Nafyalilwe ku Uganda mu musumba wa Gomba. Abantu abengi muli uyu musumba bali bapiina. Mu musumba twaleikala tamwali amalaiti kanshi ubushiku twaleasha fye koloboi.

 Abafyashi bandi bali ni bashibulimi kabili bakukiile ku Uganda ukufuma ku Rwanda. Balelima kofi e lyo ne nkonde, kabili ku nkonde balepangako ubwalwa ubo baleita ati waragi. Abafyashi bandi baleteka ne nkoko, imbushi, inkumba e lyo ne ng’ombe. Intambi shesu e lyo ne fyo nakulile, fyalengele ndemona ukuti umukashi afwile ukulaumfwila fyonse ifyo umulume wakwe amweba kabili tafwile ukulandapo ifyo ena aletontonkanya.

 Ilyo nali ne myaka 23 nakukiile ku Rwanda kabili naleya na banandi mu fikuulwa fya bwalwa umwaleba no kucinda. Kwali icikuulwa ico naleyamo sana ica kuti abene ba cikuulwa basukile bansuminisha ukulaingila fye ukwabula ukulipila. Kabili nalitemenwe na mafilimu umwaleba ulubuli e lyo no bunkalwe. Abo nalesangwa nabo e lyo na mafilimu naletamba fyalengele naba uwa lubuli, uwa bulalelale kabili cakolwa.

 Mu 2000, natendeke ukwikala no mwanakashi Skolastique Kabagwira, kabili twalikwete abana batatu. Ukulingana ne fyo nakulile, namwebele ukuti pa kumposha nelyo pa kulomba cimo afwile afukama. Na kabili naleti fyonse ifyo twakwata fipe fyandi kabili nalingile ukufibomfya ukulingana ne fyo nalefwaya. Ilingi naleya mu kwangala ubushiku kabili nalebwela ku macaca ninshi ninkolwa. Nga nafika pa ng’anda, nalekonkonsha ku ciibi kabili Skolastique nga akokola ukwisulako nalemupuma.

 Pali iyi nshita, nalebomba ku kampani ka bamalonda, nine naleangalila ababomfi kabili nalefola indalama ishingi. Ba Skolastique balyeseshe ukumpatikisha ukuti ntendeke ukulapepa kwi calici lya ba Pentekosti uko baleya, pantu balemona ukuti nalimo kuti na-aluka. Nomba nalikeene ukulaya ku calici balepepa. Lelo natendeke ukulaenda no mwanakashi umbi. Pa mulandu ne mibele yandi iya bunkalwe e lyo ne fyo nalecita ubulalelale, ba Skolastique balinshile kabili basendele na bana batatu baya na ku bafyashi babo.

 Abakalamba bamo abali cibusa cesu balinjebeleko pa fyo imibele yandi yali. Bankoseleshe ukuti tukabweshanye na ba Skolastique. Batile abana bandi bali abasuma sana kabili tabalekabila ukwikala ukwabula bashibo. E ico mu 2005, nalilekele ukunwa ubwalwa, nalishile no mwanakashi uo nale-enda nankwe kabili nalibwelele kuli ba Skolastique. Mu 2006 twalyupene. Na lyo line nali no lubuli kabili nalecusha abena mwandi.

 Mu 2008 ba Joël abali ni Nte ya kwa Yehova, balishile pa ng’anda kabili nalikutike ku fyo balesambilisha. Pa myeshi iingi ba Joël e lyo na ba Nte bambi ba Bonaventure baleisa pa ng’anda kabili twalelanshanya nabo Baibolo. Naleipusha amepusho ayengi maka maka ifyaba mwi buuku lya Ukusokolola. Ico naleipushisha ifi fipusho, nalefwaya ukushinina Inte sha kwa Yehova ukuti ba bufi. Ku ca kumwenako, nalebepusha ukutila cinshi mulandila ukuti aba mwi “bumba likalamba” abo balandapo pa Ukusokolola 7:9, bakekala pano isonde libe ninshi Baibolo ilanda ukutila ‘baiminina pa ntanshi ya cipuna ca bufumu [bwa kwa Lesa] na pa ntanshi ya Mwana wa mpaanga,’ Yesu Kristu? Ba Joël balintekanishishe kabili balinjaswike ifipusho nalebepusha. Ku ca kumwenako, banangile amashiwi yaba pali Esaya 66:1 apo Lesa alanda ukuti isonde ‘cipuna ca makasa yakwe.’ Kanshi ibumba likalamba baiminina pe sonde pa ntanshi ya cipuna ca bufumu bwa kwa Lesa. Kabili nalibelengele na Amalumbo 37:29 ayatila abalungama e bakekala mu calo, kabili bakekalamo umuyayaya.

 Mu kuya kwa nshita, nalisumine ukulasambilila Baibolo. E ico ba Bonaventure balitendeke ukutusambilisha Baibolo na ba Skolastique. Ukusambilila Baibolo kwalilengele ntendeke ukwaluka. Nalisambilile ukulacindika abena mwandi. Nshalefwaya ukuti balefukama pa kumposha nelyo pa kulomba fimo kuli ine, kabili nalilekele no kumona ukuti ifipe fyonse ifyo twakwete fyandi neka. Nalilekele no kutamba amafilimu umwali ubunkalwe. Calinkoseele ukwaluka kabili nalekabila sana ukuilama no kuba uwaicefya.

 Pali iyi nshita ninshi twalitwala kale umwana wesu umukalamba Christian, kuli balupwa abaleikala ku Uganda. Nomba ilyo twabelengele Amalango 6:4-7, nasambilile ukuti ine na bena mwandi ni fwe twakwata umulimo wa kukusha abana no kubasambilisha ifyo Baibolo ilanda. Ilyo twamubweseshe pa ng’anda twalitemenwe sana kumo no mwana wine!

 Nalisambilila ukuti Yehova ni Lesa uwaba no luse kabili nalicetekela ukuti alimbelela uluse pa fyabipa ifyo nalecita kale. Nalitemenwe sana ifi ba Skolastique nabo batendeke ukusambilila Baibolo pamo na ine. Twali-ipeele kuli Yehova kabili twalibatishiwe pamo pa 4 December, mu 2010. Pali ino nshita twalicetekelana kabili tulabomfya ifyo Baibolo ilanda mu lupwa lwesu. Abena mwandi balitemwa sana ifi pali ino nshita nja fye ku ng’anda nga nainuka ku ncito. Kabili balatasha sana na pa fyo nabacindika, ifyo naleka ukunwa ubwalwa, na pa fyo naleka ukuba umunkalwe. Mu 2015, balinsontele ukuba eluda pa kuti ndeafwako ukucema icilonganino. Pa bana 5 abo twakwata batatu balibatishiwa.

 Ilyo nalesambilila Baibolo ne Nte sha kwa Yehova, nshalesumina fye ifyo balesambilisha ukwabula ukuti nshininkishe. Nalitemenwe filya balebomfya Baibolo pa kwasuka ifipusho nalebepusha. Ine na ba Skolastique twasambilila ukuti bonse abatila bapepa Lesa wa cine bafwile ukulakonka amafunde yakwe yonse, tabafwile ukulaumfwila fye amafunde ayo balefwaya. Ndatasha sana ifi Yehova anenga ukuba cibusa wakwe e lyo no kundeta mu cilonganino cakwe. Nga natontonkanya pa fyo naali, nalicetekela ukuti umuntu onse kuti aaluka, atendeka no kulenga Lesa ukusekelela nga ca kuti Lesa amwafwa ukwaluka.