AMAFUNDE ya kwa Mose yalisuminishe abantu ukulapa imilapo apo calinga. Na lyo line, mu nshiku sha kwa Yesu abantu balelapa imilapo icilapelape. Abantu balemona ukuti nga balapa umulapo ninshi abantu balasumina ukuti ifyo balelanda fya cine; lelo pa miku ibili Yesu alikeenye abantu ukulapa imilapo. Abasambilishe ati: “Lekeni Ee wenu abe Ee, na Iyo wenu abe Iyo.”—Mat. 5:33-37; 23:16-22.

Icitabo cimo calandile ukuti, “abaYuda balitemenwe sana ukulapa imilapo pa kulanga ukuti ifyo balelanda fya cine” kabili icitabo ca Talmud calilondolola bwino bwino imilapo iyo balemona ukuti ya cine cine neyo balemona ukuti ya bufi.—Theological Dictionary of the New Testament

Te Yesu fye eka uwasuushishe ukulapa imilapo icilapelape. Ku ca kumwenako, kalemba wa lyashi lya kale umuYuda Flavius Josephus alandile pa baYuda bamo ati: “Tabalefwaya ukulalapa imilapo, balemona ukuti ukulapa imilapo kwabipapo ukucila ukubepa ubufi mu cilye, pantu basumine ukuti umuntu nga alapa umulapo pa kuti abantu bashininkishe ukuti ifyo alelanda fya cine ninshi uyo muntu wa bufi.” Icitabo ca baYuda ico beta abati Amano ya kwa Sirach, nelyo Ecclesiasticus, (23:11) na co citila: “Umuntu uwatemwa ukulapa ninshi ni mpulamafunde icine cine.” E co Yesu asuushiishe abalelapa imilapo icilapelape. Nga ca kuti lyonse tulelanda icine, tatulingile ukulapa imilapo pa kuti abantu bashininkishe ukuti ifyo tulelanda fya cine.