1. Kisisa sa paradi spirityel e ki nou devret determinen pour fer?

 OZORDI, i annan en paradi lo later kot i annan en kantite dimoun ki bizi pe fer bann bon keksoz. Sa plizyer milyon dimoun ki dan sa paradi i annan vre lape e zot determinen pour pa zanmen kit sa paradi. Zot osi anvi ki otan dimoun posib i zwenn ansanm avek zot dan sa landrwa senbolik ki spesyal. Kisisa sa landrwa? Sa i sa paradi spirityel! a

2. Kwa ki remarkab avek sa paradi spirityel?

² Dan en fason remarkab, Zeova in kree en landrwa senbolik kot son pep i anpe e ini avek kanmarad menm si zot viv dan move lemonn Satan ki danzere e kot dimoun i ay kanmarad. (1 Zan 5:19; Rev. 12:12) Nou Bondye ki kontan nou, i vwar ki mannyer sa lemonn i fer dimoun soufer. Alor i fer son bann serviter santi zot an sekirite pour zot kapab kontinyen servi li dan lazwa. Parol Bondye i dir ki sa paradi spirityel i parey en “landrwa kasyet” ki an sekirite e i parey en “zarden ki ganny byen aroze.” (Iza. 4:6; 58:11) Bann dimoun ki reste dan sa paradi spirityel i annan benediksyon Zeova. Sa i fer ki zot zwaye e an sekirite dan sa bann dernyen zour ki vreman difisil.—Iza. 54:14; 2 Tim. 3:1.

3. Kan ki sa profesi dan Izai sapit 65 ti ganny son premye lakonplisman?

³ Zeova ti enspir profet Izai pour dekri ki mannyer lavi pou ete pour bann ki reste dan sa paradi spirityel. Ou kapab trouv sa deskripsyon dan Izai sapit 65. Sa ki ganny dir dan sa sapit ti annan en premye lakonplisman dan lannen 537 avan Kris. Sa letan, bann Zwif ki ti’n repantir ti ganny  libere an egzil Babilonn e zot ti retourn dan zot pei. Zeova ti beni son pep e i ti ed zot pour fer lavil Zerizalenm ki ti’n ganny detrir, revin zoli ankor. I ti osi ed zot pour fer tanp revin sa landrwa prensipal an Izrael kot zot ti ador Li.—Iza. 51:11; Zek. 8:3.

4. Ki mannyer sa profesi dan Izai sapit 65 pe ganny akonplir dan nou letan?

⁴ Profesi Izai ti annan en dezyenm lakonplisman. Sa ti konmans an 1919, ler bann serviter Zeova dan nou letan ti ganny libere dan Gran Babilonn. Apre sa, sa paradi spirityel ti konmans agrandi partou lo later. Bann proklanmater devoue ti form en kantite kongregasyon e zot ti konmans demontre bann kalite ki fer Bondye plezir. Bann zonm ek madanm ki ti vyolan e ki ti fer bann keksoz imoral ti “devlop sa nouvo personnalite ki’n ganny kree dapre lavolonte Bondye.” (Efe. 4:24) Byensir, en kantite sa bann benediksyon ki Izai i koz lo la pou ganny akonplir dan nouvo lemonn. Me depi la konmela nou pe ganny en kantite byenfe. Dan sa lartik, nou pou vwar bann byenfe ki nou gannyen e akoz nou pa devret zanmen kit sa paradi spirityel.

LAFASON KI BANN KI DAN SA PARADI SPIRITYEL I SANTI

5. Dapre Izai 65:13, ki nou gannyen dan sa paradi spirityel?

⁵ Zot an bonn sante spirityelman e sa i donn zot lafors. Profesi Izai i montre ki i annan en gran diferans ant lavi bann ki dan sa paradi spirityel ek lavi bann ki pa dan sa paradi spirityel. (Lir Izai 65:13.) Zeova i donn son bann serviter tou sa ki zot bezwen pour reste pros avek li. I donn nou son lespri sen, son Parol Labib ek en kantite piblikasyon ki baze lo Labib pour ki nou kapab “manze, . . . bwar . . . [e] dan lazwa.” (Konpar Revelasyon 22:17.) De lot kote, bann ki pa dan sa paradi spirityel i “lafen . . . , swaf . . . [e] zot pou onte.” Zot napa en lanmitye avek Bondye.—Amos 8:11.

