Long Franis, long Sande 5 Jenuware 2014, taem Serge i stap ron long bas blong go long wan asembli blong ol Witnes blong Jehova klosap long Paris, hem i luk wan aksiden we i nogud we i nogud. Hem i talem se: “Wan trak i sperem simen we i holemtaet wan brij mo i flae i go antap, i bangem brij ya, nao faea i laet long hem, mo biaen i foldaon i kamdaon we fol wil antap.”

Serge i wan faeaman blong 40 yia finis. Hem i wan kapten long ples blong wok blong hem, taswe hem i kwik blong tekem aksen. Hem i talem se: “Mifala i stap ron long rod we i pas narasaed, be mi askem long draeva blong bas blong i stop, nao mi ron i gobak long trak we faea i stap laet long hem.” Serge i harem wan voes we i stap singaot se “!Sevem mi! !Sevem mi!” Hem i talem se: “Mi mi werem klos blong miting mo nektae, mo mi no gat ol tul blong kilim faea. !Be voes ya i soemaot se i gat sam man we mi save sevem olgeta yet!”

Serge i goraon long trak ya, mo i luk wan pasenja we tingting blong hem i no moa klia, ale hem i tekem hem i go long ples we i sef. Serge i talem se: “Hem i talem se i gat tu narafala man insaed long trak. I gat plante narafala trak tu oli kam stop, be from we faea ya i hot tumas, ol man oli no save kam klosap.”

Sam long ol draeva oli kam wetem sam botel blong kilim faea. Nao Serge i talem long olgeta blong oli spre long faea ya, ale oli mekem, nao faea ya i godaon blong smoltaem. I luk olsem se draeva i fas aninit long trak. Taswe Serge mo ol narafala oli leftemap trak ya, oli pulumaot draeva ya, mo oli tekem hem i go long ples we i sef.

Serge i talem se: “!Stret long taem ya, faea i laet bigwan bakegen!” Be i gat wan moa pasenja insaed we strap blong jea i fasem hem, nao i hang i stap. Wan narafala faeaman we i no wok long taem ya, i kam be i werem ol klos blong ron long baskel. Serge i talem se: “Mi eksplenem long hem se trak ya i rere blong bosta, ale mitufala i holem han blong man ya nao mitufala i pulumaot hem.” I no wan minit yet, trak ya i bosta.

Taem faea trak mo ambulans i kam, oli lukluk long ol pasenja ya, mo oli kilim faea. Faea i bonem ol han blong Serge mo sam samting i katem hem, ale oli putum plasta long han blong hem. Taem Serge i stap klaem long bas blong go long asembli, sam man oli ron i go long hem blong talem tangkiu long hem.

Serge i glad tumas se hem i stap blong givhan long olgeta. Hem i talem se: “Mi mi harem se mi gat bigfala wok long fes blong God blong mi Jehova, blong sevem laef blong olgeta ya. Mi mi glad tumas se mi save sevem laef blong olgeta ya.”