Muletasha nga Bamwafwa Kabili Mulepeela no Mutima Onse

YEHOVA, Shifwe wa mu muulu uwaba no kutemwa alitubikako amano. Icebo ca kwa Lesa citweba ukuti alatusakamana nga nshi. (1 Pet. 5:7) Cimo icilanga ukuti Yehova alatusakamana, bwafwilisho bwalekanalekana atupeela pa kuti tulemubombela ukwabula ukunenuka. (Esa. 48:17) Maka maka nga twaba na mafya ayatuletela ubulanda, Yehova alatwafwilisha. Ifyo Lesa alandilepo mu mafunde ya kwa Mose filangilila ukuti ici ca cine.

Muli aya mafunde, Yehova aliteyenye ukuti abantu baleafwa ‘abalanda,’ pamo nga abana ba nshiwa, bamukamfwilwa, na balebeshi. (Lebi 19:9, 10; Amala. 14:29) Alishiba ukuti ababomfi bakwe bamo kuti bakabila ubwafwilisho ukufuma ku Bena Kristu banabo. (Yako. 1:27) Kanshi takuli umubomfi wa kwa Lesa uuli onse uulingile ukukaana ubwafwilisho ukufuma ku bantu abo Yehova engabomfya ukuti bamwafwe. Na lyo line, ilyo batwafwa, tufwile ukupokelela no kutasha.

E lyo kabili Icebo ca kwa Lesa citweba ukuti abantu ba kwa Lesa bonse balikwata ishuko lya kupeelako abanabo. Ibukisheni ilyashi lya kwa “mukamfwilwa umo umupiina” uo Yesu amwene pe tempele mu Yerusalemu. (Luka 21:1-4) Nga fintu Amalango yasosele, afwile na o balemwafwa ukulingana no bwafwilisho Yehova apekanishishe bamukamfwilwa. Na lyo line, nangu ca kuti ulya mukamfwilwa ali mupiina, ico abengi bebukisha sana pali ena, ni bukapekape bwakwe te filya alepokelela ifya nkumbu. Bukapekape bwakwe bufwile bwalimuleteele insansa pantu, nga fintu Yesu asosele, “mwaba insansa ishingi mu kupeela ukucila ishaba mu kupokelela.” (Imil. 20:35) Ukulingana na ya mashiwi, finshi ‘mwingalapeela’ ifingalenga na imwe mwaba ne nsansa?—Luka 6:38.

“Cinshi Ndebwesesha Kuli Yehova?”

Umo uwaimbile ilumbo ali-ipwishe umwine ukuti: “Cinshi ndebwesesha kuli Yehova pa fisuma fyonse ifyo ancitila?” (Amalu. 116:12) Fisuma nshi Yehova amucitiile? Alimwafwile ilyo ali mu “bucushi no bulanda.” Yehova kabili ‘alipokolwele umweo wakwe ku mfwa.’ E co alefwaya ukucitapo fimo pa kuti ‘abweseshe’ Yehova. Finshi kemba wa ili lumbo ali no kucita? Atile: “Ndefishapo imilapo yandi kuli Yehova.” (Amalu. 116:3, 4, 8, 10-14) Apangile ukufikilisha amalayo yonse ayo alaile Yehova e lyo no kulacita fyonse ifyo Yehova afwaya.

Na imwe kuti mwacita cimo cine. Kuti mwacita shani ifyo? Mulekonka amafunde ya kwa Lesa ne fishinte fya kututungulula muli fyonse ifyo mulecita. Kanshi lekeni ukupepa Yehova kube ukwacindamisha pali fyonse mu bumi bwenu kabili lekeni umupashi wa kwa Lesa ulemutungulula muli fyonse ifyo mucita. (Luk. Mil. 12:13; Gal. 5:16-18) Kwena nga kukonka fye, te kuti mubweseshe Yehova pali fyonse ifyo amucitila. Na lyo line, ‘umutima wa kwa Yehova ulasekelela’ nga  amona mulebomba umulimo wakwe no mutima wenu onse. (Amapi. 27:11) Ala lishuko ukulacita ifilenga Yehova ukusekelela muli uyu musango!

