Plante yia bifo, ol papa mo mama oli faswan blong tokbaot fasin blong man wetem woman long ol pikinini blong olgeta. Sloslo, oli save eksplenem samting ya folem yia blong pikinini mo save we hem i nidim.

Be naoia i defren. Wan buk (The Lolita Effect) i talem se: “Taem pikinini i smol nomo, hem i harem ol tok olbaot long fasin blong man wetem woman. Mo ol muvi blong pikinini long televisin, olgeta tu oli stap tokbaot ol samting ya.” ?Olsem wanem? ?Ol samting we pikinini i harem mo i lukluk, i givhan long hem, no i mekem i nogud long hem?

Ol samting we oli tokbaot fasin blong man wetem woman, oli stap long evri ples. Long buk blong Deborah Roffman (Talk to Me First), hem i talem se: “Ol storian, ol toktok blong pulum man blong pem samting, ol muvi, ol buk, ol singsing, ol stori long televisin, ol mesej long mobaelfon, ol gem, ol bigfala saen long saed blong rod, skrin blong mobaelfon mo kompiuta, oli fulap long ol pija mo toktok we i pulum tingting blong man i go long rabis fasin. Taswe, ol pikinini mo ol yangfala oli save ting se fasin ya blong slip tugeta i . . . moa impoten i bitim ol narafala samting.”

Ol stoa tu oli gat fol. Ol stoa oli salem ol klos blong pikinini we oli soemaot bodi. Hemia i tijim pikinini taem hem i smol, se hem i mas pulum ae blong man. Wan buk (So Sexy So Soon) i talem se: “Ol stoa oli save se pikinini i wantem we narafala i laekem hem mo i sem mak long ol fren blong hem. Taswe oli yusum ol tingting ya blong salem samting long olgeta. Oli pulum tingting blong olgeta i go long fasin blong boe wetem gel, blong oli wantem pem ol niufala samting.”

Save nomo i no naf. Maet wan man i save olsem wanem trak i wok, be hemia i no min se hem i wan gudfala draeva. Long sem fasin, i no naf blong ol pikinini oli save nomo long fasin blong man wetem woman. Be oli mas save tu, olsem wanem blong yusum save ya blong mekem ol gudfala desisen.

Samting we i impoten: Tede, i impoten moa bitim bifo, blong ol papa mo mama oli givhan long pikinini blong i trenem tingting blong hem. Olsem nao, bambae hem i kam “naf blong jusumaot wanem fasin i gud mo wanem fasin i nogud.”—Hibrus 5:14.

Yu toktok long hem. Yu mas toktok long pikinini blong yu, blong mekem hem i save long fasin blong man wetem woman, nating se i no isi. Hem i wok blong yu, mo yu mas mekem.—Rul blong Baebol: Ol Proveb 22:6.

Yu storian smosmol evri taem. I moagud yu toktok smosmol long hem taem yutufala i stap tugeta, i bitim we yu mekem wan longfala storian wetem hem. Maet hemia taem yutufala i stap go samples long trak, no yutufala i stap mekem wan wok. Blong pulum pikinini blong i toktok, i gud yu askem kwestin. Be i nogud yu askem se: “?Ol pija olsem oli pulum tingting blong yu?” I moa gud yu askem se: “?Yu ting se, from wanem ol man blong salem samting oli yusum ol pija olsem blong pulum man?” Taem hem i ansa, yu askem se: “?Yu ting se i stret we oli mekem olsem?”—Rul blong Baebol: Dutronome 6:6, 7.

Tingbaot yia blong pikinini. Taem pikinini i smol we i no skul yet, yu save tijim hem long nem blong ol tabu haf blong bodi blong man mo woman. Mo yu tijim hem olsem wanem blong blokem ol rabis man we oli wantem spolem hem. Taem hem i kam bigwan moa, yu save tokbaot sam stamba save blong eksplenem olsem wanem bebi i gru mo i bon. Taem hem i kam yangfala, hem i mas save plante moa samting long fasin blong man mo woman blong slip tugeta, mo i mas save wanem fasin i stret mo wanem fasin i no stret.

Yu talemaot ol fasin we yu no agri long olgeta. Taem pikinini i smol, yu mas stat blong tijim hem long ol gudfala fasin, olsem tok tru, stanap strong long stret fasin, mo respek. Nao taem yu tokbaot fasin blong man wetem woman, yu save joenem wetem ol gudfala fasin ya. Mo tu, yu talemaot klia ol fasin we yu no agri long olgeta. Wan eksampol: Sipos yu ting se i rong blong man mo woman i slip tugeta bifo mared, yu talem stret long hem. Mo yu eksplenem from wanem i rong, mo bigfala trabol we i save kamaot. Wan buk (Beyond the Big Talk) i talem se: “Plante yangfala oli no slip tugeta bifo mared, from we oli save se papa mo mama blong olgeta i no agri long fasin ya.”

Soemaot gudfala eksampol. Yu mas folem ol gudfala fasin we yu tokbaot long pikinini blong yu. Yu traem tingbaot: ?Yu stap laf long ol tokplei we i doti? ?Yu stap werem ol klos we oli pulum ae blong man? ?Yu stap pleplei wetem filing blong narafala? Ol fasin ya oli save mekem se tijing we yu givim long pikinini i no gat paoa.—Rul blong Baebol: Rom 2:21.

Tokbaot gudfala saed. God nao i stanemap fasin ya blong man mo woman i slip tugeta taem tufala i mared. Hem i wan presen we hem i givim blong tufala i harem gud long mared. (Ol Proveb 5:18, 19) Yu mekem pikinini blong yu i save se i gat stret taem blong hem tu i harem gud long presen ya. Sipos hem i wet long stret taem ya, bambae hem i no kasem trabol mo wari we olgeta we oli slip tugeta bifo mared oli kasem.—1 Timoti 1:18, 19.