WAN long ol samting we i mekem se man i save stap laef, hemia se bodi i naf blong mekem soa i kam gud bakegen mo wokem niufala mit mo skin long ples blong hem. Wok ya i stat stret long taem we man i kasem kil.

Tingbaot: I gat plante impoten samting we oli hapen, blong mekem wan soa i kam gud bakegen:

• Ol smosmol samting long blad oli fas long soa. Hemia i mekem se blad i kam strong, mo i blokem ol smosmol string blong blad.

• Taem soa i solap mo i kam red mo drae, hemia i blokem enikaen bebet mo doti we i save mekem soa i kam bigwan moa.

• Sam dei biaen, bodi i stat blong wokem niufala mit mo skin, soa i kam smol moa, mo i stat blong fiksimap ol smosmol string blong blad.

• Las samting se, mit i kam strong moa, ples we soa i stap long hem i jenis smol, mo i gat wan mak i stap.

Ol man we oli wokem ol niufala samting, oli stadi long blad blong man mo olsem wanem i kam strong blong blokem soa. Nao oli yusum ol save ya blong wokem wan plastik we hem wan i save “kam gud bakegen” taem i gat hol long hem. Insaed long plastik ya i gat ol smosmol paep we tu kemikol i ronaot long olgeta blong blokem hol, olsem we blad i ron blong blokem soa. Taem tufala kemikol ya i joen, oli kam olsem wan krim we i kavremap hol ya no i blokem ol krak long plastik. Taem krim ya i kam strong, hem i sem mak olsem plastik we i stap fastaem. Wan man we i stadi long samting ya i talem se: “Mifala i luk samting we i hapen long ol laef samting blong mekem wan soa i kam gud bakegen, nao mifala i folem sem fasin blong fiksimap samting we i no laef, olsem plastik.”

?Wanem tingting blong yu? ?Fasin ya we bodi i save mekem soa i kam gud bakegen, hem i kamaot olsem nomo, no i gat wan Man i wokem?