“Ndefwaya Ukufumamo!”

Ing’anda ya kale sana ilemoneka ukuti bali-ilekelesha. Pa myaka iingi, iyi ng’anda yalilokelwa ne mfula ya cimwela kabili yalitwalilila ukuba iyakosa. Lelo nomba nainenuka, kabili cilemoneka fye ukuti ili no kubongoloka nomba line.

IFI fine e fyaba ne fyupo ifingi pali lelo. Bushe muletontonkanya ukuti ne cupo cenu na co e ko cilelola? Nga e fyo cili, ishibeni ukuti ifyupo fyonse filakwata amafya. Na kuba, Baibolo ukwabula no kupita mu mbali ilasumina ukuti aboopa nangu ukuupwa bakaba na “macushi mu bumi bwabo.”—1 Abena Korinti 7:28.

Ibumba limo ilya bafwailisha pa fyupo lyalikomaile pali ici cishinka ilyo lyalondolwele ukuti “abengi nga nshi baleingila mu cupo nangu cingati tabeshibe bwino bwino nga bakaba ne nsansa atemwa iyo.” Balundileko no kuti: “Pa kutampa icupo cilomfwika bwino sana kwati insansa shikatwalilila, lelo mu kulekelesha cilesa mu kubipa no kufiisha abantu ku mutima.”

Ni shani pa lwa cupo cenu? Bushe mu cupo cenu mwaliba ifi fili pe samba?

● Ukuumana umo shacela

● Umusaalula

● Ukubulwa bucishinka

● Icifukushi

Nga ca kuti icupo cenu tacakosa sana kabili cilemoneka kwati cili mupepi no kupwa, cinshi mulingile ukucita? Bushe mufwile fye ukulekana?

[Akabokoshi ne Cikope pe bula 3]

“IFYUPO IFILEPWA NAFIFULISHA NGA NSHI”

Mu fyalo fimo, abalelekana nabafula nga nshi. Natulande pa calo ca United States, uko pa myaka iingi abalelekana baleba fye abanono. Barbara Dafoe Whitehead alemba mu citabo cakwe ica mutwe wa kuti The Divorce Culture, ati pa numa ya 1960, “abalelekana balifulile nga nshi.” Atile: “Mu myaka fye 10, icipendo calikulile ukufika ku miku ibili kabili catwalilile ukunina ukufika fye na ku kutampa kwa ba 1980, ilyo ifintu fyaishilebako bwino ku fyalo fya basungu. Pali uyu mulandu, abena America abo ifyupo fyalepwa balifulishe nga nshi mu myaka fye 30.”