Igwa. An Bibliya igwa nin nakakakumbinsir na patunay na may Diyos. Ineenkaminar kita kaiyan na magtubod sa Diyos gamit an satong “kakayahan na mag-isip” asin “pakasabot,” bakong dahil sa basta sana paniniwala sa itinutukdo kan mga relihiyon. (Roma 12:1; 1 Juan 5:20) Pag-isipan an minasunod na paliwanag na ini base sa Bibliya:

•   An organisadong uniberso na diyan igwa nin buhay nagpapatunay na may Kaglalang. Sinasabi kan Bibliya: “Siyempre, an lambang harong igwa nin naggibo, alagad an naggibo kan gabos na bagay iyo an Diyos.” (Hebreo 3:4) Dawa ngani simpleng pangangatanusan lang iyan, kumbinsido diyan an dakul na tawong may halangkaw na pinag-adalan. a

•   Natural sa satong mga tawo na aramon kun taano ta nabubuhay kita. Dawa igwa na kita kan mga pangangaipo para mabuhay, dai kita kontento sagkod na dai ta pa nasasabutan kun ano an katuyuhan nin buhay. Parte iyan kan inaapod kan Bibliya na “espirituwal na mga bagay” na kaipuhan ta, asin kaiba diyan an pagmawot niyato na mamidbid asin sambahon an Diyos. (Mateo 5:3; Kapahayagan 4:11) An espirituwal na pangangaipong ini, dai lang nagpapatunay na igwa nin Diyos kundi ipinapahiling man kaiyan na namumutan niya kita asin gusto niya na magin harani kita sa saiya.—Mateo 4:4.

•   Nagkatotoo an detalyadong mga propesiya sa Bibliya na isinurat ginatos na taon bago pa iyan nangyari. Eksaktong marhay asin detalyado an mga prediksiyon na iyan na malinaw na nagpapatunay na nakakalabi sa tawo an pinaghalian kan mga propesiyang iyan.—2 Pedro 1:21.

•   An mga kagsurat kan Bibliya may aram manungod sa siyensiya na dai pa nasasabutan kan mga tawo kan panahon na idto. Halimbawa, naniniwala an mga tawo kaidto na an planetang daga pasan nin mga hayop, arog nin elepante, upon, o baka. Sa kabaliktaran, sinasabi kan Bibliya na ginibo nin Diyos an Daga na ‘nakabitay sa mayo.’ (Job 26:7, An Banal na Biblia (Paulines) Sa orihinal na lengguwahe kan Isaias 40:22, may sinambit diyan manungod sa Daga na iyan “bilog” o “globo.” Dakul an naniniwala na kaya sana naaraman iyan kan mga kagsurat kan Bibliya huling an Diyos an nagpaabot kan impormasyon na iyan sa sainda.

•   Sinisimbag kan Bibliya an dakul na dipisil na hapot. Kun dai makua an tamang simbag sa mga hapot na iyan, puwedeng isipon kan saro na mayong Diyos. Halimbawa: Kun an Diyos mamumuton saka makapangyarihan sa gabos, taano ta kadakul nin pagsakit saka maraot na mga nangyayari sa kinaban? Taano ta imbes na karahayan, nagigin dahilan pa lugod an relihiyon na makagibo nin maraot an mga tawo?—Tito 1:16.