“Spirit we God i givim long yumi, hem i no blong mekem yumi fraet, be i blong mekem yumi gat paoa, yumi lavem ol man, mo yumi gat stret tingting.”—2 Timoti 1:7, Niu Wol Translesen.

 “God i no givim spirit blong fraet long yumi, be blong paoa, blong lav mo blong stret tingting.”—2 Timoti 1:7, New King James Version.

 God i save halpem man blong hem i gat strong tingting blong mekem samting we i stret. Be hem i no wantem se wan man i mekem i stret, jes from hem i “fraet” long ol narafala. Kaen fraet ya i nogud, from i save blokem man blong mekem samting we God i glad long hem.

 Vas ya i tokbaot tri fasin we God i givim, we i save halpem man blong winim nogud fraet ya.

 “Paoa.” Ol Kristin bifo oli naf blong stanap strong, nating we oli fesem ol enemi blong olgeta o sam narafala had situesen. Olgeta oli no letem fraet i winim olgeta, mo oli no ronwe. (2 Korin 11:23-27) ?Olsem wanem oli naf blong mekem samting ya? Aposol Pol i talem se: “Mi mi gat paoa blong fesem olgeta samting from God ya we i givim paoa long m.” (Filipae 4:13) God nao i givim “paoa ya we i bigwan bitim mak” long ol man blong hem, nao oli naf blong winim ol jalens we oli fesem.—2 Korin 4:7.

 “Lav.” Taem wan Kristin i rili lavem God, lav ya bambae i pulum hem blong mekem samting we i stret. Long sem fasin, lav we wan Kristin i gat long ol man, bambae i pulum hem blong tingbaot narafala fastaem, nating sipos hem i fesem fasin agens o i stap long denja.—Jon 13:34; 15:13.

 “Stret tingting.” Long Baebol, oli yusum tok ya stret tingting blong tokbaot wan Kristin we i mekem ol waes desisen we oli stanap long Baebol. Man olsem, hem i naf blong stap kwaet we tingting blong hem i klia, nating se hem i fesem hadtaem. Mo tu, ol desisen blong hem oli laenap wetem tingting blong God, from hem i save se frensip blong hem wetem God i impoten moa i bitim tingting we ol narafala oli save gat.

 Aposol Pol nao i raetem ol toktok long buk blong Seken Timoti, hem i raetem olsem wan leta we i go long wan fren mo man we i wok wetem hem, hemia Timoti. Long leta ya, Pol i leftemap tingting blong yangfala man ya Timoti blong i gohed nomo blong wok had long wok blong hem. (2 Timoti 1:1, 2) Maet Timoti i wan man blong sem, mo hemia i save blokem hem blong i mekem bes blong hem blong givhan long Kristin kongregesen. (1 Timoti 4:12) Be Pol i pulum hem blong tingbaot se hem i kasem wan presen, hemia spesel asaenmen long kongregesen. Pol i talem long Timoti se taem hem i prij mo i fesem ol hadtaem from bilif blong hem, hem i no mas fraet blong yusum otoriti we hem i gat olsem ovasia blong kongregesen.—2 Timoti 1:6-8.

 Nating se ol tok ya oli raetem blong Timoti, be oli givhan tu long olgeta we oli wantem mekem wok blong God tede, blong tingbaot se God bambae i givim help we oli nidim blong mekem ol wok blong olgeta, nating se i gat sam jalens.