“Éyoñ ôsu bi nga laan a mone wongan ajô ya ñyuane meyok, a mbe a bili mimbu mi saman. Bi mbe fe’e ne vema amu bi nji be bi yeme’ na a nga yem abim abui mam ete a lat a ñyuane meyok.”​—Alexander.

•  Jam wo yiane yem

•  Jam ô ne bo

•  Jé Kalate Zambe a jô a lat a ñyuane meyok?

E laan a nyo mon ajô ya ñyuane meyok a ne angôndô ya mfi. Te yange na nyo mon a bo nkpwak. Khamit e Russie a jô na: “Ma buni na bi nga yiane taté na bia laan a mone wongan ajô ya ñyuane meyok éyoñ a mbe a ngenane mone mongô. Éngôngole jam é ne na, me nga zu yene mfi ya bo de éyoñ é maneya lôt. Me nga su’ulane yeme na monafam wom a nga taté na a nyu meyok a bili ve mimbu 13.”

Amu jé jam ete da yiane tyelé wo nleme yôp?

• Bongô besikôlô bevok, mimvôman a télé be ne mé ôsimesane nyo mon a lat a ñyuane meyok.

• Beyeme mam ba jô na e France, bongô besikôlô 17,5 e ntet ôse be so’oya meyok éyoñe jia ényiñe jap.

Ajô te nde bedokita ba jô na bebiaé ba yiane ji’a kate bone bap minju’u mi ne kui be éyoñe ba nyu meyok. Aval avé ô ne bo de?

Fase’e minsili nyo mon a ne sili wo. Bone be bongô ba kômbô yem abui mam. Nkômban ôte wo bo ngul éyoñe ba tu’a bo benya bôtô. Éve’an é ne na:

• Nge nyo mon a kômbô yem avale meyo’o me ne ôyem, ô ne kate nye na woon a ne ane binyunyui bi ne sañ, a na, bia a ne bo mon ayô.

• Nge nyo mon a kômbô tyek meyok, ô ne kate nye na mbôl a ngenane mongô meyok me ne mbia ngul asu nyule jé. Kate’e nye mam ma boban éyoñe môt a nyuya: Môt a ne fo’o wô’ôtan émiene mvo’é éyoñ a nyuya, ve nge a dañe nyu a ne jañele fek a bo ane môt a sok; a ne fe jô mam a ye jôban.​—Minkana 23:29-​35.

Tuka’a fas. Kalate Zambe a jô na: “Môt ase a ne fek a taté fas te na a bo jam éziñ.” (Minkana 13:16) Jeñe’e na ô tu’a yeme mam ma kui môt a nyu meyok a metiñe ya nlame wôé a lat a abime meyok môt a yiane nyu. Nalé aye kômesane wo na ô volô nyo mon.

Nyoñek éyoñe ya laan a nye ajô ete. Mark, ésa éziñe ya Grande Bretagne a jô na: “Ñyuane meyok ô ne joñôlô bongô. Me nga ve’ele sili monafam wom a ne mimbu mwom na a kate ma aval a yene ñyuane meyok, ye mboan ôte ô ne mvo’é nge abé? Me nga bo na bi laan évôvoé été, nalé a nga volô nye na a kate ma ôsimesane wé teke ko jam éziñe woñ.”

Nyo mon a ye vô’ôlô nge wo nyoñ éyoñe ya laan ajô ya ñyuane meyok a nye. Ane nyo mon a zu a yaé, ô ne kobô nye ajô ya ñyuane meyok to’o éyoñe mia nye mia laane mam mefe aval ane ajô ya tabe ntyel éyoñe wo dutu metua, nge mam ma fombô nkeane binoñ.

Liti’i nye mbamba éve’ela’a. Bongô be ne aval ane béponge, ba vili jôm ése ja bômane be. Beyeme mam ba jô na bongô ba dañe vu bebiaé bap. Nalé a tinane na nge wo nyu meyok asu ya na nlem ô bômbô wo si, nyo mon a ye buni na meyok mme ma kôme minjuk mise môt a ne bi ényiñ. Ajô te bo’o mbamba éve’ela’a asu nyo mon. Tabe’e ntyele ya beté ôdo’é éyoñe wo nyu meyok.