6. Ki mannyer Zoel 2:21-24 i dekri serten sa bann kado ki Zeova i donn nou e ki byenfe nou gannyen?

⁶ Dan son profesi, profet Zoel ti servi bann keksoz de baz parey dible, diven ek delwil zoliv pour montre ki Zeova i donn nou tou sa ki nou bezwen pour gard nou lafwa for e sa i enkli manze spirityel. (Zoel 2:21-24) I fer sa atraver Labib, nou bann piblikasyon ki baze lo Labib, nou sit Enternet e osi dan renyon ek lasanble. Ler nou servi sa bann kado ki Zeova i donn nou toulezour, nou pou an bonn sante spirityelman e nou pou annan plis lafors.

7. Kwa ki fer nou zwaye? (Izai 65:14)

⁷ Nou zwaye e satisfe. Pep Bondye i kapab “kriye dan lazwa” parski zot vreman rekonesan anver Zeova. (Lir Izai 65:14.) Nou annan bann laverite ki ankouraz nou ek bann promes rekonfortan ki dan Parol Bondye. Nou osi annan en lespwar pour lavenir ki baze lo ranson Kris. Sa bann keksoz i fer nou zwaye. Ler nou koz lo sa bann keksoz avek nou bann frer ek ser dan kongregasyon, sa i fer nou vreman ere.—Ps. 34:8; 133:1-3.

8. Ki de laspe enportan sa paradi spirityel?

⁸ Sa lanmour ek linite ki i annan parmi pep Zeova, i de laspe enportan sa paradi spirityel. Sa i donn nou en nide ki mannyer lavi pou ete dan nouvo lemonn kot bann serviter Zeova pou kontan kanmarad plis e pli ini ki zot ete ozordi. (Kol. 3:14) En ser i dekri sa ki i ti remarke avek pep Zeova sa premye fwa ki i ti zwenn zot. I dir: “Mon pa ti konnen ki mannyer  mon pou zwaye menm dan mon fanmir. Sa premye fwa ki mon ti vwar dimoun demontre vre lanmour anver kanmarad, i ti ler mon ti rankontre Temwen Zeova.” Nenport dimoun ki anvi vreman zwaye e satisfe i bezwen vin dan nou paradi spirityel. Nenport lopinyon ki dimoun i annan lo bann serviter Zeova, bann serviter Zeova i annan en bon non oubyen repitasyon devan Zeova e devan tou bann ki ador li.—Iza. 65:15.

9. Ki Izai 65:16, 17 i promet konsernan bann keksoz ki fer nou soufer?

⁹ Nou kapab relaks e nou kalm. Izai 65:14 i dir ki bann ki swazir pour pa antre dan sa paradi spirityel i “kriye parski zot leker pou fermal e zot pou plennyen parski zot pou dekouraze.” Me ki pou arive avek tou sa bann keksoz ki’n fer pep Bondye ditor e fer zot soufer? Sa bann keksoz “pou ganny oubliye [e] zot pou ganny kasyet devan” Bondye. (Lir Izai 65:16, 17.) Zeova pou tir tou nou bann problenm e avek letan, nou pa pou ni menm mazin lafason ki sa bann problenm ti fer nou santi.

10. Akoz ou rekonesan pour sa loportinite ki ou annan pour asosye avek bann frer ek ser? (Vwar portre.)

¹⁰ Ozordi, nou santi nou pli kalm ler nou dan renyon, kot nou kapab relaks e pa konsantre lo bann keksoz dan sa lemonn ki fatig nou. Nou osi fer ki nou bann frer ek ser i kapab santi zot kalm ler nou demontre bann kalite parey lanmour, lazwa, lape, labonte ek ladouser ki form parti fri lespri sen Bondye. (Gal. 5:22, 23) Nou vreman rekonesan ki nou form parti lorganizasyon Bondye. Bann ki reste dan sa paradi spirityel pou vwar ler Bondye pou akonpli son promes pour fer “en nouvo lesyel ek en nouvo later.”

