Long Julae 2009, ol Witnes blong Jehova oli pem wan graon long apstet New York, we oli plan blong muvum wol hedkwota i go long hem. Graon ya i bigwan olsem 102 hekta mo i stap 80 kilometa notwes long Brooklyn, New York, ples we hedkwota i bin stap long hem stat long 1909.

Bambae i gat 800 Witnes oli laef mo wok long niufala hedkwota. Bambae i gat wan bilding blong ol ofis, wan bilding blong ol woksap, mo fo bilding blong ol rum blong slip. Mo tu, oli plan blong mekem wan smol musium we i soemaot histri blong wok blong ol Witnes blong Jehova.

Hedkwota bambae i kavremap 18 hekta blong graon ya, be ol naesfala bus mo lek raonabaot bambae oli stap olsem nomo. Bambae i no gat plante gras raonabaot long ol bilding ya, be bambae oli planem ol samting we i luk naes wetem ol bus.

Oli disaenem ol bilding ya blong oli no westem tumas paoa mo ol narafala samting. Hemia i min se oli no spolem envaeronmen mo oli sevem mane. Eksampol, antap long ruf blong ol bilding, bambae oli planem ol gras mo flaoa we i no nid blong spenem bigfala taem blong lukaotem. Hemia i min se taem i ren bambae i no gat tumas wota i ron long ruf, mo i no hot o kolkol tumas insaed long bilding. Bambae oli putum ol bigfala windo long ofis blong laet i save kam insaed. Mo tu, oli wantem se bilding ya i no yusum tumas wota.

?From wanem oli muvum hedkwota? Naoia plante branj ofis blong ol Witnes blong Jehova long ol narafala ples long wol, oli serem wok ya blong printim ol Baebol mo ol buk, we bifo oli bin printim long Brooklyn. Long 2004, oli muvum ol masin blong printim mo sanemaot ol buk long Yunaeted Stet i go long Wallkill, New York, hemia 145 kilometa notwes long Brooklyn.

Mo tu, plan ya bambae i sevem mane. I sas moa blong gat wan faktri long Brooklyn. Sipos oli muv i go long ples we ol bilding oli stap wanples, oli save yusum gud presen mane blong sapotem wok blong tijim Baebol.

Bifo we oli kasem pemit blong bildim hedkwota, samfala oli mas kam blong jekem sipos bambae i no spolem envaeronmen. Sipos evri samting i go gud, bambae oli statem wok ya long 2013 mo finisim fo yia biaen.

Ol Witnes blong Jehova oli gat faktri blong printim ol buk long Wallkill, New York, mo wan senta blong edukesen long Patterson, New York. Mo tu, oganaesesen i gat ol branj ofis long plante kantri. I gat bitim seven haf milian Witnes long fulwol.