Sa 10 anyos ko, may mga batang Cambodian nga miabot sa akong eskuylahan sa Columbus, Ohio, U.S.A., niadtong 1985. Usa sa mga batang lalaki makamao gamay ug Iningles. Migamit siyag mga hulagway aron iestorya ang grabeng pag-antos, pagpamatay, ug pag-ikyas sa mga tawo sa ilang nasod. Maghilak ko magabii dihang maghunahuna sa mga bata. Gusto nakong isulti nila ang bahin sa Paraiso ug pagkabanhaw, apan dili sila makasabot ug Iningles. Busa bisag bata pa, nagtuon kog Cambodian aron masultihan nako ang akong mga eskolmet bahin kang Jehova. Wa lang ko mahibalo nga kini nga desisyon makaapektar sa akong kinabuhi sa ulahi.

Lisod tun-an ang pinulongang Cambodian. Duha ka beses kong naghunahuna nga moundang, apan gidasig ko ni Jehova pinaagi sa akong mga ginikanan. Sa ulahi, pirme kong gidasig sa akong mga titser ug eskolmet nga mangagpas ug karera nga dakog suweldo. Pero gusto kong magpayunir, maong mipili kog mga kurso sa hayskul nga makatabang nako nga makatrabahog partaym aron makab-ot ang akong tumong. Human sa klase, mokuyog kog sangyaw sa mga payunir. Nag-tutor sab kog mga estudyante nga nagtuon ug Iningles—desisyon nga dako kaayog tabang nako sa ulahi.

Sa nag-edad kog 16, akong nahibaloan nga may Cambodian group sa Long Beach, California, U.S.A. Mibisita ko didto ug nakakat-on sa pagbasag Cambodian. Paggraduwar nakog hayskul, nagpayunir dayon ko ug padayong nagsangyaw sa mga Cambodian duol sa amoa. Pag-edad nakog 18, naghunahuna kong mobalhin sa Cambodia. Peligroso gihapon sa Cambodia. Pero sa napulo ka milyong tawo sa Cambodia, pipila lang ang nakadungog sa maayong balita sa Gingharian. Niadtong panahona, usa ray kongregasyon sa tibuok nasod ug 13 lang ang magmamantala. Desinuybe anyos ko dihang una kong nakaadto sa Cambodia. Duha ka tuig sa ulahi, midesisyon kong mopuyo didto. Aron masuportahan ang akong pagpayunir, partaym kong naghubad ug nagtudlog Iningles. Paglabay sa panahon, naminyo kog sister nga sama nakog mga tumong sa kinabuhi. Nalipay mi nga nakatabang ug daghang Cambodian sa pagdedikar sa ilang kinabuhi sa Diyos.

Gihatag ni Jehova ‘ang mga hangyo sa akong kasingkasing.’ (Sal. 37:4) Ang paghimog tinun-an mao ang labing makapalipay nga propesyon. Sulod sa 16 ka tuig nako sa Cambodia, ang gamayng kongregasyon sa 13 ka magmamantala miuswag ngadto sa 12 ka kongregasyon ug 4 ka nahilit nga grupo!—Sumala sa asoy ni Jason Blackwell.