Itá Kot A Aúseling Ngeni Ach Kewe Iótek?
Ka fen piin ekieki ika Kot a wesewesen aúselinga óm iótek? Ika ewer, iwe esap chék en. Chómmóng ra fen iótek ngeni Kot usun ekkóch sókkun osukosuk, nge ekkena osukosuk rese pwák. Itá weween pwe Kot ese aúseling ngeni ach kewe iótek? Esap ina weween! Ewe Paipel a alúkúlúkú ngenikich pwe Kot a aúseling ngeni ach kewe iótek ika sia iótek ngeni lón ewe napanap mi pwúng. Sipwe ppii met ewe Paipel a apasa.
KOT A WESEWESEN AKKAÚSELING.
“En ka aüselinga iotek. Aramas meinisin repwe feito reöm.”—Kölfel 65:2.
Ekkóch ra iótek pokiten ra erá pwe a efisi ar repwe meefi kinamwe, inaamwo ika rese lúkú pwe a wor ié a wesewesen aúselinger. Nge sise chék iótek ren ach sipwe meefi kinamwe pwe sipwe tongeni likiitú fán ach kewe osukosuk. Ewe Paipel a alúkúlúkúkich pwe Jiowa, * “ewe Samol mi Lapalap a arap ngeni ir meinisin mi köri, a arap ngeniir meinisin mi köri fän wenechar . . . , a rong ar siö.”—Kölfel 145:18, 19.
Ina minne sia tongeni lúkúlúk pwe Jiowa Kot a aúselinga án ekkewe chón fel ngeni iótek. Fán tong a erá: “Oupwe köriei, oupwe feito o iotek ngeniei, nge ngang üpwe aüselingakemi.”—Jeremaia 29:12.
KOT A FÓKKUN MOCHEN ÓM KOPWE IÓTEK NGENI.
“Oupwe achocho ngeni iotek.”—Rom 12:12, Testament Mi Fö.
Ewe Paipel a pesengenikich ach sipwe sópweló le iótek me sipwe “iotek fansoun meinisin.” A ffat pwe Jiowa Kot a mochen ach sipwe iótek ngeni.—Mateus 26:41; Efisos 6:18, TF.
Pwata Kot a mochen ach sipwe iótek ngeni? Ekieki mwo ei: Emén sam a pwapwa atun néún we a tingorei an epwe álisi. Ewer, eli emén sam a fen silei met a lamot ngeni néún we are meefian, nge lupwen a rong án néún we tingorei an álillis, a pwári pwe néún na a lúkúlúk wóón i me a ririéch ngeni. Pwal ina chék usun, atun sia iótek ngeni Jiowa Kot, sia pwári pwe sia lúkúlúk wóón i me mochen ririéch ngeni.—Än Salomon Fos 15:8; James 4:8.
KOT A FÓKKUN TONGEOK.
“Oupwe likiti ngeni Kot ämi öürek meinisin, pun i a ekieki met oupwe feiöch ren.”—1 Petrus 5:7.
Kot a mochen ach sipwe iótek ngeni pokiten a tongekich me chúngúkich. A silei meinisin ach kewe osukosuk me aúrek, me a mochen álisikich.
Lón unusen manawen King Tafit, a chék ikkiótek ngeni Jiowa Kot ren álillis me a ereni met an kewe ekiek me memmeef. (Kölfel 23:1-6) Met meefien Kot usun Tafit? Kot a tongei Tafit me aúseling ngeni an kewe chómmóng iótek. (Föför 13:22) Pwal ina chék usun, Kot a aúseling ngeni ach kewe iótek pokiten a tongekich.
“ÜA ECHENI EWE SAMOL MI LAPALAP, PUN A RONGORONG MWELIEI”
Ina alon emén chón makkeei eú me lein ekkewe puken kélfel lón ewe Paipel. A unusen lúkú pwe Kot a aúselinga an kewe iótek, me ina met a fókkun álisi. A meefi an ririéch ngeni Kot me kúna pwe a apéchékkúla le likiitú fán weiresin manawan me an letipechou.—Kölfel 116:1-9.
Atun sia lúkú pwe Kot a aúselinga ach kewe iótek, sipwe sópweló le ikkiótek ngeni. Nengeni pwóróusen Pedro seni Spein. A má néún we át 19 ierin lón eú ákseten. Fán án Pedro letipeta, a iinaawu masouen letipan ngeni Kot me a kan ikkiótek ngeni ren ourur me álillis. Iwe met a fis? Pedro a erá: “Jiowa a pélúweni ai kewe iótek ren ekkewe ourur me álillis ám me pwúlúwei we aua angei seni chienem kewe Chón Kraist.”
Fán chómmóng pélúwen ach kewe iótek ra kan fis seni ekkewe ourur me álillis me ren chienach kewe mi tongekich
Inaamwo ika ekkewe iótek ese tongeni amanawatáái néún Pedro we seni máló, nge iótek a wesewesen álisi Pedro me pwúlúwan we. Iei met pwúlúwen Pedro we itan María Carmen a chemeni: “Iótek a álisiei le likiitú fán ai letipeta. Ua silei pwe Jiowa Kot a weweitiei pwe lupwen ua kan iótek ngeni, ua meefi kinamwe me a masésétiw ai weires.”
Ewe Paipel me ekkewe mettóch chómmóng ra fen pwisin kúna lón manawer, a unusen affata ngenikich pwe Kot a aúselinga iótek. Nge a pwal ffat pwe Kot ese aúseling ngeni meinisin iótek. Pwata Kot a aúselinga ekkóch iótek nge ese aúseling ekkóch?
^ par. 5 Jiowa ina iten Kot we. (Kölfel 83:18) Ewe kapasen lepoputáán lón ewe Paipel are Testamentin Lom me Testament Söfö, a apasa pwe “lon ewe Testamentin Lom sia nöünöü . . . ‘Samol mi Lapalap’ fän iten Jiowa ika Yahwe.”
