Magodang di New York do au, di kota Rochester. Agama Katolik do hami. Tikki marumur ualu taon au, marsirang ma natua-tuakku. Jadi molo ari Senin sahat tu ari Jumat, rap dohot omakku ma au tinggal di rumah susun na dibahen tu akka halak na pogos. Alai molo ari Sabtu dohot ari Minggu, rap ma au dohot bapakku na tinggal di komplek ni akka halak na mora. Adong ma opat kakakku jala sada adekku bawa. Jadi tikki huida susa ni omakku pagodang-godakkon hami na onom, gabe marcita-cita ma au gabe halak na mora asa boi huurupi keluargakku.

 Lomo do roha ni bapakku asa boi au gabe halak na mora. Alani i, disuru ma au asa sikkola manajemen perhotelan na jago. Lomo do rohakku masuk tu sikkola i, ujungna gabe mandaftar ma au. Huhilala on ma alus ni tangiakku, asa boi au gabe halak na mamora jala sonang ngolukku. Marsikkola ma au di jurusan administrasi hotel, hukum bisnis dohot keuangan perusahaan saleleng lima taon. Saleleng na marsikkola i, huhut do au karejo di hotel na adong kasinona di Las Vegas, Nevada.

 Tikki marumur 22 taon au, gabe asisten ni wakil presiden kasino ma au di sada hotel. Dirippu halak do nungnga gabe halak na sukses au jala mamora. Akka na tabo-tabo do na jotjot huallang jala minuman beralkohol na arga do na huinum dohot wine. Didok akka donganku parbisnis do tu au, “Hepeng do na uppetting di portibi on. Jadi lului ma hepeng sagodang ni godangna.” Didok roha ni nasida, hepeng do na boi mambahen sonang ngolutta.

 Karejokku, termasuk ma mangurus akka kebutuhan ni halak na mora na ro lao marjuji tu Las Vegas. Nang pe mamora nasida jala godang hepengna, alai huida songon na so las do roha ni nasida. Au pe gabe songon i ma. Alana lam godang hepengku, lam marsak do au jala gabe maol modom. Gabe tubu ma tu rohakku naeng bunu diri. Marsak do au mangida ngolukku. Martangiang ma au tu Debata jala hudok ma, “Aha do na boi mambahen las rohakku?”

 Di tikki i, nungnga gabe Saksi Jahowa dua kakakku jala pinda ma nasida tu Las Vegas. Nang pe songon i, dang olo au manjalo akka sijahaon ni nasida. Alai, olo do au rap manjaha Bibel dohot nasida mamakke Bibelhu sandiri. Di Bibelhi, adong do hata ni Jesus na dicetak merah. Ala lomo rohakku tu sude hata ni Jesus, gabe i ma na jotjot dihatai kakakku tu au. Tikki sahalakku pe, olo do au manjaha Bibel.

 Tikki hujaha Bibel, godang do na mambahen songgot rohakku. Contohna didok Jesus do, “Tingki martangiang, unang ma mulak-ulak mandok hata na sarupa songon na binahen ni jolma sian angka bangso, ai dirimpu nasida alani ganjang ni tangiang do gabe ditangihon Debata pangidoan ni nasida.” (Mateus 6:7) Najolo, adong do sahalak pastor mangalehon gambar ni Jesus tu au. Jala didok ibana do, molo martangiang Ale Amanami au jala mandok Salam Maria sappe sappulu hali di jolo ni gambar i, lehonon ni Debata do tu au manang sadia pe hepeng na hupangido. Alai dung hujaha ayat i, gabe huboto ma dang adong hape lapatanna mulak-ulak hudok tangiang i. Jala adong do muse hujaha hata ni Jesus na mandok, “Unang ma jou ama tu manang ise di tano on, ai sada do Amamuna, i ma na di banua ginjang i.” (Mateus 23:9) Gabe sukkun-sukkun ma muse rohakku, ‘Boasa ma au dohot akka halak Katolik na asing manjou pastor i “Ama”?’

