Aesea 65:1-25
65 “Mi mi letem olgeta we oli no bin askem mi, oli lukaotem mi,Mi mi letem olgeta we oli no bin lukaotem mi, oli faenem mi.+
Mi talem long wan nesen we i no stap singaot long nem blong mi, se: ‘!Mi hemia, mi hemia!’+
2 Long fuldei, mi mi openem han blong mi long ol stronghed,+Mo long olgeta we oli stap wokbaot long rod we i nogud,+We oli stap folem prapa tingting blong olgeta nomo.+
3 Oltaem olgeta ya oli stap agensem mi stret long fes blong mi,+Oli stap bonem sakrefaes long ol garen,+ mo oli stap bonem sakrefaes long ol brikis blong mekem oli smok.
4 Oli stap sidaon long medel blong ol gref,+Mo oli stap spenem naet long ol ples we oli haed,*Oli stap kakae mit blong ol pig,+Mo supsup blong ol samting we oli doti,* i stap long ol sospen blong olgeta.+
5 Oli talem se: ‘Yu stap yu wan nomo, yu no kam klosap long mi,From we mi mi tabu moa long yu.’*Ol samting ya oli ol smok long hol blong nus blong mi, wan faea we i stap laet fuldei.
6 !Yu luk! Oli raetemdaon samting ya stret long fes blong mi,Bambae mi no save stanap kwaet,Be bambae mi givimbak long olgeta,+Bambae mi givimbak long olgeta long fulmak blong hem*
7 From ol rong blong olgeta mo ol rong blong ol olfala blong olgeta tu.”+ Hemia nao tok blong Jehova.
“From we oli bonem sakrefaes antap long ol bigfala hil blong mekem i smok,Mo oli tok nogud long mi antap long ol hil,+Fastaem, bambae mi givim ful pei blong olgeta.”*
8 Hemia samting we Jehova i talem i se:“Olsem we man i save kasem yet niu waen long wan bandel blong ol grepNao wan man i talem se: ‘Yu no spolem, from we i gat sam gudfala samting* long hem,’Long sem fasin, bambae mi mekem sem mak from ol man blong wok blong mi,Bambae mi no spolem olgeta evriwan.+
9 Bambae mi tekem wan pikinini* blong Jekob i kam,Mo mi tekem wan man long Juda, blong i kam stap long ol bigfala hil blong mi,+Man we mi bin jusumaot bambae i holem ples ya i blong hem,Mo ol man blong wok blong mi bambae oli stap long hem.+
10 Saron+ bambae i kam ples blong putum ol sipsip,Mo Vali* Blong Akoro,+ bambae i kam wan ples blong spel blong ol buluk,Blong ol man blong mi we oli lukaotem mi.
11 Be yufala i stap long medel blong olgeta we oli stap lego Jehova,+Hemia olgeta we oli stap fogetem bigfala hil blong mi we i tabu,+Mo oli stap putumgud wan tebol blong god blong Gudlak,Mo olgeta we oli stap fulumap ol kap long waen we oli miksim gud finis, blong god we i Bos Long Samting We i Hapen Long Laef.
12 Taswe bambae mi mekem se naef blong faet i kasem yufala,+Mo bambae yufala evriwan i mas bodaon blong oli kilim yufala i ded,+From we mi singaot, be yufala i no ansa,Mi toktok, be yufala i no lesin,+Yufala i gohed blong mekem samting we i nogud long ae blong mi,Mo yufala i jusum samting we mi mi no glad long hem.”+
13 From samting ya, hemia samting we Hae Masta Jehova i talem, i se:“!Yufala i luk! Ol man blong wok blong mi bambae oli kakae, be bambae yufala i go we yufala i hanggri nomo.+
!Yufala i luk! Ol man blong wok blong mi bambae oli dring, be bambae yufala i go we yufala i tosta.+
!Yufala i luk! Ol man blong wok blong mi bambae oli glad,+ be yufala bambae sem i kilim nogud yufala.+
14 !Yufala i luk! Ol man blong wok blong mi bambae oli glad oli stap singaot from we hat blong olgeta i gud,Be yufala bambae yufala i krae from we hat blong yufala i soa tumasMo bambae yufala i krae bigwan from we tingting blong yufala i foldaon olgeta.
