YASUA NIN I YI BE LIƐ
2: Amun bo yo kun
?I BO’N YƐLE BENIN?
Yasua nin bla nga be bo ti kun’n, be ti kɛ alapla nun cisanfuɛ kun nin i ukafuɛ’n sa. Kɛ sa wie ju’n, be bo yo kun be fa ajalɛ.
NDƐ NGA BIBLU’N KAN’N: “Be timan sran nɲɔn kun, sanngɛ be ti sran wunmuan.”—Matie 19:6.
“Aja’n nun’n, ɔ fataman kɛ yasua’n annzɛ bla’n i ngunmin yɛ ɔ fa ajalɛ mun-ɔn. Ɔ fata kɛ be bo yo kun be fa ajalɛ naan be aja’n w’a yo ye.”—Klisitɔfu.
?NGUE TI YƐ I SƆ’N TI CINNJIN-ƆN?
Yasua nin bla nga be bo timan kun’n, kɛ ndɛ tɔ be afiɛn’n, be fa gua be wiengu su. Ɔ maan, ndɛ kanngan mun bɔbɔ’n, be kaci ndɛ dan.
“Aja’n nun’n, bo kun yolɛ’n ti cinnjin. Sɛ min nin min wun’n e bo timan kun’n, nn e ti kɛ sran nɲɔn mɔ be tran sua kunngba nun ngbɛn sa. Be tran likawlɛ, sanngɛ be bo yoman kun be faman ajalɛ cinnjin mun.”—Alɛksandra.
LIKE NGA AMUN KWLA YO’N
AMUN BU KOSAN NGA’M BE AKUNNDAN
-
?A bu i kɛ sika nga a ɲɛn i’n ti ɔ ngunmin ɔ liɛ?
-
?Kɛ ɔ wun’n annzɛ ɔ yi’n nunman ɔ wun lɛ’n, yɛ ɔ wun kpaja wɔ kpa-ɔ?
-
?A faman ɔ wun mantanman ɔ wun’n annzɛ ɔ yi’n i osufuɛ mun? ?Kannzɛ bɔbɔ ɔ nin i osufuɛ’m be afiɛn’n mantan’n, a yoman sɔ?
AMUN KOKO NDƐ NGA’M BE SU YALƐ
-
?Ngue yɛ amun nin amun yi’n annzɛ amun wun’n, amun bo yo kun be yo-ɔ?
-
?Ngue yɛ i yolɛ nun’n, ɔ fata kɛ amun bo yo kun tra laa’n niɔn?
-
?Ngue yɛ ɔ fata kɛ amun yo naan amun bo w’a yo kun w’a tra laa’n niɔn?
LIKE NGA AMUN KWLA YO’N
-
Wienun-ɔn, amun su to be sa nun balɔn nga be flɛ i kɛ tenisi’n. Amun yi’n annzɛ amun wun’n jin bue kun, yɛ amun kusu amun jin bue uflɛ su. ?Kɛ ɔ ko yo naan amun a jran bue kunngba’n su naan amun a to i likawlɛ’n, ngue yɛ amún yó-ɔ?
-
Nán amun se kɛ: ‘?Ń yó sɛ naan m’an wla bi?’ Sanngɛ, maan amun se kɛ: ‘?É yó sɛ naan e nɲɔn’n y’a wla bi?’
“Sɛ ndɛ tɔ amun afiɛn’n, like ng’ɔ ti cinnjin’n yɛle kɛ amun yo naan fɔunndi tran amun afiɛn yɛ amun bo yo kun. Nán amun kunndɛ sran nga i ndɛ’n yo fɛ’n.”—Etanin.
NDƐ NGA BIBLU’N KAN’N: “Nán an bu amun ninnge liɛ’m be ngunmin be akunndan, sanngɛ an bu amun wiengu’m be liɛ’n i akunndan wie.”—Filipufuɛ Mun 2:3, 4.
