MAPIPILI MO DAW TALAGA KUN ANO AN MAGIGIN PUTURO MO? Nagtutubod an iba na nakatalaga na an mga mangyayari sa buhay ninda, asin dai ninda iyan kontrolado. Pag dai nangyari an inaasahan ninda, sinasabi na sana ninda na may ibang plano an Diyos para sainda. “Bako talaga idto para sako!” an sabi ninda.

An iba nadidisganar pag nahihiling ninda na mayo na sindang magigibo sa mapang-api asin bakong makatanusan na kinaban na kinabubuhayan ta. Pinupurbaran nindang magin mas marahay an saindang buhay—pero huli sa giyera, krimen, mga kalamidad, asin hilang parating nararaot an saindang mga plano. ‘Para ano pa?’ an sabi ninda sa sadiri.

Totoo na an mga kamugtakan sa buhay puwedeng makaapektar na marhay sa saimong mga plano. (Eclesiastes 9:11) Pero, kun mapadapit sa magigin puturo mo, igwa ka talaga nin mapagpipilian. Sa katunayan, ipinapahiling kan Bibliya na nakadepende sa pipilion mo an magigin puturo mo. Pag-isipan an sinasabi kaiyan.

Kan madali nang lumaog sa Dagang Panuga an suanoy na nasyon nin Israel, an lider nindang si Moises nagsabi sainda: “Tinatawan taka nin pagpipilian, an buhay o an kagadanan, an bendisyon o an sumpa; asin dapat mong pilion an buhay tanganing mabuhay ka, ika saka an saimong mga gikan, paagi sa pagpahiling nin pagkamuot ki Jehova na saimong Diyos, paagi sa pagdangog sa saiyang mga sinasabi, asin paagi sa pagdanay na maimbod sa saiya.”—Deuteronomio 30:15, 19, 20.

“Tinatawan taka nin pagpipilian, an buhay o an kagadanan, an bendisyon o an sumpa; asin dapat mong pilion an buhay.”—Deuteronomio 30:19

Iyo! Ilinigtas nin Diyos an mga Israelita sa pagkauripon sa Ehipto asin ibinugtak sa atubangan ninda an paglaom na magkaigwa nin talingkas asin maugmang buhay sa Dagang Panuga. Pero dai ninda awtomatikong makakamtan an gabos na iyan. Para makamtan an mga bendisyon na iyan, dapat nindang “pilion an buhay.” Paano? ‘Paagi sa pagkamuot sa Diyos, paagi sa pagdangog sa saiyang mga sinasabi, asin paagi sa pagdanay na maimbod sa saiya.’

Ngunyan, igwa ka man nin pagpipilian, asin nakadepende sa pipilion mo an magigin puturo mo. Paagi sa pagpili na kamutan an Diyos, pagdangog sa mga sinasabi niya, asin pagdanay na maimbod sa saiya, ipinapahiling mo na pinipili mo an buhay—buhay na daing katapusan sa paraisong daga. Pero ano an kalabot sa mga lakdang na iyan?

An pagkamuot iyo an panginot na kuwalidad nin Diyos. “An Diyos pagkamuot,” an sabi sa ipinasabong na surat ni apostol Juan. (1 Juan 4:8) Kaya kan haputon si Jesus kun anong tugon an pinakaimportante sa gabos, nagsimbag siya: “Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong isip.” (Mateo 22:37) An haraning relasyon sa Diyos na Jehova dapat na nakabasar bako sa takot o basta sana pagsunod kundi sa pagkamuot. Pero taano ta dapat niyatong pilion na kamutan siya?

An pagkamuot ni Jehova sa katawuhan kaagid kan pagkamuot kan mga magurang sa saindang mga aki. Maski ngani bakong perpekto, tinutukduan, pinapakusog, sinusuportaran, asin dinidisiplina kan mapagpadangat na mga magurang an saindang mga aki huling gusto ninda na magin maugma asin mapanggana an mga ini. Anong karibay an gusto ninda? Bilang mga magurang, gusto ninda na mamutan sinda kan saindang mga aki, asin isapuso an mga bagay na itinukdo ninda na para sa ikakarahay kan saindang mga aki. Bako daw na rasonable sanang asahan man kan satong perpektong Ama sa langit na magigin mapagpasalamat kita saiya para sa gabos na bagay na ginibo niya para sa sato?

