Baebol i talem se yumi no mas tekem blad. Taswe yumi no save akseptem blad, no ol fo stamba samting long blad nating se oli stap long kakae, no long wan meresin we oli yusum blong stikim i go long bodi blong yumi. Makem gud ol vas ya:

•   Jenesis 9:4. Afta we Bigfala Wota i ron, God i letem Noa mo famle blong hem blong oli save kakae anamol, be hem i talem long olgeta se oli no mas kakae blad. God i talem long Noa se: “Yufala i no save kakae mit we blad blong hem i stap long hem yet.” Loa ya i stret long evri man from we stat long taem ya, olgeta man oli kamaot long Noa.

•   Levitikas 17:14. “Yufala i no mas kakae mit blong anamol we blad blong hem i stap long hem yet. Sipos wan long yufala i kakae mit olsem, bambae mi mi no moa save kaontem hem, se i man blong mi.” God i tingbaot se sol o laef i stap long blad mo i blong hem nomo. Mo nating se God i givim loa ya long ol man Isrel nomo, be hemia i soemaot se long tingting blong hem, loa ya blong no kakae blad i impoten tumas.

•   Ol Wok 15:20. “No mas kakae blad.” God i talem long ol Kristin, sem loa ya nomo we hem i bin talem long Noa. Ol stori blong bifo oli soemaot se ol faswan Kristin oli no kakae blad mo tu oli no tekem blad blong winim sik blong olgeta.

?From wanem God i talem se yumi no mas tekem blad?

 Ol dokta oli faenemaot se fasin ya blong tekem blad i save spolem helt blong yumi. Be antap long hemia, God i blokem yumi blong no tekem blad, from we long lukluk blong hem, blad i pija blong wan samting we i tabu tumas.—Levitikas 17:11; Kolosi 1:20.