Mulecita Ifingalakosha Icilonganino

Ukwabula no kutwishika mwalisanga ubusuma ubwingi mu cilonganino ca Bwina Kristu. Yehova alatupeela ifya kulya fya ku mupashi ifingi ukupitila mu cilonganino. Mwalipokelela icine icalengele mwafuma ku fisambilisho fya bufi ifyaba mu mipepele kabili icine calengele mwaishiba Lesa no kufwaya kwakwe. (Yoh. 8:32) Pa kulongana kwa cilonganino, na pa kulongana kukalamba, uko “umusha wa cishinka kabili uwashilimuka” apekanya, mulasambililapo ifikalenga mukekale umuyayaya muli paradaise pano isonde umushakabe ukulwala no kucula. (Mat. 24:45-47) Te kuti mukumemo ukupenda ifisuma fyonse ifyo mwapokelela, ne fyo mukapokelela ku ntanshi ukupitila mu cilonganino ca kwa Lesa. Finshi na imwe mwingapeela icilonganino pali ifi fisuma?

Umutumwa Paulo alembele ukuti: “Umubili onse, walundinkana bwino bwino no kulengwa ukubombela pamo mu mfyufyu shonse. E lyo cila cilundwa na co cilabomba umulimo wa ciko pa kuti umubili wikatane kabili umubili onse ulakulilako no kukoselako mu kutemwana.” (Efes. 4:15, 16) Nangu ca kutila ili ilembo lilanda sana pe bumba lya Bena Kristu basubwa, icishinka lilandapo kuti ca-afwa na Bena Kristu bonse pali lelo. Ca cine, cila muntu mu cilonganino kuti alecitako fimo ifingalenga icilonganino ukulakosa no kulakula. Finshi ifyo fine twingacita?

Kuti tulekoselesha bambi lyonse fye no kulabafwa ukukosa mu mulimo wa kwa Lesa. (Rom. 14:19) Ukulanga ifisabo fya mupashi wa kwa Lesa mu kwampana kwesu na bamunyinefwe mu cilonganino, na ko kuti kwalenga ‘umubili onse ukulakulilako.’ (Gal. 5:22, 23) Na kabili tufwile ukulafwaya inshila sha ‘kucitilamo ifisuma kuli bonse, lelo maka maka ku batetekela banensu.’ (Gal. 6:10; Heb. 13:16) Bonse fye mu cilonganino, e kuti bamunyinefwe na ba nkashi, abaice na bakalamba, kuti bacitako ifingalenga ‘umubili ukukoselako mu kutemwana.’

E lyo kabili, kuti tulebomfya amano yesu, amaka yesu ne fyo twakwata mu mulimo wa kupususha abantu uo icilonganino cibomba. Yesu Kristu atile, “Mwapeelwe fye ubupe.” E ico finshi na ifwe tufwile ukucita? Asosele no kuti: “Mulepeela fye.” (Mat. 10:8.) Kanshi mulebomba sana uyu mulimo wacindama uwa kushimikila pa Bufumu no kupanga abasambi. (Mat. 24:14) Bushe kwaliba ifilenga mwilabombesha? Nga e ko fyaba, ibukisheni mukamfwilwa Yesu alandilepo. Indalama apeele ubupe yali iinono sana. Lelo Yesu atile, apeele ishingi nga nshi pali bonse pantu ena apeele shonse isho akwete.—2 Kor. 8:1-5, 12.

