Mga Saad nga Naghatag ug Paglaom
Ang Diyos nagsaad ug eksayting nga mga kausaban sa umaabot. Iyang taposon ang pag-antos ug himoong makapalipay ang kinabuhi sa mga tawo sa yuta. (Salmo 37:11) Nganong makasalig ta niini nga saad? Kay “ang Diyos dili sama sa tawo nga mamakak.” (Numeros 23:19) Niay pipila sa maayong mga butang nga himoon sa atong Maglalalang.
Wad-on sa Diyos ang Daotang mga Tawo
“Bisan pag ang mga daotan manurok samag mga bunglayon ug ang tanang mamumuhat ug daotan molambo, bug-os nga kalaglagan ang ilang dangatan.”—SALMO 92:7.
Sumala sa atong nakat-onan sa miaging artikulo, nagkagrabe ang pagkadaotan. Dili ta angayng matingala niini. Gitagna sa Bibliya sa 2 Timoteo 3:1-5 nga sa “kataposang mga adlaw” ang mga tawo mosamot ka daotan. Kataposang mga adlaw sa unsa? Sa presenteng kalibotan sa dili diyosnong mga tawo. Sa dili madugay, laglagon sa Diyos kadtong dili magbag-o sa ilang daotang pagkinabuhi. Ug ang mabilin mao na lang ang maayong mga tawo—kadtong nagsunod sa Diyos. “Ang mga matarong manag-iya sa yuta, ug sila magpuyo niini hangtod sa hangtod.”—Salmo 37:29.
Laglagon sa Diyos si Satanas
“Ang Diyos nga nagahatag ug kalinaw magdugmok kang Satanas.”—ROMA 16:20.
Dihang mawala na ang tanang daotan, apil si Satanas ug ang mga demonyo, duna nay kalinaw sa tibuok yuta. Ang atong Maglalalang nagsaad: “Walay usa nga makapahadlok [kanimo].”—Miqueas 4:4.
Wad-on sa Diyos ang Sakit ug Kamatayon
“Ang tolda sa Diyos anaa uban sa mga tawo . . . Ug iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.”—PINADAYAG 21:3, 4.
Mawala na ang mga sakit ug pag-antos kay ayohon sa Diyos ang tanang kadaot nga gipahinabo ni Satanas, Adan, Eva, ug sa atong pagkadili-hingpit. Ingong resulta, bisan “ang kamatayon mawala na.” Ang mga tawo nga nahigugma ug nagmasinugtanon sa Maglalalang mabuhi sa walay kataposan. Pero asa sila magpuyo?
Himoon sa Diyos nga Paraiso ang Yuta
“Ang kamingawan ug ang umaw nga yuta magsadya, ug ang desyertong kapatagan magkalipay ug mamulak sama sa safron.”—ISAIAS 35:1.
Dihang wad-on sa Diyos ang tanang daotan, ang yuta mahimong paraiso! Duna na unyay daghang nindot nga mga parke ug hardin, ug kini magpatunghag abundang pagkaon. (Salmo 72:16) Ang mga dagat, lanaw, ug suba hinlo na ug punog kinabuhi. Bisan ang pulong nga “polusyon” mahimong mawala na sa atong bokabularyo! Ang mga tawo magpuyo sa balay nga ilang gitukod ug gipanag-iya. Ug dili na gyod mahitabo nga naay mga tawo nga walay balay, gigutom, o pobre.—Isaias 65:21, 22.
Banhawon sa Diyos ang mga Patay
“Duna unyay pagkabanhaw.”—BUHAT 24:15.
Gusto ba nimong makita pag-usab ang namatay nimong mga minahal? Sila banhawon—o buhion pag-usab—sa labing gamhanang Diyos ug papuy-on sa Paraiso nga yuta. Mailhan nimo sila ug mailhan pod ka nila. Imadyina ang kalipay nga inyong bation! Nganong makaseguro ta niini nga paglaom? Tungod kay ang Bibliya naghatag natog mga pananglitan sa mga tawo, apil mga bata, nga gibanhaw ug nahiusa pag-usab sa ilang pamilya. Dugang pa, si Jesus sagad nagbanhaw ug mga patay atubangan sa daghang tawo.—Lucas 8:49-56; Juan 11:11-14, 38-44.
Basin Ganahan Pod Ka
PAGMATA!
Kalibotan nga Punog Problema—Ampingi ang Imong Paglaom
Ang Bibliya makatabang nato sa pagsagubang sa mga problema ug naghatag kinig paglaom para sa umaabot.
TUBAG SA MGA PANGUTANA BAHIN SA BIBLIYA
Unsa ang Pagkabanhaw?
Lagmit masorpresa ka kon kinsay banhawon.
TUBAG SA MGA PANGUTANA BAHIN SA BIBLIYA
Kalinaw sa Yuta—Sa Unsang Paagi Kini Makab-ot?
Sayra kon unsay gisaad sa Diyos bahin sa pagpatunghag kalinaw sa yuta pinaagi sa iyang Gingharian.
