BUSHE mucita shani umuntu nga amumwentwila? Mufwile na imwe mulamwentula kabili nalimo mulaba ne nsansa. Cibusa nelyo fye umuntu umbi uo mushaishiba nga amumwentwila, ilingi line mufwile na imwe bene mulamwentula. Na kabili ukumwentula kulaleta insansa. Ba Magdalena batile, “Nalitemenwe sana ifyo abena mwandi ba Georg balemwentula ilyo bashilafwa. Nga twaloleshanya naleumfwa bwino kabili nalemona ukuti balintemwa.”

Ukumwentula kulalanga ukuti umuntu natemwa kabili ali ne nsansa. Ulupapulo lwa pa Intaneti ulwa ba Association for Psychological Science ulo beta ati Observer, lwalandile ukuti, “cimoneka kwati ukumwentula . . . kwisa fye mu cifyalilwa.” Na kabili lwatile, nangu fye tunya “tuleshiba bwino sana ifyo icinso ca muntu cilemoneka.” Ulupapulo lumo lwine lwalandile no kuti: “Umuntu nga amwentula, abantu bambi baleshiba ifyo aali, kabili ici cilalenga baishiba ifyo bengacita pa kuti bemukalifya.”

Abafwailisha pa fintu aba pa Harvard University ku America balifwailishe pa fyo abalwele abakoloci balecita nga balolesha ifyo icinso ca ulebasakamana cilemoneka. Balandile ukuti abalwele baleumfwako bwino nga bamona ukuti uulebasakamana “ali ne nsansa, ali uwa cikuuku, alebabikako amano kabili ali no luse.” Nomba nga ca kuti uulebasakamana talecita ifi, baleumfwilako ububi.

 Ukumwentula kusuma nga nshi ku bumi bwenu. Abafwailisha pa fintu basanga ukuti umuntu uumwentula alatendeka ukuicetekela, ukuba ne nsansa kabili taba sana no bulanda, lelo uushimwentula ena alaba sana no bulanda.

Ba Magdalena abo tulandilepo kale bali ni Nte ya kwa Yehova ilyo kwali Inkondo ya Calo iya Bubili. Ba Magdalena na balupwa wabo bamo balibatwele ku nkambi balecushisha abantu ku Ravensbrück, mu Germany, pa mulandu wa kukaana ukucita ifyo abaNazi balefwaya. Ba Magdalena batile: “Inshita shimo abaletulinda baletukaanya ukulanda na bafungwa banensu. Na lyo line, balefilwa ukutukaanya ukumwentula. Nga namona fye bamayo na nkashi inandi bamwentula, nalekoselako kabili ici calelenga ndeshipikisha.

Nalimo mumona kwati te kuti mulemwentula pantu mulasakamikwa sana. Na lyo line, muleibukisha ukuti ifyo umuntu atontonkanyapo sana kuti fyalenga aba ne nsansa nelyo iyo. (Amapinda 15:15; Abena Filipi 4:8, 9) Kanshi kuti cawama nga mwalatontonkanya pa fintu ifisuma, nangu ca kuti calyafya ukucita ifi. * Ukubelenga Baibolo e lyo no kupepa kwalyafwa abantu abengi ukulatontonkanya pa fintu ifisuma. (Mateo 5:3; Abena Filipi 4:6, 7) Na kuba, ishiwi lya kuti “insansa” ne lya kuti “ukusekelela,” e lyo na mashiwi yambi ukwafuma aya amashiwi, e mo yaba mu Baibolo. Kanshi kuti cawama nga mulebelenga nangu fye ibula limo nelyo yabili aya mu Baibolo cila bushiku. Ukucita ifi nalimo kuti kwalenga mwalamwentula libili libili.

Na kabili mwilalolela fye ukuti abantu bambi e bo balemumwentwila. Mulebalilapo ukubamwentwila pa kuti mulebalenga baba ne nsansa pali ubo bushiku. Mulingile ukulamona ukuti ukumwentula bupe ubwafuma kuli Lesa ubwingamwafwa e lyo no kwafwa abantu bambi abalemona ifyo mumwentwile.