11. Dapre Izai 65:18, 19, ki mannyer nou devret santi konsernan sa paradi spirityel ki Zeova in kree?

¹¹ Nou rekonesan e nou eksite. Izai i eksplike akoz nou “devret selebre e zwaye” dan sa paradi spirityel. Sa i akoz Zeova ki’n kree sa paradi. (Lir Izai 65:18, 19.) Alor i fer sans ki Zeova pe servi nou pour ed dimoun sorti dan bann lorganizasyon sa lemonn ki pa ansenny zot laverite konsernan Bondye e pour ed zot antre dan sa paradi spirityel. Bann benediksyon ki nou gannyen akoz nou dan laverite i fer nou eksite e sa i motiv nou pour koz avek lezot konsernan sa bann benediksyon.—Zer. 31:12.

12. Ki mannyer sa bann promes ki dan Izai 65:20-24 i fer ou santi e akoz?

 ¹² Nou osi rekonesan e eksite konsernan sa lespwar ki nou annan konman bann sitwayen sa paradi spirityel. Zis mazin lo tou sa ki nou pou vwar e fer dan nouvo lemonn. Labib i promet: “I pou nepli annan en pti baba . . . ki pou viv zis pour detrwa zour e i pou nepli annan en zonm aze ki pa pou viv lontan.” Nou pou “konstri bann lakaz e [nou] pou reste ladan. [Nou] pou annan bann plantasyon rezen e [nou] pou manz zot bann fri.” Nou “pa pou rente pour nanryen” parski nou pou “sa desandans ki Zeova in beni.” Zeova i promet ki nou pou an sekirite, ki nou pou annan tou sa ki nou bezwen e ki nou pou annan en vre bi dan lavi. I pou konnen ki sak dimoun i bezwen “menm avan ki zot kriye” e i pou “satisfer dezir tou sa ki vivan.”—Iza. 65:20-24; Ps. 145:16.

13. Ki mannyer Izai 65:25 i dekri bann sanzman ki dimoun i fer dan zot lavi ler zot konmans servi Zeova?

¹³ Nou pou anpe e an sekirite. Avek led lespri sen Bondye, bann dimoun ki ti vyolan, agresiv oubyen ki pa ti onnet in fer bann gran sanzman dan zot lavi. (Lir Izai 65:25.) Zot in travay dir pour retir sa bann move tre ki zot ti annan. (Rom. 12:2; Efe. 4:22-24) Byensir, pep Bondye i ankor enparfe alor nou pou kontinyen fer fot. Me Zeova in rasanble ansanm “tou sort kalite dimoun” ki kontan li e ki kontan kanmarad. Sa i fer ki zot anpe e ini. (Tit 2:11) Sa i en mirak ki zis Bondye Tou Pwisan ki kapab fer!

14. Ki mannyer sa ki Izai 65:25 i koz lo la ti arive dan ka en frer?

¹⁴ Eski dimoun i vreman kapab sanz zot personnalite? Annou vwar legzanp en garson ki ti pe viv en lavi imoral e ki ti vyolan. Ler sa garson ti annan 20 an, i ti’n deza al prizon plizyer fwa. I ti al dan prizon parski i ti vol loto, kas batiman e vole e i ti fer lezot krim vreman grav. I ti toultan pare pour lager. Ler i ti tann laverite ki dan Labib pour premye fwa e i ti konmans asiste renyon Temwen Zeova, i ti asire ki i ti’n trouv en bi dan lavi, setadir pour ador Zeova dan sa paradi spirityel. Apre ki i ti’n batize, i ti souvan mazin lafason ki Izai 65:25 ti aplik pour li. Oparavan i ti parey en lyon me aprezan i parey en mouton. I ti’n sanz konpletman parski oparavan i ti en dimoun vyolan me aprezan i en dimoun ki kontan fer lape.