Sa orihinal na lengguwahe kan Bibliya, an kahulugan kan tataramon na “magdangog” sa parati nagpaparisa man na “magsunod.” Bako daw na iyan an buot niyatong sabihon pag sinasabi ta sa sarong aki, “Magdangog ka sa mga magurang mo”? Kun siring, an pagdangog sa Diyos nagpaparisa na dapat kitang makanuod asin magsunod sa mga sinasabi niya. Mantang dai ta literal na nadadangog an Diyos, nagdadangog kita saiya paagi sa pagbasa asin pag-aplikar kan saiyang Tataramon, an Bibliya.—1 Juan 5:3.

Tanganing ipahiling an kahalagahan kan pagdangog sa Diyos, sa sarong pagkakataon si Jesus nagsabi: “Dapat na bakong sa tinapay sana mabuhay an tawo, kundi sa lambang tataramon na minaluwas sa nguso ni Jehova.” (Mateo 4:4) Mahalaga para sa sato an literal na kakanon, pero an totoo mas mahalaga diyan an pagkua nin kaaraman dapit sa Diyos. Taano? An madunong na si Hading Solomon nagsabi: “An kadunungan sarong proteksiyon kun paanong an kuwarta sarong proteksiyon, pero an bentaha kan kaaraman iyo ini: Iniingatan kan kadunungan an buhay kan may sadiri kaiyan.” (Eclesiastes 7:12) An kaaraman asin kadunungan na gikan sa Diyos puwedeng magprotektar asin magtabang sa sato ngunyan na gumibo nin madunong na desisyon na minagiya sa buhay na daing katapusan sa maabot na panahon.

Balikan ta an ilustrasyon ni Jesus sa nainot na artikulo, kun sain sinabi niya: “Hayakpit an trangkahan saka piot an dalan na pasiring sa buhay, asin dikit an nakakakua kaiyan.” (Mateo 7:13, 14) Sa paglakaw sa dalan na iyan, siguradong makikinabang kita kun igwa kita nin sarong ekspertong giya asin magdadanay na harani saiya tanganing makaabot kita sa satong destinasyon—an buhay na daing katapusan. Kun siring, igwa kita nin marahay na rason para magdanay na harani sa Diyos. (Salmo 16:8) Pero paano niyato gigibuhon iyan?

Aroaldaw, dakul na bagay an dapat tang gibuhon asin dakulon pa an gusto tang gibuhon. An mga bagay na iyan puwedeng magin dahilan na magin sibot kitang marhay o mairayo an satuyang atensiyon kaya kadikit na sana o mayo na kitang panahon na pag-isipan an gusto nin Diyos na gibuhon ta. Iyan an dahilan kaya sinasabi sa sato kan Bibliya: “Padagos nindong bantayan nin istrikto an saindong paglakaw na dai iyan magin siring sa mga bakong madunong kundi siring sa mga tawong madunong, na ginagamit sa pinakamarahay an saindong panahon, huli ta an mga aldaw maraot.” (Efeso 5:15, 16) Pag ibinibilang niyato na pinakamahalaga sa satong buhay an relasyon ta sa Diyos, magdadanay kitang dayupot sa saiya.—Mateo 6:33.

Baga man dai mo na mababago an nakaagi, puwede mong pilion an sarong siguradong puturo para saimo asin sa mga mahal mo sa buhay. Ihinahayag kan Bibliya na namumutan kitang marhay kan satong Ama sa langit, an Diyos na Jehova, asin ipinapaaram niya sa sato kun ano an gusto niyang gibuhon ta. Pag-isipan an sinabi ni propeta Miqueas:

“Sinabi niya sa saimo, O tawo, kun ano an marahay. Asin ano an hinahagad sa saimo ni Jehova? An magsagibo sana nin hustisya, kamutan an kaimbudan, asin maglakaw na may kababaan nin buot kaiba kan saimong Diyos!”—Mikas 6:8.

Aakuon mo daw an imbitasyon ni Jehova na maglakaw na kaiba niya asin makamtan an daing katapusan na mga bendisyon na itatao niya para sa mga naggigibo kaiyan? Nasa saimo an pagpili!