Muletasha nga Bamwafwa

Na lyo line, kuti kwaba inshita ilyo mwingakabila ubwafwilisho ukufuma ku cilonganino. Te kwesha ukushimunuka ukupokelela ubwafwilisho ubuli bonse nga ca kuti bamo mu cilonganino balefwaya ukumwafwa ilyo muli na mafya ayatuponena muli cino calo. Yehova alipekanya abaume bafikapo aba “kucema icilonganino,” abengamwafwa nga ca kuti ifya kwesha na macushi fyamuponena. (Imil. 20:28) Baeluda na bambi mu cilonganino balafwaya ukumusansamusha, ukumwafwa no kumucingilila ilyo muli na mafya.—Gal. 6:2; 1 Tes. 5:14.

Lelo lyonse nga bamwafwilisha te kwesha ukulaba ukutasha. Muleibukisha ukuti Abena Kristu banenu nga balemwafwilisha ninshi ni Lesa alemulanga icikuuku cakwe. (1 Pet. 4:10) Mulandu nshi ico cacindamina? Pantu tatufwaya ukuba nga bantu ba muli cino calo, abashitasha nga babafwa.

Twilapamfya

Muli kalata Paulo alembele ku cilonganino ca ku Filipi, alandile pali Timote ukuti:  “Nshikwete umuntu umbi uwakwata umutima uwalingana no wakwe, uwingamusakamana icine cine.” Lyena atile: “Bonse abashala baleifwaila fye ifyabo abene, te fya kwa Kristu Yesu iyo.” (Fil. 2:20, 21.) Nga twatontonkanya sana pa fyalandile Paulo, bushe kuti twalanga shani ukuti tatubika fye amano ku ‘fyesu fwe bene’?

Tatufwile ukulapamfya ilyo tulelomba bambi mu cilonganino ukuti babomfye inshita yabo no kutwafwa ilyo tuli na mafya yesu. Mulandu nshi? Tontonkanyeni pali ici: Ukwabula ukutwishika kuti twatasha sana nga ca kuti munyinefwe atupeela ifyo tulekabila ilyo twakwata ubwafya mu kupumikisha fye. Lelo bushe kuti cawama ukumupamfya ukuti atupe ifyo tulekabila? Awe iyo. Kanshi na lintu tulefwaya bamunyinefwe ukubomfya inshita yabo ku kutusakamana ilyo tuli na mafya, tatulingile ukubapamfya nelyo ukwenekela bena ukupoosa inshita iikalamba sana pali ifwe. Na kuba tufwaya fyonse ifyo Abena Kristu banensu baletucitila, baleficita mu kuitemenwa.

Ukwabula no kutwishika bamunyinefwe na bankashi balafwaya ukumwafwa inshita iili yonse. Lelo limo kuti bafilwa ukumucitila fyonse ifyo mulefwaya. Nga bafilwa ukumwafwa, mulecetekela fye ukutila Yehova akulamwafwa mu mafya yonse ayo mwakwata nga filya ayafwile umo uwaimbile amalumbo.—Amalu. 116:1, 2; Fil. 4:10-13.

E ico, ukwafwa konse uko Yehova ateyanya, maka maka ilyo muli na mafya na macushi, mulepokelela no kutasha. (Amalu. 55:22) E fyo Lesa afwaya. Lelo alafwaya na imwe ‘mulepeela ne nsansa.’ E ico, mulepeela icili conse icingatungilila ukupepa kwa cine ukulingana no mo ‘mupangile mu mutima wenu.’ (2 Kor. 9:6, 7) Nga mulecita ifyo, ninshi mukalacita fyonse fibili, ukutasha ilyo bamwafwa, e lyo no kupeela no mutima onse.

[Akabokoshi ne Fikope pe bula 31]

“Cinshi ndebwesesha kuli Yehova pa fisuma fyonse ifyo ancitila?”—Amalu. 116:12

▪ Mulelubulako inshita ya ‘kucita ifisuma kuli bonse’

▪ Mulekoselesha bambi no kubaafwa ukuba abakosa mu kupepa

▪ Mulebomba umulimo wa kupanga abasambi apapela amaka yenu