ABABELENGA INO MAGAZINI BALEPUSHA UKUTI
Bushe Abena Kristu Balingile Ukulasefyako Krisimasi?
Abantu abengi mu calo fye conse balanda ukuti nga mulesefya Krisimasi ninshi mulesefya ukufyalwa kwa kwa Yesu. Nomba bushe mwalitontonkanyapo nga ca kuti Abena Kristu ba kubalilapo abaliko ilyo Yesu aali pa calo balesefyako Krisimasi? Na kabili bushe mwalishiba ifyo Baibolo ilanda pa kusefya ubushiku umuntu afyelwe? Ukwasuka aya amepusho kwalatwafwa ukwishiba nga ca kuti Abena Kristu balingile ukusefyako Krisimasi.
Ica kubalilapo ico tufwile ukwishiba ca kuti Baibolo tayalandapo ukuti Yesu nelyo ababomfi ba kwa Lesa bambi aba cishinka balesefyako Krisimasi. Baibolo yalanda fye pa bantu babili abasefeshe inshiku bafyelwepo. Bonse babili tabalepepa Yehova Lesa uo Baibolo yalandapo, kabili ifyacitike pali uku ukusefya fyalibipile. (Ukutendeka 40:20; Marko 6:21) Icitabo ca Encyclopædia Britannica cilanda ukuti Abena Kristu ba kubalilapo “tabalesefyako inshiku sha kufyalwa nga filya abasenshi balecita.”
Bushiku nshi Yesu afyelwe?
Baibolo tayalanda ubushiku Yesu afyelwe. Icitabo ca McClintock and Strong’s Cyclopedia cilanda ukuti: “Mu Cipingo Cipya tamwaba ifingalenga twaishiba ubushiku Yesu afyelwe kabili takwaba fimbi ifingalenga twabwishiba.” Na kuba, nga ca kuti Yesu alefwaya ukuti abasambi bakwe balesefya ubushiku afyelwe, nga alilekele baishiba ubo ubushiku.
Ica bubili ca kuti, Baibolo tayalandapo ukuti Yesu nelyo abasambi bakwe balesefya Krisimasi. Icitabo ca New Catholic Encyclopedia cilanda ukuti muli “Kalenda ya Philocalus iya mu 336 [C.E.]” e mo, babalilepo ukulanda pa kusefya Krisimasi kabili yalembelwe ninshi palipita imyaka iingi ukutula ilyo Yesu ali pa calo. Pali uyu mulandu icitabo ca McClintock and Strong cilanda ukuti, “Lesa te walanda ukuti abantu balesefya Krisimasi, kabili mu Cipingo Cipya tayabamo.” *
Cinshi Yesu aebele abasambi bakwe ukulaibukisha?
Apo Yesu ni Kasambilisha Mukalamba, alilondolwele bwino ifyo alefwaya abasambi bakwe ukulacita, kabili ifyo abebele balifilemba muli Baibolo. Na lyo line, talandilepo ukuti balingile ukulasefya Krisimasi. Nga filya fine kafundisha ashingatemwa abasambi ukulacita ifyo ashibebele, Yesu na o afwaya ukuti abasambi bakwe ‘balekonka ifyalembwa’ mu Baibolo.—1 Abena Korinti 4:6.
Na lyo line, kwaliba ubushiku ubo Yesu aebele abasambi bakwe ukulaibukisha. Abebele ukulaibukisha ubushiku bwa mfwa yakwe. Yesu alyebele abasambi bakwe ilyo balingile ukulaibukisha imfwa yakwe kabili alibalangile ne fyo balingile ukulacita. Muli Baibolo mwaliba ubushiku tufwile ukulaibukisha imfwa yakwe e lyo ne fyo tufwile ukulacita.—Luka 22:19; 1 Abena Korinti 11:25.
Nga fintu twamona, abasefya Krisimasi basefya ubushiku bwa kufyalwa, kabili Abena Kristu ba kubalilapo tabalekonka ulu ulutambi lwa basenshi. Na kabili, Baibolo tayalandapo ukuti Yesu nelyo abantu bambi balesefya Krisimasi. Ifi twalandapo e fyalenga Abena Kristu abengi sana belasefyako Krisimasi.
^ para. 6 Nga mulefwaya ukwishibilapo na fimbi pa kwafuma ifingi ifyo bacita pa Krisimasi, belengeni icipande cali mu Ulupungu lwa kwa Kalinda ulwa December 1, 2014 icaleti, “Ababelenga Ino Magazini Balepusho Ukuti . . . Finshi Tufwile Ukwishiba Pali Krisimasi?” Kuti mwaisanga pa webusaiti ya www.mr1310.com/bem.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Ni Lilali Yesu Afyelwe?
Moneni ico Abena Kristu bashisefesha Krisimasi pa 25 December.
AMASUKO KU MEPUSHO YA MU BAIBOLO
Finshi Baibolo Yalanda Pali Krisimasi?
Kuti mwapapa sana nga mwaishiba ukwafumine ifintu 6 ifyo bacita pa Krisimasi.
AMEPUSHO ABANTU BEPUSHA SANA
Cinshi Inte Nte sha kwa Yehova Bashisefesha Krisimasi?
Abengi balasefya Krisimasi nangu ca kuti balishiba uko yafuma. Moneni umulandu Inte sha kwa Yehova bashisefesha Krisimasi.
AMEPUSHO ABANTU BEPUSHA SANA
Mulandu Nshi Inte sha kwa Yehova Bashisefeshako Inshiku sha Kufyalwa?
Moneni ifintu 4 ifyaba mu kusefya inshiku sha kufyalwa ifyalenga ukuti Lesa akupate.
ICIBUKISHO
Muleibukisha Imfwa ya kwa Yesu
Tulemwita ku kulongana ukwacindama nga nshi, pali uku kulongana tukalaibukisha imfwa ya kwa Yesu. Mukesasambilila ifyo ubumi bwa kwa Yesu ne mfwa yakwe fingamunonsha.
