon. Huapuli do nasida. Las rohangku mangurupi na asing.

Sipata, marmetmet ni roha do ahu. Lomo rohangku gabe songon baoa na asing. Boi do huulahon ulaon siganup ari, alai ndang boi ahu hatop songon halak na asing. On do prinsiphu, ”Saluhutna do tarpatupa ahu marhitehite Ibana, na margogoihon ahu!” (Pilippi 4:13) Ganup ari, dilehon Jahowa do gogo tu ahu asa boi huulahon angka ulaonku. Huboto ma, sai diurupi Jahowa do ahu. Alani i, holan Ibana do na tama husomba.

Dipasupasu Jahowa do ahu marhite mangalehon keluarga. On ma na huhalomohon sian mulai metmet nang tingki remaja. Si Elke ma tungganeborungku, na mansai burju jala sabar. Asing ni i, marjuta Sitindangi Ni Jahowa nunga gabe dongan sahaporseaonku jala gabe keluargangku.

Las do rohangku mamboto janji ni Debata taringot Paradeiso. Dipaimbaru Debata ma sude na di tano on, dohot ma i tanganku. (Pangungkapon 21:5) Lam huantusi ma janji i, ala hurimangi angka naung diulahon Jesus tingki di tano on. Boi do ibana hatop pamalumhon halak na pangpang, jala paulakkon pinggol ni baoa na tarseat. (Mateus 12:13; Lukas 22:50, 51) Janji ni Jahowa dohot tanda halongangan na binahen ni Jesus paposhon rohangku, ndang sadia leleng nai, gabe baoa na sempurna ma ahu.

Alai pasupasu na umbalga, i ma mananda Jahowa. Ibana ma na gabe bapakku dohot alealengku, pangapuli jala silehon gogo di ahu. Dos ma pangkilalaanku songon si Daud, ”Jahowa do pargogongku dohot lombulombungku . . . dapotan pangurupion ahu; asa marolopolop ma rohangku.” (Psalmen 28:7) Tongtong do tioponku hasintongan on saleleng ni ngolungku. Sai hutiop do i, nang pe ndang adong tanganku.