Baebol i talem tu bigfala risen from wanem man i no naf blong putum pis long wol. Faswan risen se, God i no mekem man blong i save kam bos long laef blong hem, nating se ol man oli naf blong mekem plante gudfala samting. Nambatu risen se, “olgeta man blong wol ya oli stap long paoa blong Setan.” Taswe, nating se ol man oli traehad blong putum pis long wol, be i no save kamtru.—Ridim Jeremaea 10:23; 1 Jon 5:19.

I gat sam narafala samting tu we oli mekem se ol man oli no naf blong putum pis long wol. Ol man oli wantem mekem i gud long olgeta nomo, oli wantem kam rijman, gat hae nem, mo oli wantem win long evri samting. Taswe gavman we bambae i naf blong putum pis long wol ya, i mas wan gavman we i save tijim ol man blong oli laekem stret fasin, mo blong oli save lukaot gud long narafala.—Ridim Aesea 32:17; 48:18, 22.

God we i gat olgeta paoa i promes finis blong stanemap wan gavman we bambae i rul antap long olgeta man. Gavman ya bambae i tekem ples blong olgeta gavman blong man. (Daniel 2:44) Jisas we i pikinini blong God, hem i Stamba blong Pis, hem nao bambae i rul long gavman ya. Bambae hem i finisim ol nogud fasin long olgeta ples long wol, mo bambae hem i tijim ol man blong oli gat pis.—Ridim Aesea 9:6, 7; 11:4, 9.

Naoia i gat plante milian man raon long wol we oli stap wok aninit long lida blong olgeta, Jisas Kraes. Olgeta ya, oli yusum Baebol blong tijim ol man blong oli gat pis wetem narafala. Yes, i no longtaem bambae i gat pis long fulwol.—Ridim Aesea 2:3, 4; 54:13.