Sian taon 1999 sahat tu taon 2015, nungnga lobi sian 5.000 Bale Harajaon na dipajongjong Saksi Jahowa di Amerika Tengah * dohot di Meksiko. Alai, porlu do lobi sian 700 nai asa adong inganan parpunguan tu sajuta Saksi Jahowa dohot tu halak na ro.

Najolo, maol do akka huria pajongjokkon inganan parpungan. Umpamana, gumodangan di jabu do parpunguan ni Saksi di Meksiko. Boasa? Saleleng martaon, diorai pamaretta do organisasi agama mambahen inganan parpunguannasida. Dung taon 1990, muba ma undang-undang jala dipukka Saksi Jahowa ma pajongjokkon godang Bale Harajaon. Alai, marbulan do lao pajongjokkon sada Bale Harajaon.

Tikki Punguan Sipajongjong Bale Harajaon mangulahon sada program na baru di taon 1999, i ma program pajongjokkon Bale Harajaon di negara na hurang maju, lam hatop ma ulaon pembangunan i. Songon di Meksiko dohot di pitu negara di Amerika Tengah. Dung taon 2010, kantor cabang di Meksiko ma na mangaradoti ulaon pembangunan di sude luat i.

Godang do ambat-ambat tikki pajongjokkon Bale Harajaon di inganan na pinjil. Umpamana di Panama, ikkon marparau do nasida saleleng tolu jom asa boi sahat tu inganan pembangunan. Di Chiapas, Meksiko ikkon marpesawat na gelleng do nasida mamboan bahan bangunan tu inganan i.

Lomo hian do roha ni halak na so Saksi mangida Bale Harajon di hutanasida. Umpamana, sahalak bawa di Honduras paboahon, andorang so dipajongjong Bale Harajaon di huta i, naeng pajongjongon ni akka halak do diskotik disi. Alai dang lomo rohana. Tikki dipaboa lao pajongjongon ni Saksi Jahowa Bale Harajaon disi, didok ibana ma, “Sada pasu-pasu do on!”

Di godang inganan, las do roha ni akka halak mangida haringgason ni akka sukarelawan. Sahalak bawa di Guatemala mandok, “Molo di hami, holan di dapur do ulaon ni borua. Alai dison, diulahon akka borua do huida ulaon ni akka bawa. Huida ma akka borua mambahen rangka bosi dohot mendempul tembok. Jago hian!” Jala dilehon akka tetangga ma sipanganon lao allangon ni sukarelawan.

Godang do muse halak na lomo rohana mangida model gedung ni Bale Harajaon. Di Nikaragua, dipaboa sahalak insinyur do tu wali kota, massai denggan do Bale Harajaon di luat i. Gariada, didok ibana umjago do bangunan ni Bale Harajaon sian sude bangunan di luat i.

Las do roha ni Saksi Jahowa ala adong inganan parpunguan na tama. Diparrohahon nasida, gabe olo do akka parsiajar Bibel ro marpungu dung adong Bale Harajaon. Sahalak ruas ni huria di Meksiko na dohot mangurupi akka sukarelawan i mandok, “Mandok mauliate do hami tu Debata Jahowa ala boi dohot pajongjokkon Bale Harajaon na lam pabadiahon goarNa.”