Tok ya “sol” long Baebol, hem i kamaot long Hibru tok ya neʹphesh mo long Grik tok ya psy·kheʹ. Long Hibru, tok ya i rili minim “wan samting we i pulum win,” mo long Grik, tok ya i minim “wan laef samting.” a Taswe sol hem i wan ful laef samting, be i no wan samting insaed long man we i laef afta we man i ded. Traem luk olsem wanem Baebol i soemaot se sol blong man, hem i minim man ya fulwan:

•   Taem Jehova i wokem faswan man, Adam, Baebol i talem se “man ya i kam wan laef sol.” (Jenesis 2:7, King James Version) Adam i no kasem wan sol—hem i kam wan laef sol, o man.

•   Baebol i talem se sol i save wok, hanggri, kakae, obei long ol loa, mo tajem wan dedbodi. (Levitikas 5:2; 7:20; 23:30; Dutronome 12:20; Rom 13:1) Ol defren aksen ya, ful bodi blong man nao i mekem, be i no jes wan haf blong bodi blong hem nomo.

?I tru we sol i no save ded?

 Nogat, sol i save ded. Plante vas blong Baebol oli tokbaot sol se i save ded. Hemia sam eksampol:

•   “Sol we i mekem sin, bambae hem i ded.”—Esikel 18:4, 20, King James Version.

•   Long Isrel bifo, panis blong wan bigfala sin hemia se “bambae oli mas aotem sol” ya. (Eksodas 12:15, 19; Levitikas 7:20, 21, 27; 19:8, King James Version) Bambae man ya “i mas ded.”—Eksodas 31:14, King James Version.

•   Afta we wan man i ded, sam vas blong Baebol oli yusum tok ya “sol we i ded,” blong tokbaot dedbodi blong hem. (Levitikas 21:11, futnot; Namba 6:6, futnot) Be long plante Baebol translesen, oli yusum tok ya “dedbodi” o “dedman” long ol vas ya, mo faswan lanwis Hibru i yusum tok ya neʹphesh, o “sol.”

“Sol” i save minim “laef”

 Baebol i yusum tok ya “sol” olsem wan narafala tok blong talem “laef.” Eksampol, long Job 33:22 Hibru tok ya (neʹphesh) we oli tanem i kam “sol” i sem mak long tok ya “laef.” Long sem fasin, Baebol i soemaot se sol, o laef, blong wan man i save stap long denja o i save lus.—Eksodas 4:19; Jajes 9:17; Filipae 2:30.

 Fasin blong yusum tok ya “sol” i halpem yumi blong kasemsave long ol vas we oli talem se sol i “goaot” o “i stap go.” (Jenesis 35:18; King James Version) Hemia i wan narafala stael blong toktok, blong talem se laef blong wan man i finis o i kam long en blong hem. Sam narafala translesen oli tanem tok ya long Jenesis 35:18, se “hem i pulum laswan win blong hem.”—Good News Translation; New Jerusalem Bible.

?Bilif ya se sol i no save ded, i kamaot wea?

 Ol skul we oli talem se oli Kristin mo oli bilif se sol i no save ded, oli no tekem tijing ya long Baebol, be long waes blong ol man Gris bifo. Buk ya The Encyclopædia Britannica i talem se: “Long Baebol, ol vas we oli tokbaot sol oli joen wetem tingting ya blong pulum win, mo i no mekem wan difrens bitwin sol mo bodi blong man. Tingting we ol Kristin oli gat se bodi i defren olgeta long sol, hem i kamaot long save blong ol man Grik bifo.”

 God i no laekem we ol man ol miksim ol tijing blong hem wetem waes blong ol man, olsem bilif ya se sol i no save ded. Be Baebol i givim woning se: “Yufala i mas lukaot se i no gat man i mekem yufala i fas long trap. Man olsem i save yusum waes blong wol mo ol giaman tok we i blong nating nomo. Ol samting olsem oli stanap long kastom blong ol man.”—Kolosi 2:8.