Badokota abalepula abalwele balimona ukutila kuti cawama nga kwali umuti uwingalabafwa ilyo balelepula umuntu kabili uwingalaposha ifilonda. Amagulu ayengi ayo babomfya te kuti bayabike mu kati ka mubili wa muntu. Pantu kuti yaleta amafya ku mubili, kuti yakosa nga yauma kabili tayekata pa fyabomba. Pa numa ya kusambilila pa malenda ayo inkola shifumya * basayantisti nabasanga inshila ya kupwishishamo ubu bwafya.

 Tontonkanyeni pali ici: Inkola nga yaumfwa umwenso ilafumya amalenda ayekata nga gulu no kuipomba mwi bula ilibishi. Ifi icita filenga yaicingilila, kabili ilakumanisha no kuipeta nangu ili mwi bula.

 Abafwailisha pa fintu balisambilile pa malenda ya nkola kabili basangile ukuti kwaliba ifingi ifilenga yalebomba nga gulu. Ku ca kumwenako, mu malenda ya nkola mwaliba ifilenga yalekosa ne filenga ilesunka nelyo ukutinta ifintu. Amalenda ya nkola yalekala pa cintu apali inkola kabili yalatwalilila ukutintimuka nangu inkola ibe no mwenso. Abafwailisha pa fintu balipanga ifintu ifyapala amalenda ya nkola, ifi e fyo balebomfya pa kupanga gulu iyakosa sana ukucila iyo babomfya mu fipatala pali ino nshita, kabili iingekata na pa fintu ifipeema. Iyi gulu baletila kuti yaikatanya “ne fintu pamo nga inkanda iyatelela iyaba ku mafupa palya apasuntikanina amafupa.”

 Abasambilila sana batila iyi gulu ikaba pa fyo babomfya lyonse ilyo balelepula umuntu, ikalenga belabila icilonda ukubomfya ubushishi nelyo ukubikapo amastepo. Na kabili kuti baibomfya pa kundapa inkanda iyatelela iiba apasuntikana amafupa nelyo ku kukambatika ifintu ifyo badokota balefwaya ukubika mu mubili wa mulwele. Ifyo basangile ilyo bale-esha iyi gulu filelanga ukuti isuma icine cine pantu bali-ibomfeshe ukwisala icipunda mu mutima wa nkumba e lyo na mu mabu ya ba koswe kabili yalibombele bwino sana.

 Basayantisti ilingi line basanga ifya kubomfya pa kupwisha amafya bakwata nga basambilila pa fya bumbwa. Ba Donald Ingber ba dairekita ba pa kampani iipanga amagulu batile: “Inkama kwishiba ifya kumonako e lyo no kwiluka bwangu nga wamona icintu icisuma ico wingabomfya.”

 Muletipo shani? Bushe iyi gulu iyo inkola ifumya yaishilebako fye iine nelyo kwali uwaipangile?