15. Akoz nou anvi envit lezot pour zwenn ansanm avek nou dan sa paradi spirityel e ki mannyer nou kapab fer sa?

¹⁵ Izai 65:13 i konmans avek sa bann parol: “La sa ki Souvren Senyer Zeova i dir.” Verse 25 i fini avek sa bann parol: “La sa ki Zeova in dir.” Sa ki Zeova i dir i toultan vin vre. (Iza. 55:10, 11) Sa paradi spirityel i egziste ozordi. Zeova in rasanble ansanm son bann serviter ki parey en fanmir e i napa en lot lorganizasyon ki parey lorganizasyon Zeova. Menm si nou pe viv dan sa move lemonn, nou kapab annan lape a en serten degre e santi nou an sekirite parmi pep Bondye. (Ps. 72:7) I pour sa rezon ki nou anvi ed otan dimoun posib pour zwenn ansanm avek nou dan nou fanmir spirityel. Nou kapab fer sa par konsantre lo fer disip.—Mat. 28:19, 20.

KI MANNYER NOU KAPAB ATIR LEZOT VER SA PARADI SPIRITYEL?

16. Ki mannyer bann dimoun i ganny atire ver sa paradi spirityel?

¹⁶ Nou tou nou annan en rol enportan pour fer sa paradi spirityel vin en landrwa kot dimoun pou anvi vini. Pour nou  kapab fer sa, nou bezwen swiv legzanp Zeova. I pa fors personn pour form parti son lorganizasyon. O kontrer avek ladouser i “atir” dimoun ver li. (Zan 6:44; Zer. 31:3) Bann dimoun senser ki aprann konsernan bann zoli kalite ki Zeova i annan ek son personnalite, zot ganny atire ver li. Ki mannyer bann bon kalite ki nou annan ek nou bon kondwit i kapab atir dimoun ver sa paradi spirityel?

17. Ki mannyer nou kapab atir lezot ver sa paradi spirityel?

¹⁷ En fason ki nou kapab atir dimoun ver sa paradi spirityel, i par tret nou bann frer ser avek lanmour ek labonte. Ler en dimoun i konmans asiste renyon, nou anvi ki i santi parey bann dimoun dan premye syek ki pa ti krwar dan Bondye e ki petet ti asiste renyon dan lavil Korent. I kapab ki sa bann dimoun ti dir: “Bondye i vreman parmi zot.” (1 Kor. 14:24, 25; Zek. 8:23) Alor nou bezwen kontinyen swiv sa konsey pour “viv anpe avek kanmarad.”—1 Tesa. 5:13.

18. Kwa ki kapab atir dimoun ver nou lorganizasyon?

¹⁸ Nou devret toultan esey vwar nou bann frer ek ser Kretyen parey Zeova i vwar zot. Nou fer sa par konsantre lo zot bann bon kalite olye lo zot bann defo ki avek letan zot pou nepli annan. Si nou “bon avek kanmarad, annan konpasyon ek tandres, pardonn kanmarad volonterman,” nou pou kapab rezourd nenport dezakor dan en bon fason. (Efe. 4:32) Sa pou fer ki dimoun ki anvi ganny trete dan sa fason, pou ganny atire ver sa paradi spirityel. b

 RESTE DAN SA PARADI SPIRITYEL

19. (a) Parey nou vwar dan sa bwat “ Zot ti ale e apre zot ti retournen,” ki serten in dir apre ki zot ti’n retourn dan sa paradi spirityel? (b) Ki nou devret determinen pour fer? (Vwar portre.)

¹⁹ Nou vreman rekonesan pour sa paradi spirityel. Sa paradi i pli zoli ki oparavan e i annan bokou plis dimoun ki pe ador Zeova dan sa paradi ki oparavan. Annou toultan demontre rekonesans pour sa paradi ki Zeova in kree pour nou. Tou dimoun ki anvi reganny lafors, satisfe, kalm e an sekirite i bezwen vin dan sa paradi spirityel e pa zanmen kit li. Me nou bezwen fer atansyon parski Satan pe fer tou sa ki i kapab pour anbet nou pour fer nou kit sa paradi spirityel. (1 Pyer 5:8; Rev. 12:9) Nou pa devret les li fer sa. Annou travay dir pour fer sir ki sa paradi spirityel i reste zoli, prop e anpe.