Nté ôse Yésus a nga bo ésaé nkañete jé, a nga liti abui biyoñe na fulu éjote nyul é ne mfi abui. (Luc 14:8-11) A ne ôjeja’a ya yene befam a binga ba jeñe na be bo Zambe ésaé a éjote nyul. Ve e viane zu koone na, abui ya été be ne beta bebo mam abé.

Bepharisien a bescribe ba yene na avale bôt ete (bôte be ne zesé mise map) mbe ba ke be Yésus, be wô’ô fe foé jé. Ba ve nye mekua be jô’ô na: “Môte nyô a nyoñe bôt be ne abé, ba be be ve di.” (Luc 15:2) Bepharisien a bescribe ba bete bebiene yôp a ba yene bôte bevo’ ane mbuan ba tibi a mebo. Asu na be liti abim avé ba biasé be, betebe ôsu bete ba belan éfia ya nkobô Hébreu é ne na ‘am-ha’arèts, nge na “bôte ya si.”

Yésus ki a nyoñe bôt a mbamba nlem, a éjijin ése, a yeme fe tebe été jap. Abui ya ba ba yené zezé, to’o ba bôte ba yeme na be ne bebo mam abé, be ne ôjeja’a ya zu vô’ôlô miñye’elane mi Yésus. Nde ñhe, jé Yésus a wô’ôtan, a éyalan évé a zu ve asu bijô ba ve nye amu a vu nyoñe ngap a bôte ba yené zezé e mise me bôte bese?

Éyalane Yésus ja wô’é ne sañesañ amu a belan éve’an ja nambe bôt, é funa’ane ji a nga ve e Capernaoum. (Matthieu 18:12-14) Yésus a liti mam fo’o v’ane Bepharisien be ne bezôsôô be bôt a na, Zambe a yene be mvaé. Ve ba be ne bezezé be bôt, a tele be été bôte be ne njañane fé, teke yeme zen. Nde a jô na:

“Môte mbé ya be mia nge a bili beyale mintômba ntet, a dimili wua, a bo te li’i ba bevo’o 99 e nkôte si, asu ya ke tôñe nyô a ne njañan akekui a yeneya nye? Éyoñ a yeneya nye, a beté nye e bitule bié a meva’a mese, mebulane ya nda, a loone bemvôé bé, a bembôma’ane bé e nda jé a jô be na: e mbo’one mevak, amu me yeneya ngale ntômba wom a nga jañ.”​—Luc 15:4-6, Mfefé Nkôñelan.

Ñye’elan ôvé Yésus a ve valé? A jô na: “Avale te ma jô mia de na, mevak ma ye dañe bo e yôp amu mbo abé wua a kôñelane nlem a dañe bezôsôô 99 be nji yi nkôñelane nlem.”​—Luc 15:7, Mfefé Nkôñelan.

Bepharisien ba yiane wô’ ôlun éyoñe ba wô’ô Yésus a kobô’ô ajô nkôñelane minlem. Ba yene bebiene na be ne étua zôsôô, a é nji bo mfi na be kôñelane minleme miap. Ôbe mimbu mvus, éyoñe bevo’o y’été be nga ve Yésus bijô amu a mbe a ja’a a benyoñe taxe a bebo mam abé, a nga yalane na: “Me nji zu loone bezôsôô be bôt, ve bebo abé.” (Marc 2:15-17, Mfefé Nkôñelan) Mbôle Bepharisien ba buni na be ne zôsô, be nji  yene mfi ya kôñelane minlem, amu nalé be nji bo na meva’a me bo yôp. A nalé a selan éyoñe mbo mam abé a kôñelane nlem.

Amu a kômbô ngoné ôsimesane wé a lat a ava’a da so yôp éyoñ mbo mam abé a kôñelane nlem, Yésus a nyoñ éve’an éfe ja fombô nda bôt, a jô’ô na: “Minga mbé, nge a bili minsañ mi moné awôm, a dimili wua, a ye bo te bo’é lambe, a nga vose nda a tu’a jeñ, akekui a yene wô? Éyoñ a yeneya wô, a loone bemvôé be binga bé a e binga baa be nye be too bebé e nda jé a jô’ô na: bia be mia e mvakan, amu me yeneya e nsañe moné me nga dimili.”​—Luc 15:8, 9, Mfefé Nkôñelan.

Ñye’elan Yésus a ve wo lu’an a wu a te ve éyoñ a te kobô ajô ntômba wo too njañan. A jô éyoñe ji na: “Me ajô mia na, aval ete fe be aye va’a vôm beange be Zambe be to, éyoñ môte wua a ne abé a kôñelan nlem.”​—Luc 15:10.

Tame simesane jame di, beange be Zambe ba nyoñe ngap éyoñe bebo mam abé ba kôñelane minlem! A jam ete é ne fo’o angondô ya mfi amu, mbo mam abé a kôñelane nlem a ye bi éto ja dañe ji beange bebien Éjôé Zambe e yôp été! (1 Becorinthien 6:2, 3) Ve ja’a nalé, beange be nji bo éviele. Nde ñhe, bia ki bia yiane wô’ôtan aya éyoñe bia yene mbo mam abé a kôñelane nlem, a bulane be Zambe?