Meinisin Aramas mi Mürinnö Repwe Feitä Läng?

MWIRIN än Jises eti nöün kewe aposel le möngö lon ewe pwinin me mwen an epwele ninniilo, a pwon ngeniir pwe repwe nonnom läng. A erä: “Mi wor chomong ruum lon imwen Semei. Üpwe feila o amolätä leniemi. Üsap ürenikemi ei are esap let.” (Jon 14:2) Met popun Jises epwe awora leenier lon läng? Met repwe föri ikena ie?

Jises a ekieki an epwe awisa ngeni nöün kewe chon käeö eü wis mi aüchea. Lon ena chök pwinin, a erä: “Ämi oua etiei lon ai kewe riaföü meinisin. Usun Semei a ngeniei ai üpwe nemenem, iei usun üpwe pwal ngenikemi ewe nemenem.” (Luk 22:28, 29) Ren än Kot pwon, Jises epwe wisen King me awora ewe nemenem mi mürinnö aramas ra fokkun osupwangan. Jises epwe angasalo aramas seni riäfföü me arosalo iir kewe mi eriäfföür. Inaamwo ika nemenien Jises epwe chöülo “tori lesopun fanüfan,” nge an leenien motun king epwe nonnom lon läng.​—Kölfel 72:4, 8; Taniel 7:13, 14.

Iwe nge, Jises esap chök äläemön le nemenem. Ina minne, a pwon ngeni nöün kewe aposel pwe epwe wor leenier lon läng. Iir äkkäeüin mi kefilitä pwe “repwe nemenem won fanüfan.​—Pwarata 5:10.

Fitemön repwe feitä läng? Usun chök ekkewe mwuun fönüfan, ekkewe sou nemenemen ewe Mwuun Kot lon läng iir chökükkün chök ika sipwe alöllö ngeni chochoon ekkewe aramas repwe nemeni. Iei alon Jises ngeni iir kewe repwe fiti le nemenem: “Ousap niuokus, ämi mwich mi kisikis, pun Sememi a pwapwa ren an epwe ngenikemi ewe mwü.” (Luk 12:32) Chochoon ena “mwich mi kisikis” epwe 144,000. (Pwarata 14:1) Ra chokükkün seni ekkewe fite million aramas repwe nemeniir fän än Kot we Mwu, iir kewe repwe pwapwaiti manau esemuch woon fönüfan.​—Pwarata 21:4.

Ina minne, esap meinisin aramas mi mürinnö repwe feitä läng. Iei alon aposel Piter usun King Tafit, emön mi mürinnö: “Tafit esap püsin feitä läng.” (Fofor 2:34) Jon Papatais emön mwän mi mürinnö. Iwe nge, ren alon Jises ei, usun itä a äweweei pwe Jon esap wiseni ewe wis king lon läng: “Johannes Soupapatais a lap seni aramas meinisin mi uputiu won fanüfan. Nge iön mi kisikis lon Mwün Läng a fen lap seni Johannes.”​—Mattu 11:11.

Kopwe Angei ewe Feiöch fän iten Aramas mi Mürinnö?

Met emön epwe föri pwe epwe angei ewe feiöchün manau esemuch woon fönüfan? Jises a erä: “Kot a echeni chon fanüfan, pwe a fangela Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Jon 3:16) Pokiten än Kot tongei fönüfan a amwökütü i an epwe suuk ngeni meinisin ewe tufichin küna manau esemuch, nge iir kewe chök “mi lükü” repwe wesewesen angei ewe feiöch.

Mi lamot pwe lükü epwe longolong woon sile mi enlet. (Jon 17:3) Ka tongeni pwäratä pwe en emön aramas mi mürinnö ren om käkkäeö usun än Jiowa kokkot fän iten aramas. Anganga om lükü ren om apwönüetä met ka käeö. Iwe, ka tongeni lükülük pwe a wesewesen suuk ngonuk ewe manau esemuch.

 [Pwóór lón pekin taropwe 7]

Met ewe Paipel a Apasa?

Kapas Eis:

Met a fis ngeni ekkewe aramas mi mürinnö lupwen ra mälo?

Pölüwan:

“Nge ekewe sotup resap silei och mettoch.”​—ÄN SALOMON AFALAFAL 9:5.

Kapas Eis:

Ifa ewe äpilükülük fän iten ekkewe aramas mi mürinnö ra fen mälo?

Pölüwan:

‘Pun epwe war ewe fansoun lupwen ekewe sotup meinisin repwe rong mwelien [Jises] o towu seni peiaser.’​—JON 5:28, 29.

Kapas Eis:

Lap ngeni aramas mi mürinnö repwe nonnom ia?

Pölüwan:

“Ekewe chon pwüng repwe fanüeni ewe fanü o nonom won tori feilfeilachök.”​—KÖLFEL 37:29.