15 Nem we bambae yufala i livim i stap, ol man blong mi we mi jusumaot olgeta bambae oli yusum olsem samting blong singaot trabolMo Hae Masta Jehova bambae i kilim yufala wanwan i ded,Be ol man bambae oli singaot ol prapa man blong wok blong hem long wan narafala nem.+
16 Olsem nao, eni man long wol ya we i stap lukaotem blesing,Bambae God blong trutok* i blesem hem,Mo eni man long wol ya we i mekem wan strong promesBambae i mekem long nem blong God blong trutok.*+
From we ol man bambae oli no moa tingbaot ol samting ya bifo we oli stap mekem olgeta oli harem nogud,*Bambae mi no moa luk olgeta, oli haed.+
17 !Yufala i luk! Mi mi stap mekem niufala heven mo wan niufala wol.+
Mo ol man bambae oli no moa tingbaot ol samting blong bifo,*Mo bambae oli no kam nating long hat blong olgeta.+
18 Taswe yufala i mas glad mo yufala i harem gud olwe, from samting we mi stap mekem.
!Yufala i luk! Mi mi stap mekem Jerusalem i kam olsem samting we man i glad fromMo mi mekem ol man blong hem, oli kam olsem samting we man i harem gud from.+
19 Mo bambae mi glad long Jerusalem mo mi harem gud from ol man blong mi,+Bambae oli no moa harem noes blong krae long hem, no krae blong man we i harem nogud.”+
20 “Bambae i no gat wan bebi long ples ya we i laef, be blong sam dei nomo,No wan olfala man we i ded be i no finisim gud ol dei blong laef blong hem yet.
Eni man we i ded taem i gat wan handred yia, bambae oli tingbaot hem olsem we hem i wan smol boe nomo,Mo man blong mekem sin bambae oli singaot trabol i kam long hem, nating se hem i gat wan handred yia.*
21 Bambae oli bildim ol haos mo oli stap long olgeta,+Mo bambae oli planem ol plantesen blong grep mo oli kakae ol frut blong olgeta.+
22 Bambae oli no bildim haos blong wan narafala man i stap long hem,No oli planem kakae blong ol narafala man oli kakae.
From we ol dei blong ol man blong mi bambae i olsem ol dei blong wan tri,+Mo ol man blong mi we mi jusumaot olgeta, bambae oli harem gud fulwan long ol wok blong han blong olgeta.
23 Bambae oli no taetem bun* blong nating,+Mo ol pikinini we oli bonem olgeta, bambae oli no safa,From we olgeta ya oli pikinini* ya we Jehova i blesem olgeta,+Mo olgeta ya tu we oli kamaot biaen long olgeta.+
24 Mo bifo we oli singaot, bambae mi mi ansa,Taem oli stap toktok yet, bambae mi harem olgeta.
25 Bambae wulf mo smol sipsip i kakae wanples,Laeon bambae i kakae drae stik blong wit olsem bul,+Mo bambae kakae blong snek hem i das.
Bambae oli no givim kil mo oli no spolem eni samting long olgeta ples long bigfala hil blong mi we i tabu.”+ Hemia nao tok blong Jehova.
Ol futnot
^ MNT: “long ol smol haos blong wajman.”
^ NT: “no klin.”
^ MNT: “From we bambae mi mekem yu tu yu tabu.”
^ PT: “mi fulumap gud poket klosap long jes blong olgeta.”
^ PT: “mi fulumap gud poket klosap long jes blong olgeta.”
^ PT: “i gat wan blesing.”
^ PT: “sid.”
^ NT: “Levelples Long Medel Blong Ol Hil.”
^ NT: “God we i stap holem promes.” PT: “Bambae Amen.”
^ NT: “God we i stap holem promes.” PT: “long nem blong Amen.”
^ NT: “tingbaot ol trabol blong bifo.”
^ NT: “Ol samting blong bifo, bambae oli no moa kam long maen blong ol man.”
^ MNT: “Mo man we i no laef kasem wan handred yia, bambae oli luk hem olsem wan man we oli singaot trabol i kam long hem.”
^ NT: “wok had.”
^ PT: “sid.”
