I annan plizyer zelev ki pe lekol, pa dan en laklas, me kot zot. Si sa i le ka pour ou, ki mannyer ou kapab reisi? La serten sizesyon. *

•  Senk sizesyon pour ed ou reisi

•  Ki lezot zenn i dir?

• Annan en routin organize. Esey annan en progranm ki regilye, zis parey si ou ti kot lekol. Desid lo en ler spesifik pour fer bann leson lekol, louvraz lakour ek lezot keksoz ki enportan. Ou kapab aziste sa ler dapre nesesite.

  Prensip Labib: “Fer tou keksoz annord.”​—1 Korentyen 14:40.

  “Fer parey ou ti pou fer si ou ti kot lekol. Ou bezwen fini ou bann leson dan en serten letan.”​—Katie.

  Pour reflesir lo la: Akoz i en bon lide pour met ou progranm an ekrir e met li dan en landrwa kot ou pou vwar li fasilman?

• Devlop disiplin. En dimoun ki pe vin pli matir i realize ki defwa i bezwen fer serten keksoz deswit, menm si i pa anvi. Pa bezwen esper pli tar!

  Prensip Labib: “Travay dir, pa bezwen fer pares.”​—Romen 12:11.

  “Pli gro defi se pour vin disiplinen. I fasil pour trouv leskiz e dir ‘mon ava fer mon devwar lekol pli tar.’ Akoz ou pa fer pli tar e ou vwar ou avek en kantite leson pour fer.”​—Alexandra.

  Pour reflesir lo la: Ki mannyer i pou ed ou devlop plis disiplin si ou fer ou leson toultan menm ler e dan menm landrwa?

• Fer en landrwa pour etidye. Met tou sa ki ou pou bezwen pour ou etidye o bor ou. Fer sa landrwa ki ou pou etidye konfortab. Me veye ki i pa tro konfortab akoz ou pa anvi tonm dormi ler ou sipoze pe travay! Si i pa posib pour ou annan en landrwa ki’n dezinyen pour letid, ou kapab petet fer ou leson dan lakwizin oubyen dan lasanm.

  Prensip Labib: “Plan sa enn ki aktif i fer li vin ris.”​—Proverb 21:5.

  “Met ou boul foutbol ek zwe video laba, met ou telefonn lo silans e met ou gitar dan son plas. I enportan ki i napa nanryen ki kapab distrer ou.”​—Elizabeth.

  Pour reflesir lo la: Ki azisteman ou kapab fer pour fer sir ki kot ou etidye napa okenn distraksyon ki pa neseser?

• Aprann konsantre. Konsantre lo sa leson ki ou pe fer, pa fer detrwa keksoz an menm tan. Si ou fer sa, i pou pli fasil pour fer fot e i pou pran plis letan pour konplet ou bann leson.

  Prensip Labib: “Servi byen [ou] letan.”​—Efezyen 5:16.

  “I ti enposib pour reste konsantre ler mon telefonn ti o bor mwan. Mon ti perdi en kantite letan dan fer keksoz ki pa ti neseser.”​—Olivia.

  Pour reflesir lo la: Eski ou kapab ptitapti ogmant lakantite letan ki ou konsantre dan en leson?

• Pran bann poz. Al marse, mont ou bisiklet oubyen fer legzersis. En pastan osi i kapab fer ou annan plis lenerzi. Me liv School Power i dir “fer ou leson premye.” I azoute, “Ou pou pli byen apresye ou bann poz ler ou’n akonpli ou travay.”

  Prensip Labib: “En pti ponnyen repo i pli bon ki de ponnyen travay ki zis i en lakours deryer divan.”​—Eklezyast 4:6.

  “Normalman ou kapab aprann zwe en lenstriman lanmizik oubyen fer art kot lekol. Mon pa ti realize ki kantite mon ti mank sa bann keksoz ziska ki mon ti nepli kapab fer zot. I byen pour annan en pastan osi.”​—Taylor.

  Pour reflesir lo la: Ki keksoz ou kapab fer dan ou letan poz ki pou ed ou konsantre lo ou leson ler ou repran?