Magbasol ba ang Diyos?
Pakigsuod sa Diyos
Magbasol ba ang Diyos?
KAY dili-hingpit, kitang tanan usahay magbasol. Pananglitan, kita maguol dihang kita makaamgo nga kita nakahimog sayop. Makaiikag nga ang Bibliya nag-ingon nga si Jehova mahimong magbasol. ‘Apan hingpit ang Diyos,’ moingon ka. ‘Dili siya makahimog sayop!’ Nan, sa unsang paagi magbasol ang Diyos? Ang tubag makatabang kanato sa pagsabot sa usa ka butang nga talagsaon: Si Jehova dunay pagbati, ug ang atong binuhatan makaapektar sa iyang pagbati. Tagda ang giingon sa Maghuhukom 2:11-18.
Ang basahon sa Bibliya nga Mga Maghuhukom nagrekord sa gubot nga yugto sa kasaysayan sa Israel. Ang nasod nanimuyo na sa Canaan, ang yuta nga gisaad sa Diyos kang Abraham. Sa misunod nga mga siglo, ang kahimtang sa mga Israelitas mahimong sumahon sa upat ka balikbalik nga mga hugna: mibiya, gidaogdaog, nangamuyo, ug giluwas. a
Mibiya. Kay naimpluwensiyahan sa mga Canaanhon, ang Israel “mibiya kang Jehova” ug misunod sa ubang mga diyos; sila “mialagad kang Baal ug sa mga larawan ni Astoret.” b Ang maong pagbiya katumbas sa apostasya. Busa dili ikatingala nga ang mga Israelitas “nagpasuko kang Jehova,” ang Diyos nga nagluwas sa Israel gikan sa Ehipto!—Bersikulo 11-13; Maghuhukom 2:1.
Gidaogdaog. Tungod kay makataronganong masuko si Jehova, iyang gihikaw ang iyang proteksiyon gikan sa katawhan nga mibiya kaniya. Busa ang mga Israelitas gitugyan “ngadto sa kamot sa ilang mga kaaway,” nga misulong ug miilog sa ilang yuta.—Bersikulo 14.
Nangamuyo. Sa dihang sila makasinatig grabeng kalisdanan, ang mga Israelitas magbasol sa sayop nga ilang nahimo ug mohangyo sa Diyos alang sa tabang. Ang ilang pagpangamuyo gipaila sa pamulong nga “pag-agulo tungod sa mga nanglupig kanila.” (Bersikulo 18) Sa matag higayon nga sila makasinatig pagdaogdaog, sila mangamuyo kang Jehova. (Maghuhukom 3:9, 15; 4:3; 6:6, 7; 10:10) Unsay sanong sa Diyos?
Giluwas. Gipamati ni Jehova ang pag-agulo sa Israel ug siya “nagbasol.” Ang Hebreohanong pulong nga gihubad nga “nagbasol” mahimong magkahulogang “pag-usab sa hunahuna o intensiyon sa usa.” Ang usa ka reperensiya nag-ingon: “Si Jehova, kay natandog sa ilang pag-agulo, nag-usab sa iyang tinguha sa pagsilot ngadto sa pagluwas.” Tungod sa kaluoy, si Jehova “nagpatindog ug mga maghuhukom,” nga maoy moluwas sa iyang katawhan gikan sa ilang mga kaaway.—Bersikulo 18.
Namatikdan ba nimo kon unsay nagpalihok sa Diyos sa pagbasol, o pagbag-o sa iyang hunahuna? Kini mao ang kausaban sa tinamdan sa iyang katawhan. Hunahunaa kini: Ang usa ka mahigugmaong amahan lagmit magdisiplina sa iyang anak nga nakasala, tingali hikawan siya sa pipila ka butang. Apan sa dihang makita sa amahan nga ang iyang anak tinud-anayng nagbasol, siya modesisyon nga taposon na ang pagsilot.
Unsay atong makat-onan bahin kang Jehova gikan niini nga asoy? Bisan tuod ang tinuyong pagpakasala makapasuko kaniya, ang mahinulsolong kasingkasing magpalihok kaniya sa pagpakitag kaluoy. Angay natong hunahunaon nga ang atong ginabuhat makaapektar sa pagbati sa Diyos. Nganong dili nimo sayron kon sa unsang paagi imong ‘malipay ang kasingkasing’ ni Jehova? (Proverbio 27:11) Dili ka gayod magbasol kon imong buhaton kana.
[Mga footnote]
a Ang Maghuhukom 2:11-18 maoy bahin sa pasiunang mga pulong nga nagsumaryo sa katibuk-ang panggawi sa Israel, nga detalyadong gihisgotan sa misunod nga mga kapitulo.
b Si Baal mao ang pangunang diyos sa mga Canaanhon, ug si Astoret maoy usa ka diyosa nga gituohang asawa ni Baal.