Gihatagan ta sa Diyos ug talagsaong regalo—ang pribilehiyo nga makakomunikar kaniya ug makasulti sa atong gibati pinaagi sa pag-ampo. Si propetang David miingon: “Oh Tigpatalinghog sa pag-ampo, moduol kanimo ang tanang matang sa katawhan.” (Salmo 65:2) Pero unsaon nato pag-ampo aron dunggon ug panalanginan ta sa Diyos?

Ang pag-ampo makatabang nimo nga ibubo ang imong kasingkasing ngadto sa Diyos—nga isulti ang imong tinuod nga gibati. (Salmo 62:8) Ang Diyos malipayng maminaw sa mapainubsanon ug sinserong mga pag-ampo.

Bisag daghag titulo ang Diyos, usa lang ang iyang personal nga ngalan. “Ako si Jehova. Kana ang akong ngalan.” (Isaias 42:8) Ang ngalang Jehova makitag kapin sa 7,000 ka beses sa Balaang Kasulatan. Daghang propeta ang nagtawag sa Diyos gamit ang iyang ngalan. Si Abraham miingon: “Palihog, Jehova, . . . tugoti ko nga magpadayon sa pagsulti [kanimo].” (Genesis 18:30) Busa dihang mag-ampo, angay sab natong gamiton ang ngalan sa Diyos, si Jehova.

Ang Diyos makasabot sa atong gihunahuna ug gibati bisag unsa pay atong pinulongan. Ang iyang Pulong nagpasalig nato: “Ang Diyos dili mapihigon, apan sa matag nasod ang tawo nga may kahadlok kaniya ug mobuhat kon unsay matarong dalawaton kaniya.”​—Buhat 10:34, 35.

Pero gawas sa pag-ampo, naa pa tay kinahanglang himoon aron panalanginan sa Diyos. Sa mosunod nga mga artikulo, atong sayron kon unsay kinahanglan natong himoon.