Base sa report sa United Nations:

•   Gikan sa Oktubre 7 hangtod sa Oktubre 23, 2023, kapin sa 6,400 ka tawo ang namatay ug 15,200 ang naangol tungod sa away sa Gaza ug Israel, kadaghanan niini mga sibilyan o inosenteng tawo. Dugang pa, gatosan ka libo ang napugos nga mobiya sa ilang mga balay.

•   Pagka-Septiyembre 24, 2023, miabot nag 9,701 ka sibilyan ang namatay ug 17,748 ang naangol sa Ukraine tungod sa giyera sa Russia ug Ukraine.

 Unsang paglaom ang gihatag sa Bibliya alang niadtong nag-antos sa giyera?

 Ang Bibliya nagtagna nga ‘pahunongon sa Diyos ang mga gubat sa tibuok yuta.’ (Salmo 46:9) Pinaagi sa usa ka langitnong gobyerno, o gingharian, iyang pulihan ang tanang gobyerno sa tawo. (Daniel 2:44) Wad-on sa Gingharian sa Diyos ang tanang problema nga giantos sa katawhan.

 Matikdi kon unsay himoon ni Jesu-Kristo, ang Hari sa Gingharian sa Diyos:

•   “Luwason niya ang kabos nga nagtuaw alang sa tabang, ingon man ang timawa ug si bisan kinsa nga walay magtatabang. Maluoy siya sa timawa ug sa kabos, ug luwason niya ang kinabuhi sa mga kabos. Luwason niya sila gikan sa pagdaogdaog ug kapintasan.”—Salmo 72:12-14.

 Pinaagi sa iyang Gingharian, wad-on sa Diyos ang tanang kasakit ug pag-antos nga epekto sa giyera ug kapintasan.

•   “Iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.”—Pinadayag 21:4.

 Hapit nang sulbaron sa Gingharian sa Diyos ang mga problema dinhi sa yuta. Natuman na karon ang gitagna sa Bibliya nga “makadungog [tag] mga gubat sa lainlaing dapit.” (Mateo 24:6) Kini ug ang uban pang hitabo nagpaila nga nagkinabuhi na ta sa “kataposang mga adlaw” sa pagmando sa tawo.—2 Timoteo 3:1.