 Tikki hujaha bukku Jakobus, gabe sai hupikkiri ma taringot cita-citakki. Di bukku Jakobus bindu 4 didok do, “Ndang diboto hamu hamusuon dompak Debata do molo marale-ale dohot portibi on? Manang ise na naeng marale-ale dohot portibi on, na mambahen dirina gabe musu ni Debata do ibana disi.” (Jakobus 4:4) Songgot do muse rohakku tikki hujaha di ayat 17 na mandok, “Molo diboto sasahalak mangulahon na denggan hape ndang diulahon, mardosa do ibana disi.” Dung i, hutelepon ma kakakku jala hudok ma tu nasida, ikkon so nama au sian kasino karejokku na di hotel i. Alana karejokki, boi mambahen au dohot akka halak gabe mangulahon na so denggan, songon marjuji dohot naeng mamora.

 Saonari, naeng hupadenggan ma hubunganku tu Debata, tu natua-tuakku, tu akka kakakku, dohot tu adekku. Gabe husederhanahon ma ngolukku asa boi adong tikkiku lao mangulahon i. Alai dang mura mangulahon i. Alana ditawarhon do asa naik jabatanku di kasino i jala ditambai gajikku dua hali manang tolu hali loppit. Alai dung martangiang au, hubahen ma keputusan lao maninggalhon i sude. Hutinggalhon ma karejokki jala pinda ma au tu jabu ni omak. Jala hubukka ma usaha na gelleng, i ma mambahen laminating ni akka menu ni restoran.

 Nang pe nga huboto sian Bibel aha na petting, alai dang olo dope au ro tu parpunguan ni Saksi Jahowa. Disukkun kakakku ma boasa dang lomo rohakku tu Saksi Jahowa. Hualusi ma, “Alani Debatamuna Jahowa i mambahen keluarga dang marsada. Holan tikki ari Natal dohot tikki ulang tahun do au boi rap dohot keluarga, hape dang dirayahon hamu i.” Alai sada sian kakakki tangis ma jala didok ma tu au, “Saleleng on, sai naeng rap do hami dohot ho, dang ikkon di ari raya i. Hape ho, holan di tikki Natal dohot ulang tahun i do boi ro, ala dihilala ho wajib lao mangulahon i.” Hona ma hatana i tu rohakku. Gabe rap tangis ma hami.

 Gabe sadar ma au. Sala do hape au saleleng on. Massai holong do hape roha ni Saksi Jahowa tu keluargana. Ujungna, olo ma au ro tu parpunguan ni nasida di Bale Harajaon. Disi, pajuppang ma au dohot si Kevin, sahalak na terampil mangajari. Ujungna, mulai ma au marsiajar Bibel dohot ibana.

 Sederhana do ngolu ni si Kevin dohot istrina, asa boi godang tikki ni nasida lao mangurupi halak lao marsiajar Bibel. Dohot do muse nasida mangurupi pembangunan kantor cabang ni Saksi Jahowa na di Afrika dohot na di Amerika Tengah. Jala hepeng ni nasida sandiri do na dipakke nasida asa boi lao tusi. Las do roha ni nasida jala marsihaholongan do nasida. Gabe didok rohakku ma, “Gabe songon halak i ma nian au.”

 Dipatudu si Kevin ma tu au sada video taringot songon dia las ni roha molo gabe misionaris. Dung hutonton i, lomo ma rohakku naeng gabe misionaris. Dung taratur au marsiajar Bibel saleleng onom bulan, taon 1995 tardidi ma au gabe sahalak Saksi Jahowa. Dang hupangido be tu Debata asa mamora au. Alai martangiang do au jala hudok ma, “Unang bahen ahu mamora manang pogos.”​—⁠Poda 30:8, Bibel siganup ari.

 Saonari nga mamora be au, alai dang di arta. Alai ala naung lam jonok do au tu Debata jala marlas ni roha. Pajuppang ma au dohot si Nuria di Honduras, ibana ma na gabe istrikku. Jala gabe misionaris ma hami di Panama dohot di Meksiko. Huhilala ma, toho do hata ni Bibel na mandok, ‘Pasupasu ni Jahowa do mambahen mamora, jala ndang mardongan na hansit dibahen’!​—⁠Poda 10:22.