Servi Bondye i son latizann!

Ler de pionye ti ganny envite dan en lakaz Kenya, zot ti sirprann pour vwar en pti dimoun pe alonze lo en lili. Son lekor ti vreman pti e son lebra ti kourt. Ler zot ti dir li konsernan promes Bondye kot “sa enn ki bwete pou grenpe parey en serf,” sa zonm ti reazir par donn zot en gran sourir.​—Iza. 35:6.

Sa de pionye ti aprann ki Onesmus, ki aprezan i dan son 35 an an montan ti’n ne avek en kalite maladi ki apel osteogenesis imperfecta oubyen brittle bone disease. En senp pti tape ti kapab kas son bann lezo telman zot ti frazil. Vi ki napa gerizon oubyen en tretman efikas pour sa maladi, Onesmus ti pe ekspekte pas tou son lavi dan douler e zis reste dan en wiltyer.

Onesmus ti aksepte en letid Labib. Me, son manman pa ti oule i asiste renyon kot Lasal Rwayonm, akoz i ti per pangar i ganny dimal oubyen plis douler. Alor, bann frer ti anrezistre bann renyon pour li e Onesmus ti ekout zot kot lakour. Apre ki i ti’n etidye pour senk mwan, Onesmus ti deside pour asiste renyon malgre bann risk.

Eski lefet ki Onesmus ti asiste renyon sa ti fer li ganny plis douler? Non! Anfet, i ti tou le kontrer, Onesmus i dir: “Sa douler ki mon ti pe konstaman gannyen ti mwens pandan renyon.” I ti mazinen ki se son nouvo lespwar ki ti fer li dibyen. Manman Onesmus ti remark sanzman dan latitid son garson, i ti telman kontan ki i ti dakor pour konmans etidye Labib li osi. I ti abitye dir: “Servi Bondye i latizann mon garson.”

Pa tro lontan apre, Onesmus ti vin en proklanmater non batize. Apre, i ti batize e aprezan i en asistan ministeryel. Menm si i pa kapab servi son de kote lipye ek en kote son lebra, Onesmus ti anvi fer tou sa ki i kapab dan servis Zeova. I ti anvi fer pionye asistan me i ti ezite pour ranpli son form. Akoz? Parski i ti konnen ki i ti pou bezwen depan antyerman lo en lot dimoun pour pous son wiltyer. Ler i ti koz avek bann frer ek ser konsernan son santiman, zot ti promet pour ed li e sanmenm ki zot ti fer pour ed Onesmus fer pionye asistan.

Apre sa, Onesmus ti anvi fer pionye ordiner, me i ti annan menm konsern. Me i ti ganny en lankourazman ki i ti bezwen dan teks pour lazournen. Sa ti Psonm 34:8 ki dir: “Goute e vwar konman Zeova i bon.” Apre ki i ti’n reflesir lo sa verse, Onesmus ti deside pour pran servis pionye ordiner. Konmela i pres kat fwa par semenn e i annan en kantite letid Labib ki pe byen progrese. An 2010, i ti asiste Lekol Pionye. Enn parmi sa de frer ki ti pas kot li premye ti son enstrikter e sa ti fer Onesmus kontan.

Paran Onesmus in aprezan mor, me bann frer ek ser dan kongregasyon i pran swen avek li sak zour. Onesmus i rekonesan pour tou bann benediksyon ki i pe gannyen e i pe esper avek enpasyans sa zour ler “personn pa pou dir: ‘Mon malad!’”​—Iza. 33:24.

[Portre lo paz 15]

[Portre lo paz 15]