EN PTI fiy i dir son manman: “Zis kan lekol i large mon pou mont dan lakour.” Me ler lekol i large i reste e zwe avek son bann zanmi. Apre i dir son manman: “Mis ti fer nou reste apre lekol.” Eski i byen sa ki i’n fer?—

Oubyen petet en pti garson i dir avek son papa: “Mon pa’n zwe boul anndan mwan.” Kan sa ler i’n byen zwe boul anndan. Eski i byen pour li dir i pa’n fer sa?—

Sa Gran Ansennyan ti montre kwa ki byen fer. I ti dir: “Dir wi kan i wi, oubyen non kan i non. Tou sa ki zot dir an plis i sorti kot dyab.” (Matye 5:37) Ki Zezi ti oule dir par sa?— I ti pe dir nou devret fer sa ki nou dir.

I annan en zistwar dan Labib ki montre ki i byen enportan pour koz laverite. Sa  zistwar i lo de dimoun ki ti dir zot disip Zezi. Annou vwar ki ti arive.

Ti fer apepre de mwan ki Zezi ti’n mor. Bokou dimoun sorti byen lwen ti’n vin Zerizalenm pour en lafet Zwif ki ti apel Lapannkot. Zapot Pyer ti donn en zoli diskour lo Zezi, ki Zeova ti’n resisite. Bokou dimoun ki ti’n vin la Zerizalenm, ti tann koz lo Zezi pour premye fwa. Zot ti anvi konn plis. Ki zot ti fer alor?

Zot ti reste plis letan Zerizalenm. Me avek letan, zot larzan ti fini, e zot ti bezwen larzan pour aste manze. Bann disip Zerizalenm ti anvi ed sa bann viziter. Alor bokou zot ti vann bann keksoz ki zot ti annan e anmenn sa larzan kot bann zapot Zezi. Bann zapot ti donn sa larzan bann ki ti bezwen.

Ananyas ek son madanm Safira ti dan kongregasyon Kretyen Zerizalenm. Zot ti deside vann en propriyete ki ti pour zot. Personn pa ti dir zot fer sa. Zot ti deside zot menm. Me zot pa ti fer sa akoz zot ti  kontan sa bann nouvo disip Zezi. Zot ti anvi fer dimoun krwar zot ti bann bon dimoun. Zot ti dir zot pou donn tou sa larzan ki zot gannyen pour ed lezot, kan sa ler zot ti’n fini aranze zot de pour gard en pe sa larzan. Ki ou dir? I byen ki mannyer zot ti fer?—

Ananyas ti vin vwar bann zapot. I ti donn zot sa larzan. Me Bondye ti konnen i pa’n donn tou sa larzan. Alors Bondye ti fer zapot Pyer konnen ki Ananyas pa’n koz laverite.

Pyer ti dir: ‘Ananyas, akoz ou’n les Satan fer ou fer sa? Sa propriyete ti pour ou. Personn pa’n fors ou pour vann li. E apre ki ou ti’n vann li, ou menm ki ti deside ki pour fer avek. Alor akoz ou pe fer krwar ou pe donn tou sa larzan kan sa ler ou pe donn zis en pe? Pa zis avek zonm ki ou’n manti, me avek Bondye.’

Sa ti en keksoz serye. Ananyas ti pe koz manti! I pa ti pe fer sa ki i ti dir i pe fer. I ti pe zis fer krwar. Labib i dir nou ki ti arive apre. I dir: ‘Dek ki Ananyas ti tann parol Pyer, i ti tonm sek ater e i ti mor.’ Bondye ti fer li mor! Apre zot ti anmas son lekor e al anter li.

 Anviron trwa er-d-tan plitar, Safira ti vini. I pa ti konnen ki ti’n arive avek son msye. Alors Pyer ti demann li: ‘Dir mwan, eski zot in vann zot propriyete pour sa kantite larzan ki zot in donn nou?’

Safira ti reponn: “Wi, pour sanmenm sa pri.” Me sa pa ti vre! Zot ti’n kit en pe sa larzan ki zot ti’n gannyen avek zot. Alors Bondye ti fer li mor li osi.—Akt 5:1-11.

Ki leson nou tire dan sa ki ti arive avek Ananyas ek Safira?— I montre nou ki Bondye pa kontan bann dimoun ki koz manti. I oule nou toultan koz laverite. Me bokou dimoun i dir i pa mal pour koz manti. Ou krwar sa bann dimoun ou?— Eski ou ti konnen ki tou sa bann maladi, soufrans, ek lanmor lo later i egziste akoz en mansonz?—

Ou rapel Dyab ti koz manti avek Ev, sa premye madanm. I ti dir li i pa pou mor si i dezobei Bondye e manz sa fri ki Bondye ti’n dir pa manze. Ev ti krwar Dyab e i ti manz sa fri. I ti donn Adan osi pour manze. Kan zot ti fer sa, zot ti fer pese e vin peser. Tou zot zanfan osi ti ne konman peser. E akoz zot ti peser, zot ti soufer e mor. Ki mannyer tousala ti konmanse?— I ti konmans avek en mansonz.

Alor nou konpran akoz Zezi ti dir ki Dyab “i manter e papa tou mansonz”! Li ki ti premye koz manti. Kan en dimoun i koz manti, i pe fer parey Dyab. Nou devret mazin sa ler nou ganny tante pour koz manti.—Zan 8:44.

 Kan ki ou kapab ganny tante pour koz manti?— Pa ler ou’n fer en keksoz mal?— Parler ou kapab kas en keksoz e ou pa’n fer par ekspre. Me si manmi i demann ou lekel ki’n kas sa keksoz, eski ou devret met lo ou frer oubyen ou ser? Oubyen eski ou devret fer konmsi ou pa konn nanryen lo la?—

Si ou annan ou travay lakour pour fer e ou’n fer zis en bout. Eski ou devret dir ou’n fini fer tou?— Pa bliye ki ti arive avek Ananyas ek Safira. Zot pa ti koz laverite. E Bondye ti montre ki sa i mal par fer zot mor.

I vre nou kapab fer en keksoz mal parler. Me si nou koz manti lo la, i pou fer keksoz pli pir ankor. E nou pa ni devret dir zis en bout laverite. Labib i dir: “Koz laverite.” I osi dir: “Pa koz manti antre zot.” Zeova i toultan koz laverite, e i oule nou fer parey li.—Efezyen 4:25; Kolosyen 3:9.