Finshi Filenga Abantu Ukutwalilila Ukulapatana?
Cinshi calenga abantu mu calo ukuba sana no lupato? Pa kuti twishibe icalenga, tulingile ukubalilapo ukwishiba umwalola ukuba no lupato. Bushe ulupato cinshi? Cinshi cilenga abantu ukutendeka ukupatana, kabili cinshi calenga ulupato ukuba fye mpanga yonse?
Bushe Ulupato Cinshi?
Ulupato kukanatemwa umuntu nelyo ibumba lya bantu bamo. Kabili umuntu uwa lupato tapata fye umuntu munankwe nelyo ibumba lya bantu pa nshita iinono lelo alatwalilila fye ukubapata.
CINSHI CILENGA ABANTU UKUBA NO LUPATO?
Kwaliba ifingi ifilenga abantu ukuba no lupato. Bamo balapata abanabo pa mulandu fye ne fyo baba nelyo ifyo bamoneka, te pa mulandu wa kuti nababacita ifyabipa. Kabili icilenga babapate ni co babamona ukuti te kuti baaluke nelyo bantu ababi. Bamona abantu bapata ukuti tabacindama kabili kuti babaletela fye amafya. Ilingi line abantu bamo abakwata ulupato ninshi balibafyengelepo nelyo kwaliba ifyabipa ifyacitike ifyo bafilwa ukulabako.
IFYO ULUPATO LUSALANGANA
Bamo balapata abantu abo bashatala abamonapo. Ku ca kumwenako, abantu bamo balapata abanabo pa mulandu fye wa kuti balupwa lwabo nelyo abanabo balibapata. Ici e cilenga abantu abengi ukupatana kabili ifi fine e fyo no lupato lusalangana.
Nga twaumfwikisha ifyo ulupato lusalangana kuti twamona icilenga abantu bamo ukupata abantu banabo. Na lyo line kwaliba na fimbi ifyalenga ukuti mu calo mube sana ulupato. Nomba natubalilepo ukwishiba ifyo ulupato lwatendeke. Baibolo e ingalenga twaishiba ifyo ulupato lwatendeke.
BAIBOLO ILATWEBA IFYO ULUPATO LWATENDEKE
ABANTUNSE TE BABALILEPO UKUBA NO LUPATO. Ulupato lwatendeke ilyo malaika umo uwaishileba Satana Kaseebanya apondokele Lesa. Ilyo Kaseebanya apondweke aishileba kepaya. Apo “wa bufi kabili e wishi wa bufi,” alilenga abantu batwalilila ukulapatana. (Yohane 8:44; 1 Yohane 3:11, 12) Baibolo imulondolola ukuti aliba ne cipyu icikalamba kabili alikalipa.—Yobo 2:7; Ukusokolola 12:9, 12, 17.
APO ABANTUNSE TABAPWILILIKA BALAPATA ABANABO. Umuntu wa kubalilapo Adamu na o acitile fye filya fine Satana acitile. Ici calenga abantu bonse bapyana ukukanapwililika no lubembu. (Abena Roma 5:12) Umwana wa kubalilapo uwa kwa Adamu, Kaini, alipatile sana munyina Abele ica kuti alimwipeye no kumwipaya. (1 Yohane 3:12) Kwena na pali ino ine nshita abantu abengi balalanga ukutemwa. Lelo pa mulandu wa kuti twalipyana ulubembu abantu abengi balaba bakaitemwe, balaba no mufimbila kabili balakwata icilumba, ifi fyonse filalenga abantu baba no lupato.—2 Timote 3:1-5.
UMUNTU UUSHATEMWA ABANTU ABAPUSANAKO NE FYO ABA NELYO IFYO AMONEKA ALABA NO LUPATO. Icalo twikalamo cilalenga abantu ukukanaba no luse kabili ici cilalenga baba ne mibele iyabipa. Pa mulandu wa kuti “icalo conse calaala mu maka ya mubifi,” abantu baliba sana no lufyengo, baliba na kapaatulula, balatuka abantu banabo insele, balabacusha kabili balonaula ne fipe fya buteko.—1 Yohane 5:19.
Na lyo line Baibolo taipelela fye pa kutweba ifyo ulupato lwatendeke, lelo ilatweba na pa fyo tulingile ukucita pa kuti twilaba no lupato.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Lesa e Wapangile Satana Kaseebanya pa Kuti Aletwesha?
Icasuko ca mu Baibolo calilungama kabili cilatusansamusha.
