MAAN AMUN ƝIN TRAN SU!
Sa nga ti yɛ afuɛ 2023 nun’n e kwla lafi like kpa kun su’n—?I su ndɛ benin yɛ Biblu’n kan-ɔn?
Afuɛ 2023 nga w’a bo i bo yɛ’n, e kwlaa e kunndɛ kɛ e bɔbɔ nin e osufuɛ mun e liɛ yo ye. ?Ngue ti yɛ e kwla lafi su kɛ e ɲrun lɔ’n yó kpa-ɔ?
Biblu’n ti’n e wla o like kun su
Biblu’n kan ndɛ fɛfɛ kpa kun. Yɛle kɛ sa nga be o e su andɛ yɛ’n be su cɛman kun, ɔ ka kan’n bé wíe. I kpa bɔbɔ’n be klɛli Biblu’n “naan e si sa. I liɛ’n, […] fɔnvɔlɛ mɔ Ɲanmiɛn Ndɛ’n fɔnvɔ e’n ti’n, é ɲán like é fá e wla é gúa su.”—Rɔmunfuɛ Mun 15:4.
Sɛ ɔ waan á sí Biblu’n nun ndɛ uflɛ wie mun’n, kanngan ndɛ nga nun: “Une espérance réelle pour des jours meilleurs.”
Ndɛ kun m’ɔ kwla uka e dɔ nga su’n
Ndɛ ng’ɔ o Biblu’n nun’n kwla yo kɛ ‘mmeli’n i blalɛ’n m’ɔ trɛ i ase’n sa naan e ɲan nguan.’ (Ebre Mun 6:19) Yɛle kɛ ndɛ sɔ’n kwla uka e naan y’a jran e su sa’m be ɲrun kekle, naan e akunndan’n w’a sanganman dan, naan kusu y’a di aklunjɔɛ kpafuɛ’n. I wie yɛle kɛ:
Biblu’n nun ndɛ’n ukali bian kun naan w’a wla nzuɛn tɛ wie i ase. Nian video ng’ɔ suan Min mɛn dilɛ wafa’n flannin min.
Biblu’n kwla uka e naan sɛ e awlɛn su sran wie wu’n, y’a kwla jran kekle. Nian video ng’ɔ suan Be nga be o sɛ nun’n be fɔnvɔlɛ.
Lafi Biblu’n nun ndɛ’n su kpa
Sran kpanngban be kunndɛ kɛ sa kpakpa’m be ju. Sanngɛ be lafiman su kɛ sa sɔ’m bé jú sakpasakpa. Sanngɛ Biblu’n nun ndɛ liɛ’n ɔ timan sɔ. ?Ngue ti-ɔ? Afin Biblu’n nun ndɛ’n fin Ɲanmiɛn Zoova a bɔbɔ, yɛ i kusu “kwlá buaman ato.” (Titi 1:2) Zoova kunngba cɛ yɛ ɔ kwla yia ndɛ kwlaa ng’ɔ kan be’n be nuan-ɔn. Ɔ kwla yo “like kwlaa ng’ɔ klo’n.”—Jue Mun 135:5, 6.
É wlá ɔ fanngan kɛ a yo naan a ɲan Biblu’n nun ndɛ mɔ be kwla lafi su’n i su ye. Sɛ a kunndɛ kɛ á láfi ndɛ sɔ’n su’n, ɔ fata kɛ a bo ɔ ɲin ase “nian Ɲanmiɛn Ndɛ’n nun kpa.” (Sa Nga Be Yoli’n 17:11) I lɛ nun’n, kplin su kɛ e kle wɔ Biblu’n nun like, a su tuaman like fi. Sɛ a yo sɔ’n, afuɛ 2023 bó i bo klanman mán wɔ!
a Zoova ti Ɲanmiɛn dunman.—Jue Mun 83:18.