Makakanuod Kita Manungod sa Diyos Paagi sa Saiyang mga Propeta
Kaidtong panahon, tinawan nin Diyos an saiyang mga propeta nin mahalagang mga mensahe para sa katawuhan. Itinutukdo daw sa mga mensaheng ini kun paano ta makakamtan an mga biyaya nin Diyos? Iyo nanggad. Hilingon ta kun ano an manunudan niyato sa tulong maimbod na propeta.
ABRAHAM
Daing pinapalain an Diyos asin gusto niyang biyayaan an gabos na tawo.
Nanuga an Diyos sa propetang si Abraham: ‘Sa paagi mo, bebendisyunan ko an gabos na nasyon sa daga.’—Genesis 12:3, An Marahay na Bareta Biblia (Bikol Popular Version).
Ano an manunudan niyato? Namumutan kitang marhay nin Diyos asin gusto niyang biyayaan an gabos na pamilya—mga lalaki, babayi, asin mga aki—na nagsusunod sa saiya.
MOISES
Mahihirakon an Diyos asin binibiyayaan niya an gabos na naghihinguwang mamidbid siya.
Tinawan kan Makakamhan sa Gabos an propetang si Moises nin kapangyarihan na gumibo nin makangangalas na mga milagro. Pero, namibi si Moises: ‘Ipahiling mo sakuya an saimong dalan, tanganing mamidbid taka, huli ta makakakua akong biyaya sa saimong mga mata.’ (Exodo 33:13) Naugma an Diyos sa hinagad ni Moises kaya biniyayaan siya nin urog pang kaaraman asin pakasabot manungod sa Saiyang mga dalan asin mga kuwalidad. Halimbawa, naaraman ni Moises na an Kaglalang sarong Diyos na ‘mahihirakon asin [mapagmalasakit].’—Exodo 34:6, 7.
Ano an manunudan niyato? Gusto nin Diyos na biyayaan kita gabos—mga lalaki, babayi, saka mga aki—kun hihinguwahon tang mas mamidbid siya. Ipinapahiling niya sato sa Banal na Kasuratan kun paano siya sasambahon asin na gustong-gusto niyang biyayaan kita saka itao an saiyang pag-uyon.
JESUS
Mapagmakulog na pinaumayan ni Jesus an gabos na klase nin kamatian
Makakamtan ta an daing sagkod na mga biyaya nin Diyos kun aaramon ta an manungod ki Jesus asin sa mga ginibo saka itinukdo niya.
Mababasa sa Tataramon nin Diyos an dakul na detalye manungod sa buhay ni Jesus asin sa mga itinukdo niya. Tinawan nin Diyos si Jesus nin kapangyarihan na gumibo nin dakul na makangangalas na milagro, arog kan pagpaumay sa mga buta, bungog, asin pilay. Nagbuhay pa ngani siya nin mga gadan. Kaya ipinahiling ni Jesus an mga biyaya na itatao nin Diyos sa gabos na tawo pag-abot nin panahon. Ipinaliwanag niya kun paano makakamtan kan kada saro sa sato an mga biyayang iyan: “Ini nangangahulugan nin buhay na daing katapusan, na mamidbid ninda ika, an iyo sanang tunay na Diyos, asin an saro na saimong isinugo, si Jesu-Cristo.”—Juan 17:3.
Si Jesus mapagmalasakit, mamumuton, asin mabuot. An mga lalaki asin babayi, hoben asin gurang, nagdudurulok sa saiya huli sa mamumuton niyang imbitasyon: “Makanuod kamo sa sako, huli ta ako may mahuyong buot saka may mapakumbabang puso, asin magiginhawahan kamo.” (Mateo 11:29) Kan panahon ni Jesus minemenos kan iba an mga babayi, pero si Jesus trinatar sinda nin may kabuutan, dignidad, asin paggalang.
Ano an manunudan niyato? Namumutan na marhay ni Jesus an mga tawo, asin nagpahiling siya nin marahayon na halimbawa kun paano ta dapat trataron an lambang saro.
SI JESUS BAKO AN DIYOS
Itinutukdo sa sato kan Banal na Kasuratan na “igwa sanang sarong Diyos” asin na si Jesu-Cristo mapakumbabang mensahero nin Diyos. (1 Corinto 8:6) Malinaw na sinabi ni Jesus na an Diyos nakakalabi nanggad sa saiya asin na siya isinugo nin Diyos digdi sa daga.—Juan 11:41, 42; 14:28. *
^ par. 17 Para sa dagdag na impormasyon manungod ki Jesu-Cristo, hilingon an seksiyon 8 asin 9 kan brosyur na Tunay na Pananampalataya—Ang Susi Mo sa Maligayang Buhay na mababasa online sa www.mr1310.com/tl.
